1 ṣamwil 9 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

šawl imnaggar d‑ṣamwil

¹ yili yan‑urgaz gu‑bnyamin ism‑ns qiš yus n‑abiyal lli‑igan yus n‑ṣarur lli‑igan yus n‑bakurat lli‑igan yus n‑afiyaḥ. ig nttan gu‑bnyamin ig amdwas iḥaršn.

² yili dars yus ism‑ns šawl, ig aɛzri ifulkin ġ‑iẓri. ur‑illi ma‑t‑yufn ġ‑ufulki‑an ġ‑gr ayt‑israyil, d‑nttan iġzzif fllasn kullu, lkmn‑as ġir taġruṭṭ.

³ ha yan‑wass jlan iġʷyal i‑qiš babas n‑šawl. yini qiš i‑yus šawl: «awi dik yan ġ‑iɛyyaln, tddut a‑tsigglt iġʷyal.»

⁴ iftu ik iwrar n‑afraym, izri ġ‑wakal n‑šališa, ur‑tn‑ufin. kn akal n‑šaɛlim, ur‑gis‑llin. zrin zġ‑wakal n‑ayt‑bnyamin, ur‑tn‑gis‑ufin.

⁵ lliġ kšmn s‑wakal n‑ṣuf, yini šawl i‑uh̬ddam‑ns lli‑dids‑illan: «rwaḥ a‑nwrri s‑darnġ, a‑ur‑isrs baba lhmm n‑iġʷyal yasi winġ s‑uggʷar.»

⁶ yini‑as‑uh̬ddam‑ns: «hati illa yan‑uh̬ddam n‑rbbi ġ‑tmdint‑ad, ar‑ti‑tuqqarn mddn. kullu ma‑ittini, ar‑itafaw‑wawal‑ns. a‑dars‑nddu ġilad, a‑ur‑imil iml‑aġ man aġaras a‑ra‑namẓ.»

⁷ yini‑as šawl: «iġ‑dars‑ndda, ma‑ra‑nfk i‑ssiyd‑an? aġrum itmma‑yaġ zġ‑twulkt. ur‑darnġ tawafka ma‑nakka i‑uh̬ddam n‑rbbi. mad‑darnġ‑sul‑illan?»

⁸ isawl‑d‑daġ‑uh̬ddam yini: «illa ġ‑ufus‑inu yan rrbɛ n‑uqarid n‑nnʷqrt. ra‑t‑fkġ i‑uh̬ddam n‑rbbi ad‑aġ‑iml aġaras.»

⁹ ġayd izrin ġ‑dar ayt‑israyil, iġ‑idda yan a‑isqsa rbbi, ar‑ittini: «hiya a‑nddu dar‑umannay.» ašku kkan‑ttin ar‑ttinin ‹amannay› i‑wanna‑mi‑nttini ‹nnabi› ġilad.

¹⁰ yini šawl ġakudan i‑uh̬ddam‑ns: «ifulki. rwaḥ a‑dars‑nddu.» ftun s‑tmdint lli‑ġ‑illa‑uh̬ddam‑an n‑rbbi.

¹¹ lliġ iwnn i‑uwsawn n‑tmdint‑an, mnaggarn kra n‑tɛyyalin ffuġnt‑d a‑n‑agʷmnt, sqsan‑tnt: «is‑illa‑ġid‑umannay?»

¹² inint‑asn‑d: «hatin ġ‑lgddam‑nun. ḥarrwat. bḥra‑d‑yuška s‑tmdint, ašku rad‑ġrṣn mddn ġassad ġ‑iggi n‑uwrir.

¹³ ġir kšmat s‑tmdint s‑ra‑t‑in‑tafm ur‑ta‑yiwn s‑uwrir a‑n‑gis‑išš. ašku mddn ur‑rad‑ššn ard idɛu s‑lbaraka f‑tġrṣi, f‑ad‑ilmma‑ššn willi ityawɛraḍn. awnat s‑t‑in‑tufam ġilad.»

¹⁴ awnn ġakudan s‑tmdint. lliġ‑n‑kšmn, ha ṣamwil iffuġ‑d imnaggar‑tn, d‑ntta yujad a‑yawn s‑uwrir.

¹⁵ ṣamwil, isawl‑d srs sidi rbbi ġ‑wass lli‑izrin, ur‑ta‑d‑yuški šawl, inna‑yas:

¹⁶ «azkka zund tasaɛt‑ad, rad‑ak‑n‑aznġ yan zġ‑wakal n‑bnyamin. ẓẓġur‑t a‑ig amzwar f‑mddn‑inu n‑ayt‑israyil. ra‑ifukku mddn‑inu zġ‑ufus n‑ayt‑filisṭin. ašku mnadġ‑n ġ‑mddn‑inu, sfldġ i‑usmammi‑nsn.»

¹⁷ ġir iẓra ṣamwil šawl s‑as‑d‑daġ‑isawl sidi rbbi yini: «ha walli‑f‑ak‑sawlġ. nttan a‑ra‑itnbaḍ ġ‑mddn‑inu.»

¹⁸ izayd šawl yakmur‑n s‑ṣamwil ġ‑imi n‑tmdint, isqsa‑t: «ġir ini‑yyi maniġ tlla‑tgmmi n‑umannay?»

¹⁹ isawl‑d ṣamwil yini‑as: «nkkin a‑igan amannay. awnat tzwurm‑iyi s‑iggi n‑uwrir, ašku ra‑didi‑tššm ġassad. azkka ra‑k‑adjġ a‑ttddut, mlġ‑ak kullu ma‑illan ġ‑uwl‑nk.

²⁰ imma iġʷyal‑nk lli‑ijlan kraḍ‑uwssan ayad, ad‑ur‑sul‑gisn‑tswingimt, han tyafan. ġilad manwa mi illa kullu lh̬ir n‑israyil? is‑urd kiyi d‑ayt‑dar babak?»

²¹ isawl‑d šawl yini‑as: «nkki, is‑urd gu‑bnyamin ad‑giġ, zġ‑tqbilt lli‑kullu‑imẓẓin ġ‑israyil? is‑urd tagʷmat‑nġ a‑kullu‑imẓẓin ġ‑gr tagʷmatin n‑bnyamin? ma‑f‑iyi‑tnnit awal‑ad?»

²² izayd ṣamwil yawi šawl d‑uh̬ddam‑ns, išškšm‑tn s‑uḥanu, issgawr‑tn ġ‑umnid n‑kraḍ id‑mraw (30) n‑urgaz lli‑ityawɛraḍn.

²³ yini ṣamwil i‑walli issnwan: «awi‑d taġamt lli‑ak‑fkiġ, uṣṣaġ‑k fllas a‑stti‑d‑tḥḍut ġ‑dark.»

²⁴ yasi‑d bu‑isnwi aḍar d‑ma‑d‑imun, isrs‑t‑id ġ‑lgddam n‑šawl. izayd ṣamwil yini‑as: «ẓr mayd‑ak‑nḥḍa, ittrs‑d ġ‑umnid‑nk. išš ašku nḥḍa‑yak‑t ar tasaɛt‑ad, baš a‑tššt d‑mddn‑ad lli‑mi‑ɛrḍġ.» išš šawl ġ‑dar ṣamwil ġassan.

²⁵ huwwdn ilmma zġ‑uwrir s‑tmdint. jjujadn i‑šawl maniġ a‑iggan ġ‑iggi n‑tgmmi.

²⁶ zikk ṣbaḥ lliġ‑d‑ifaw‑wass, iġr‑d ṣamwil i‑šawl f‑iggi n‑tgmmi, yini‑as: «nkr a‑k‑safḍġ d‑uġaras‑nk.» inkr‑d šawl, imun dids ṣamwil s‑brra.

²⁷ lliġ huwwdn s‑brra n‑tmdint, yini ṣamwil i‑šawl: «ini i‑uh̬ddam‑nk a‑izwur lgddam.» lliġ izri lgddam, isawl daġ ṣamwil yini‑as: «bidd imikk ad‑ak‑mlġ awal n‑rbbi.»