1 ṣamwil 8 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ḍalbn a‑fllasn‑yili yan‑ugllid

¹ lliġ yuwssr ṣamwil, ig‑n tarwa‑ns f‑ad‑ḥkamn f‑ayt‑israyil.

² iga ism n‑ifh̬ddi‑ns yuwil, ig ism n‑wayya abiyah, ar‑tḥkamn ġ‑tmdint n‑bir‑šibaɛ.

³ walaynni tarwa‑ns ur‑ftin ġ‑uġaras lli‑ikka babatsn, jlun ntni ar‑tamẓn rriba d‑rršwa, ar‑ssɛwwajn lḥqq.

⁴ munn‑d kullu imġarn n‑ayt‑israyil, aškin‑d s‑dar ṣamwil ġ‑rama,

⁵ inin‑as: «hati tuwssrt, d‑tarwa‑nk ur‑a‑fttun ġ‑uġaras lli‑tkkit. ġilad ẓr‑aġ kra n‑yan a‑fllanġ‑ig agllid, a‑fllanġ‑iḥkam zund kullu iqbiln.»

⁶ ṭiyr i‑ṣamwil lliġ‑as‑ḍalbn ad‑asn‑iẓr kra n‑yan a‑ig agllid a‑fllasn‑iḥkam. iẓẓall ṣamwil i‑sidi rbbi.

⁷ yini‑d sidi rbbi i‑ṣamwil: «sfld s‑wawal n‑mddn‑an d‑kullu ma‑s‑ak‑nnan. han urd kiyi ad‑agʷin, walaynni nkki ad‑agʷin a‑ur‑fllasn‑gġ agllid.

⁸ ašku ġmklli‑ak‑skrn ġilad ad‑iyi‑bdda‑skarn, zġ‑lliġ‑tn‑d‑ssiwnġ zġ‑miṣr sul s‑ġassad, fln‑iyi ddun ar‑tqasan id‑rbbi yaḍni.

⁹ sfld ġilad s‑wawal‑nsn, walaynni fk‑asn tuggʷa‑yad s‑lmɛqul, tmlt‑asn ma‑rad‑asn‑iskr‑ugllid lli‑ra‑fllasn‑iḥkam.»

isawl ṣamwil f‑ugllid‑an

¹⁰ yini ṣamwil iwaliwn‑an n‑sidi rbbi i‑mddn lli‑as‑iḍalbn agllid,

¹¹ yini‑asn: «ġmkad a‑rad‑gnt‑tnbaḍin n‑ugllid lli‑ra‑fllawn‑iḥkam. ra‑yawi tarwa‑nun ad‑as‑ṣwagn lkrarṣ, ar‑as‑tnayn f‑iysan, ar‑tazzaln ula ġ‑lgddam n‑lkrarṣ.

¹² rad‑fllawn‑issbidd kra giwn ad‑gn iriyasn f‑walf, d‑iriyasn f‑smmus id‑mraw (50). isti wiyyaḍ ad‑kkrzn ikalln‑ns, ar‑mggrn ṣṣabt‑ns, ar‑as‑tɛdaln imqlad n‑imiġ d‑imassn n‑lkrarṣ.

¹³ ra‑yawi istitun ad‑tɛdalnt tujjutin ar‑tqasant isnwitn ar‑tɛjannt aġrum.

¹⁴ rad‑awn‑ikks maylli ifulkin ġ‑tbḥirin‑nun d‑igran n‑waḍil d‑urtan n‑zzit, ifk‑tn i‑imɛawann‑ns.

¹⁵ rad‑awn‑issitti yat ġ‑kraygatt mrawt ġ‑imndi d‑waḍil, ar‑tn‑yakka i‑imɛawann‑ns d‑imqasan‑ns.

¹⁶ rad‑awn‑yawi ih̬ddamn d‑th̬ddamin d‑willi ifulkin ġ‑iɛyyaln‑nun d‑iġʷyal‑nun, issh̬dm‑tn ġ‑dars.

¹⁷ yawi‑awn ula yat ġ‑kraygatt mrawt n‑uwlli. ra‑twrrim tgm ih̬ddamn‑ns.

¹⁸ han ussan‑an ra‑tssġuyyum f‑ssibt n‑ugllid lli‑tskrm i‑ih̬f‑nun, walaynni ur‑ra‑srun‑isfld sidi rbbi ġ‑uwssan‑an.»

¹⁹ walaynni ur‑rin mddn a‑stt‑awin ġ‑wawal n‑ṣamwil, rarn‑as: «uhu, nra a‑fllanġ‑yili‑ugllid,

²⁰ a‑ng ula nkkʷni zund kullu iqbiln. agllid‑nġ ra‑fllanġ‑iḥkam, ar‑itffuġ ġ‑lgddam‑nġ, ar‑itmmaġ imaġn‑nġ.»

²¹ lliġ isfld ṣamwil i‑kullu iwaliwn n‑mddn, iɛawd‑asn ġ‑umnid sidi rbbi.

²² isawl‑d sidi rbbi s‑ṣamwil yini‑as: «sfld s‑wawal‑nsn, tgt fllasn kra n‑yan d‑ugllid.» yini ilmma ṣamwil i‑ayt‑israyil: «zaydat kraygatt yan iddu s‑tmdint‑ns.»