1 ṣamwil 7 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

¹ aškin‑d ayt‑qiryat‑yɛarim, ssawnn ṣṣnduq n‑lɛhd n‑sidi rbbi, šškšmn‑t s‑tgmmi n‑abinadab lli‑illan ġ‑tuwrirt, ẓlin yus aliɛazr a‑t‑igabl.

² iggut ma‑ikka ṣṣnduq n‑lɛhd ġ‑qiryat‑yɛarim. illa ġin ma‑itggan sin id‑mraw (20) n‑usggʷas zġ‑wass‑an, aylliġ wrrin ayt‑israyil ar‑kullu‑tnuwwaḥn f‑sidi rbbi.

ṣamwil a‑iḥkamn f‑ayt‑israyil

³ isawl ṣamwil s‑kullu ayt‑israyil yini‑asn: «iġ‑tram a‑di‑twrrim s‑sidi rbbi zġ‑ttmi n‑uwl‑nun, ssittyat id‑rbbi iġribn d‑ilahat n‑‹ɛaštarut› zġ‑gratun, trarm ulawn‑nun s‑rbbi da‑illan tqasam‑t waḥdut, s‑kʷn‑ijjnjm zġ‑ufus n‑ayt‑filisṭin.»

⁴ nkrn ayt‑israyil ġakudan ssittin id‑rbbi n‑‹baɛl› d‑‹ɛaštarut›, ar‑tqasan sidi rbbi waḥdut.

⁵ yini‑asn ṣamwil: «ssmunat‑d kullu ayt‑israyil ġ‑miṣfah, ẓẓallġ i‑sidi rbbi ġ‑ljiht‑nun.»

⁶ munn‑d kullu ġ‑miṣfah, agʷmn‑d aman ffin‑tn‑in ġ‑umnid n‑sidi rbbi. aẓumn ass‑an ar‑ttinin: «nskr nkkʷni ma‑yʷh̬šnn bahra ġ‑sidi rbbi.» miṣfah a‑ġ‑a‑itḥkam ṣamwil f‑ayt‑israyil.

⁷ sfldn ayt‑filisṭin is‑munn ayt‑israyil ġ‑miṣfah, awnn srsn iriyasn n‑ayt‑filisṭin. lliġ sfldn ayt‑israyil f‑ġayan, iksaḍn zġ‑ayt‑filisṭin.

⁸ inin ayt‑israyil i‑ṣamwil: «a‑ur‑tbiddt, zayd ar‑taqrat i‑rbbi siditnġ ġ‑ljiht‑nġ baš a‑yġ‑ijjnjm zġ‑ufus n‑ayt‑filisṭin.»

⁹ yawi‑d ṣamwil yan‑ulqqaġ issumumn, issattuy‑t i‑sidi rbbi s‑tġrṣi ijdrn. izayd ṣamwil ar‑yaqra i‑sidi rbbi ġ‑ljiht n‑ayt‑israyil, isfld‑as sidi rbbi.

¹⁰ sul iqama ṣamwil igabl tiġrṣi a‑tjdr, akmurn‑d ayt‑filisṭin ad‑akʷin f‑ayt‑israyil. ġakudan a‑fllasn‑issbbaqi sidi rbbi iggign tjhhdnin, issduyy ayt‑filisṭin, rẓn ġassan ġ‑lgddam n‑ayt‑israyil.

¹¹ ffuġn ayt‑israyil zġ‑miṣfah, ẓẓun ġ‑ayt‑filisṭin ar‑tn‑kkatn aylliġ ruḥn izdar n‑bayt‑kar.

¹² yawi‑d ṣamwil yan‑uẓru imqqurn issbidd‑t ġ‑gr miṣfah d‑šin, ig‑as ism ‹abanɛazr› [tga lmɛna‑ns ‹aẓru n‑lmɛawnt›]. yini: «iɛawn‑aġ sidi rbbi sul s‑ġilad.»

¹³ ḍrn ayt‑filisṭin, ur‑sul‑a‑d‑ssurufn iwtta n‑ayt‑israyil. han afus n‑sidi rbbi iḍaḍḍa ayt‑filisṭin kullu ussan n‑ṣamwil.

¹⁴ wrrin daġ ayt‑israyil ɛmmrn kullu timdinin lli‑asn‑kkisn ayt‑filisṭin, zġ‑ɛaqrun ar gatt, fukkun ula akal‑nsn zġ‑ufus n‑ayt‑filisṭin. tili sslamt ġ‑gr ayt‑israyil d‑ayt‑amur ula ntni.

¹⁵ iḥkam ṣamwil f‑ayt‑israyil kullu ussan n‑tudrt‑ns.

¹⁶ asggʷas ar asggʷas ar‑ittidu ar‑itlulliy ġ‑tmdinin n‑bayt‑il d‑gilgal d‑miṣfah, ar‑issnfaṣal ġ‑gr mddn n‑ayt‑israyil ġ‑tmizar‑an kullutnt.

¹⁷ ar‑d‑ilmma‑itwrri s‑tmdint n‑rama, ašku ġin a‑ġ‑tlla‑tgmmi‑ns. ġin daġ ar‑itḥkam f‑ayt‑israyil, ibnu gis yan‑ukrkur n‑tġrṣi i‑sidi rbbi.