1 ṣamwil 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iwrri‑d ṣṣnduq s‑wakal n‑israyil

¹ ssa n‑iyrn a‑ikka ṣṣnduq n‑sidi rbbi ġ‑tmazirt n‑filisṭin.

² ġrn‑d ilmma ayt‑filisṭin i‑imsakmurn‑nsn d‑išuwwafn‑nsn sqsan‑tn: «ma‑ra‑nskr i‑ṣṣnduq n‑rbbi‑nsn? mlat‑aġ mamnk a‑s‑ra‑t‑nrar s‑udġar‑ns.»

³ inin‑asn: «iġ‑ra‑trarm ṣṣnduq n‑rbbi n‑israyil, a‑ur‑ti‑taznm bla yat. ih̬ṣṣa‑kʷn ad‑as‑tfkm ma‑s‑a‑tfrrum lɛib‑nun. ġmkan a‑s‑ra‑tjjim, tissanm mah̬ aylliġ ur‑n‑fllawn‑yusi afus‑ns.»

⁴ sqsan‑tn: «ma‑rad‑as‑nfk a‑nfru lɛib‑nġ?» inin‑asn: «fkat‑as smmus ibzzagn n‑uwrġ d‑smmus iġrḍayn n‑uwrġ, unšk lli‑gan iriyasn n‑ayt‑filisṭin. ašku kunni d‑iriyasn‑nun, yan‑waṭṭan a‑kʷn‑yutn kullukʷn.

⁵ ih̬ṣṣa‑kʷn a‑tɛdlm kra irwasn ibzzagn‑nun d‑kra irwasn iġrḍayn lli‑išttan kullu tamazirt‑nun, f‑a‑tuqqrm rbbi n‑israyil, a‑ur‑imil issifsas fllawn afus‑ns kunni d‑id‑rbbi‑nun d‑tmazirt‑nun.

⁶ mah̬ a‑sul‑tssiqarm ih̬f‑nun ġmklli‑sttin‑kkan ar‑ssiqarn ayt‑miṣr d‑firɛawn ih̬fawn‑nsn? is‑ur‑ssmsrn mddn‑an tigira n‑ma‑tn‑issrfufn rbbi‑nsn bahra, ffuġn ilmma ddun?

⁷ ġilad awyat‑d yat lkurriṣa n‑ljdid, tawim‑d snat‑tfunasin ssngaynin f‑ur‑jji‑kkin iḥlasn, tqqnm‑asnt lkurriṣa. tawim‑asnt‑d tarwa‑nsnt s‑ugrur.

⁸ tasim‑d ṣṣnduq n‑rbbi‑nsn, tgm‑t f‑lkurriṣa. tskrm yat taṣnduqt ġ‑tama‑ns, tgm gis tiġawsiwin lli‑tɛdlm zġ‑uwrġ lli‑tfkam f‑lɛib‑nun. trẓmm ilmma i‑ṣṣnduq a‑iddu.

⁹ gablat‑t a‑tẓrm mani ra‑ik. iġ‑yiwn d‑uġaras n‑tmazirt‑ns s‑tsga n‑bayt‑šams, tissanm izd rbbi‑nsn a‑d‑fllanġ‑izzugzn tagatin‑ad. iġ‑ur‑iddi s‑ġin, tissanm is‑urd afus‑ns a‑yġ‑yutn, walaynni ġir tiwi‑t‑id luqt.»

¹⁰ skrn ġmkan, awin‑d snat‑tfunasin ssngaynin, qqnn‑tnt i‑lkurriṣa, fln‑in tarwa‑nsnt ġ‑ugrur.

¹¹ gn ṣṣnduq n‑sidi rbbi ġ‑lkurriṣa nttan d‑taṣnduqt lli‑ġ‑llan iġrḍayn n‑uwrġ d‑ibzzagn lli‑ɛdln.

¹² zaydnt‑tfunasin nmnt d‑uġaras s‑tsga n‑bayt‑šams, ur‑unfnt s‑ufasi ula aẓlmaḍ, munnt‑d dids ar‑ssunggunt. ḍfurn‑tnt iriyasn n‑ayt‑filisṭin aylliġ lkmnt iwtta n‑bayt‑šams.

¹³ tizi‑an ayt‑bayt‑šams ar‑mggrn irdn ġ‑uzaġar. lliġ ulln alln‑nsn ẓrn ṣṣnduq n‑lɛhd, frḥn srs bahra.

¹⁴ tzayd lkurriṣa tlkm igr n‑yahušaɛ gu‑bayt‑šams, tbidd gis. illa ġin yan‑uẓru imqqurn. ssfrsin ikššuḍn n‑lkurriṣa, ssattuyn tifunasin s‑usakmur ijdrn i‑sidi rbbi.

¹⁵ zzugzn‑d ayt‑lawi ṣṣnduq n‑sidi rbbi ula taṣnduqt lli‑illan ġ‑tama‑ns, lli‑ġ‑llant‑tġawsiwin n‑uwrġ, srsn‑tn f‑uẓru‑an imqqurn. zaydn ġassan ayt‑bayt‑šams ssattuyn isakmurn jdrnin, ġrṣn i‑tġrṣiw f‑ism n‑sidi rbbi.

¹⁶ lliġ‑tn‑ẓran smmus iriyasn n‑ayt‑filisṭin, wrrin s‑ɛaqrun ġassan.

¹⁷ ġmkad ad‑gan ibzzagn n‑uwrġ lli‑d‑fkan ayt‑filisṭin i‑sidi rbbi ad‑frun lɛib‑nsn. yan iga win ašdud, yan win ġazza, yan win ašqalun, yan win gatt, yan win ɛaqrun.

¹⁸ fkn‑d iġrḍayn n‑uwrġ f‑unšk lli‑gant‑tmdinin n‑smmus iriyasn‑nsn, a‑tnt‑igan d‑tmdinin lli‑mi‑sutln igudar dusnin, ilin iduran ġ‑brra‑nsnt. imma aẓru‑an imqqurn lli‑f‑srsn ṣṣnduq n‑sidi rbbi, iga nttan inigi sul s‑ġassad, illa ġ‑igr n‑yahušaɛ gu‑bayt‑šams.

¹⁹ imma ayt‑bayt‑šams, yut sidi rbbi kra gisn ašku uggʷan‑in agʷns n‑ṣṣnduq n‑sidi rbbi, immt gisn ssa n‑id‑mraw (70) n‑urgaz. ar‑kullu‑allan mddn ašku yut‑tn s‑trẓi išqan.

²⁰ inin ġakudan ayt‑bayt‑šams: «ma‑iẓḍarn a‑ibidd ġ‑umnid n‑sidi rbbi da‑igan wad bahra iṣfan? manis ra‑t‑nazn a‑n‑fllanġ‑yaggug?»

²¹ aznn irqqasn s‑imzdġn n‑qiryat‑yɛarim inin‑asn: «han ayt‑filisṭin rurn‑d ṣṣnduq n‑sidi rbbi. huwwdat‑d tawim‑t‑in s‑darun.»