1 ṣamwil 5 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tgguz‑d tagat f‑ayt‑filisṭin

¹ lliġ umẓn ayt‑filisṭin ṣṣnduq n‑lɛhd n‑rbbi, asin‑t zġ‑abanɛazr s‑tmdint n‑ašdud.

² zaydn ilmma ayt‑filisṭin šškšmn ṣṣnduq n‑rbbi s‑tgmmi n‑rbbi‑nsn ‹dagun›, srsn‑t‑in ġ‑tama n‑dagun.

³ zikk ṣbaḥ, lliġ‑d‑nkrn ayt‑ašdud, afn‑in dagun iḍr‑d s‑wakal f‑uwdm‑ns ġ‑lgddam n‑ṣṣnduq n‑sidi rbbi. alln dagun ġakudan, rarn‑t s‑illiġ yadlli illa.

⁴ ndid azkka nkrn daġ zikk ṣbaḥ, afn‑in dagun iḍr‑d s‑wakal f‑uwdm‑ns ġ‑lgddam n‑ṣṣnduq n‑sidi rbbi, irẓ‑ugayu n‑dagun d‑sin ifassn‑ns, ttrsn kullu f‑lɛtbt n‑tgmmi, ur‑as‑d‑iqama abla ammas‑ns.

⁵ ġayan a‑f‑ur‑a‑ttakʷln imsakmurn n‑dagun d‑mddn yaḍni f‑lɛtbt n‑dagun, ġakud nna‑kšmn s‑tgmmi n‑dagun ġ‑ašdud, sul s‑ġassad.

⁶ iwrri‑ufus n‑sidi rbbi iẓẓay f‑ayt‑ašdud, ar‑tn‑issiwid ar‑tn‑ikkat s‑ibzzagn ġ‑tfiyi‑nsn ġ‑tmdint n‑ašdud d‑iduran‑ns.

⁷ lliġ ẓran ayt‑ašdud ma‑illan, inin: «han a‑ur‑sul‑darnġ‑iqama ṣṣnduq n‑rbbi n‑israyil, ašku išqa‑fllanġ‑ufus‑ns nkkʷni ula rbbi‑nġ dagun.»

⁸ aznn ad‑d‑munn kullu iriyasn n‑ayt‑filisṭin, sqsan‑tn: «ma‑ra‑nskr s‑ṣṣnduq n‑rbbi n‑israyil?» rarn‑d: «a‑ityattay ṣṣnduq n‑rbbi n‑israyil s‑tmdint n‑gatt.» awin ṣṣnduq n‑rbbi n‑israyil ġakudan s‑gatt.

⁹ lliġ‑t‑iwin s‑ġin, iggʷz‑d‑ufus n‑sidi rbbi f‑tmdint‑an, aylliġ kullu duyyn ayt‑tmdint. yut mddn kullutn, willi mqqurnin ula willi mẓẓinin, ar‑ttbzag‑tfiyi‑nsn s‑ibzzagn šqanin.

¹⁰ ṣafḍn daġ ṣṣnduq n‑rbbi s‑tmdint n‑ɛaqrun. ġir ilkm ɛaqrun, ar‑kullu‑ssġuyyun ayt‑ɛaqrun ar‑ttinin: «hati iwin‑d srnġ ṣṣnduq n‑rbbi n‑israyil f‑ad‑aġ‑nġn nkkʷni d‑mddn‑nġ.»

¹¹ aznn daġ ad‑d‑munn kullu iriyasn n‑ayt‑filisṭin, inin‑asn: «ssittyat‑n fllanġ ṣṣnduq n‑rbbi n‑israyil, trarm‑t s‑tmazirt‑ns, a‑ur‑aġ‑inġ nkkʷni d‑mddn‑nġ.» ašku duyyn ayt‑tmdint‑an s‑tawda išqan, iẓẓay‑fllasn‑ufus n‑rbbi bahra.

¹² willi ur‑mmutnin, ttut‑tfiyi‑nsn s‑ibzzagn, tġli‑tġuyit‑nsn ar ignna.