1 ṣamwil 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ayt‑filisṭin umẓn ṣṣnduq n‑lɛhd

¹ awal n‑ṣamwil ar‑itkka kullu akal n‑israyil. izri ma‑izrin, ffuġn ayt‑israyil ad‑mmaġn d‑ayt‑filisṭin, srsn ġ‑dar‑uẓru n‑abanɛazr. ayt‑filisṭin srsn ġ‑tama n‑tmdint n‑afaq.

² ssngaddan ayt‑filisṭin tirubba‑nsn a‑n‑mnaggarn d‑ayt‑israyil. inkr imiġ, ttrẓn ayt‑israyil ġ‑umnid n‑ayt‑filisṭin. ḍrn gisn ma‑itggan kkuẓ id‑walf (4000) n‑urgaz ġ‑udġar‑an ġ‑mmaġn.

³ lliġ‑d‑wrrin ġwilli iqaman ddrn s‑usras, inin imġarn n‑ayt‑israyil: «mah̬ aylliġ‑aġ‑irẓa sidi rbbi ġassad ġ‑umnid n‑ayt‑filisṭin? ftwat a‑d‑nawi ṣṣnduq n‑lɛhd n‑sidi rbbi zġ‑šiluh, a‑yili ġ‑wammas‑nġ a‑yġ‑ijjnjm zġ‑ufus n‑inuwwašn‑nġ.»

⁴ aznn ayt‑israyil ġakudan s‑šiluh ma‑d‑itawin ṣṣnduq n‑lɛhd n‑sidi rbbi n‑lmlayka, lli‑zġ‑iskr lɛrš‑ns ġ‑gr lmh̬luqat tjhhdnin. munn‑d tarwa n‑ɛali ḥufni d‑finḥas ġakudan, awin‑d ṣṣnduq n‑lɛhd n‑rbbi.

⁵ lliġ‑d‑ilkm ṣṣnduq n‑lɛhd n‑sidi rbbi s‑dar‑usras, alln ayt‑israyil awal‑nsn, utn kullu s‑yat‑tġuyit itjhhdn aylliġ iġlaġl‑wakal.

⁶ lliġ sfldn ayt‑filisṭin i‑uqqryan n‑tġuyit, ar‑ssmqsan: «matta ġayd d‑uqqryan d‑tġuyit itjhhdn illan ġ‑usras n‑ayt‑ɛibr?» issann ilmma is‑d‑ilkm ṣṣnduq n‑lɛhd n‑rbbi da‑illan s‑usras.

⁷ iksaḍn ayt‑filisṭin ġakudan ar‑ttinin: «ikšm‑d yan rbbi s‑usras‑nsn.» ar‑ttinin: «taguḍi a‑ra‑yġ‑yili, ašku zund ġayad ur‑jji‑aġ‑ijri.

⁸ taguḍi ayd‑aġ‑illan. ma‑ra‑yġ‑ifukku zġ‑ufus n‑rbbi‑an itjhhdn? rbbi‑an a‑ikkatn ayt‑miṣr s‑kullu kra igan aṭṭan ġ‑lh̬la.

⁹ nkrat zɛmat ay‑ayt‑filisṭin, tgm irgazn. a‑ur‑twrrim tgm ismgan dar ayt‑ɛibr‑an, ġmklli darun gan ntni. gat‑n tirugza‑nun tmmaġm.»

¹⁰ mmaġn ayt‑filisṭin bahra aylliġ rẓan ayt‑israyil, irwl kud yan gisn s‑illiġ izdġ. ar‑tn‑kkatn bahra ar‑tn‑nqqan. ḍrn ġ‑ayt‑israyil kraḍ id‑mraw n‑walf (30 000) n‑urgaz lli‑iftan f‑uḍar.

¹¹ ityamaẓ ṣṣnduq n‑lɛhd n‑rbbi, mmtn ula tarwa n‑ɛali ḥufni d‑finḥas.

lmut n‑ɛali

¹² ha yan zġ‑ayt‑bnyamin yuzzl zġ‑imiġ, yašk‑id ġassan s‑šiluh, ibbi timlsit‑ns izuzzr agdrur f‑ih̬f‑ns.

¹³ lliġ‑d‑ilkm šiluh, ha ɛali igawr f‑lkursi‑ns ġ‑tama n‑uġaras ar‑itql, ašku ar‑itrgigiy‑uwl‑ns f‑ṣṣnduq n‑lɛhd n‑rbbi. lliġ‑n‑ikšm‑urgaz‑lli s‑tmdint, iɛawd‑asn f‑ma‑ijran, ar‑kullu‑ssġuyyun ayt‑tmdint.

¹⁴ isfld ɛali i‑tġuyit isqsa‑tn: «ma‑f‑inkr‑uqqryan‑ad?» yazzl‑d‑urgaz‑an yini‑as‑t.

¹⁵ ɛali ntta dars ṭẓa n‑id‑mraw d‑tam (98) n‑usggʷas, bukḍnt‑as‑walln ur‑sul‑isfaw.

¹⁶ yini‑urgaz‑lli i‑ɛali: «nkkin a‑d‑irwln zġ‑imiġ ġassad.» isqsa‑t: «ma‑gis‑ijran a‑iwi?»

¹⁷ isawl‑d walli‑d‑yiwin lah̬bar yini: «rwln ayt‑israyil ġ‑lgddam n‑ayt‑filisṭin. han mddn‑nġ rẓan tirẓi išqan, ula tarwa‑nk s‑sin ḥufni d‑finḥas mmutn, ityamaẓ ula ṣṣnduq n‑rbbi.»

¹⁸ lliġ ibdr ṣṣnduq n‑rbbi, iḍr‑n ɛali tiġurdin zġ‑lkursi‑ns ġ‑tama n‑imi, irẓ‑umggrḍ‑ns immt, ašku yuwssr nttan d‑iẓẓay. kkuẓ id‑mraw (40) n‑usggʷas a‑iḥkam f‑ayt‑israyil.

¹⁹ tlla‑ġin‑tslit‑ns, tga tamġart n‑finḥas, d‑nttat ar‑trbbu, tqrrb a‑taru. lliġ tsfld is‑ityamaẓ ṣṣnduq n‑rbbi, tsfld ula is‑immut‑ufqqir‑ns d‑urgaz‑ns, yamẓ‑tt‑ungaẓ, tknu s‑wakal taru.

²⁰ aylliġ tfta a‑tmmt inint‑as tilli‑stt‑issarun: «ad‑ur‑tiksaḍt, hati yan‑warraw ayd turut.» imma nttat ur‑asnt‑di‑trur awal ula tiwi‑tt gisnt.

²¹ tg i‑uḥšmi‑an ism ‹ih̬abud›, tini: «ityattay lmajd f‑israyil», ašku ityamaẓ ṣṣnduq n‑lɛhd n‑rbbi, immt‑ula‑ufqqir‑ns d‑urgaz‑ns.

²² tini nttat: «ityattay lmajd f‑israyil» ašku ityamaẓ ṣṣnduq n‑rbbi.