1 ṣamwil 31 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lmut n‑šawl

¹ izri ma‑izrin nkrn‑d ayt‑filisṭin ad‑mmaġn d‑ayt‑israyil. rwln irgazn n‑israyil ġakudan ġ‑lgddam n‑ayt‑filisṭin, tyagasn ḍrn ġ‑udrar n‑gilbuɛ.

² ẓẓun ayt‑filisṭin ġ‑šawl d‑tarwa‑ns, nġn yunatan d‑abinadab d‑malkišuɛ tarwa n‑šawl.

³ ittgli šawl ġ‑imiġ išqan, lkmn‑t‑id id‑bu‑lqus s‑iẓḍkan, ityagas imḥakka bahra.

⁴ yini šawl i‑walli‑as‑itasin imqlad‑ns: «ldi‑d tuzzalt‑nk tkmmlt‑iyi, a‑ur‑d‑aškin id‑bu‑ilmš‑an ar‑gigi‑tazun ssrfufnn‑iyi.» walaynni ur‑iẓḍar bu‑imqlad a‑iskr mayan, ašku iksuḍ bahra. yasi‑d šawl tuzzalt, iḍr‑n fllas.

⁵ bu‑imqlad, lliġ‑t‑iẓra immut, iḍr‑n ula nttan f‑tuzzalt‑ns immt ġ‑tama‑ns.

⁶ ġassan a‑immut šawl d‑tarwa‑ns s‑kraḍ, immt walli‑as‑itasin imqlad ula kullu irgazn lli‑dids‑llanin.

⁷ lliġ fllas sfldn ayt‑israyil ġ‑tsga yaḍni n‑talat‑an, ula willi llanin ġ‑tsga yaḍni n‑wasif n‑urdun, lliġ sfldn is‑immut šawl d‑tarwa‑ns, d‑is‑rwln kullu inmmaġn n‑israyil, nkrn ula ntni fln timdinin‑nsn rwln. aškin‑d ayt‑filisṭin zdġn gisnt.

⁸ ndid azkka aškin‑d ayt‑filisṭin ad‑kššḍn inaġan, afn‑in šawl d‑kraḍ tarwa‑ns ḍrn ġ‑udrar n‑gilbuɛ.

⁹ bbin‑as ih̬f, kksn‑as imqlad‑ns. aznn irqqasn s‑kullu tisgiw n‑wakal n‑filisṭin, ad‑brrḥn s‑lah̬bar ġ‑tgmmi n‑laṣnam‑nsn ula ġ‑dar kullu mddn‑nsn.

¹⁰ srsn‑in imqlad‑ns ġ‑tgmmi lli‑ġ‑a‑tqasan ilaha ‹ɛaštarut›, agʷln ddat‑ns f‑ugadir n‑tmdint n‑bayt‑šan.

¹¹ walaynni lliġ sfldn imzdġn n‑yabiš ġ‑gilɛad f‑ġaylli skrn ayt‑filisṭin i‑šawl,

¹² nkrn‑d imdwas‑nsn, ftun ġ‑iḍ‑an kullut aylliġ lkmn bayt‑šan, zzugzn‑d ddat n‑šawl d‑tin tarwa‑ns zġ‑ugadir n‑bayt‑šan, awin‑tnt‑d s‑tmdint n‑yabiš, jdrn‑tnt gis.

¹³ ssmunn ilmma ih̬ṣan, mḍln‑tn‑in ġ‑ddu‑uṣġar n‑tannayt lli‑illan ġ‑yabiš, aẓumn ssa n‑uwssan.