1 ṣamwil 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ar‑d‑yaqra sidi rbbi i‑ṣamwil

¹ izayd‑uɛzri ṣamwil ar‑itsala tawuri n‑sidi rbbi ġmklli‑as‑imala ɛali. idrus ma‑mi‑d‑ittaški‑wawal n‑sidi rbbi ġ‑uwssan‑an, yidrus ma‑iẓrran ma‑d‑itkkan dar sidi rbbi.

² ġ‑uwssan‑an ign ɛali d‑iyḍ ġ‑tḥanut‑ns. ar‑as‑d‑itnaqaṣ iẓri aylliġ ur‑bahra‑isfaw,

³ walaynni ur‑ta‑ih̬si lqndil n‑rbbi. ign ṣamwil ġ‑ugʷns n‑udġar n‑sidi rbbi ġ‑illiġ illa ṣṣnduq n‑lɛhd.

⁴ iġr‑d sidi rbbi ġakudan i‑ṣamwil. isawl‑d ṣamwil yini: «ha nkki.»

⁵ yazzl s‑dar ɛali yini‑as: «tġrit‑iyi. ha nkki.» irar‑as: «uhu, ur‑ak‑ġriġ a‑iwi. wrri maniġ a‑tggant.» iddu ṣamwil ign.

⁶ iġr‑d daġ sidi rbbi yini: «ṣamwil.» inkr‑d ṣamwil yazzl daġ dar ɛali yini‑as: «tġrit‑iyi‑d. ha nkki.» irar‑as: «uhu, ur‑ak‑ġriġ. wrri maniġ a‑tggant.»

⁷ ṣamwil nttan ur‑ta‑issin sidi rbbi, ur‑ta‑yas‑d‑iban‑wawal‑ns.

⁸ iġr‑as‑d daġ sidi rbbi tis kraṭṭ‑twal. inkr iddu dar ɛali yini‑as: «tġrit‑iyi‑d. ha nkki.» yissan ɛali ġakudan izd sidi rbbi a‑d‑yaqran i‑uɛzri.

⁹ yini ɛali i‑ṣamwil: «zayd maniġ a‑tggant. iġ‑ak‑daġ‑iġra, tinit‑as: ‹sawl a‑sidi rbbi, hay‑ah̬ddam‑nk ar‑isflid.› » iwrri ṣamwil s‑udġar‑ns ign.

¹⁰ yašk‑id sidi rbbi ibidd, iġr‑as‑d zund tiwaliw timzwura yini: «ṣamwil, ṣamwil.» irar‑as ṣamwil yini: «sawl, hay‑ah̬ddam‑nk ar‑isflid.»

¹¹ yini ilmma sidi rbbi i‑ṣamwil: «hati rad‑skrġ ġ‑israyil ma‑ijjhijjiyn imzgan i‑wanna fllas isfldn.

¹² ġassan a‑rad‑ssafuġ i‑ɛali kullu mad‑nniġ f‑warraw‑ns zġ‑isizwur ar isiggʷra.

¹³ ašku ɛlmġ‑t is‑rad‑utġ lɛqubit idumn f‑warraw‑ns f‑ssibt n‑lh̬ʷšanat‑nsn lli‑f‑issn. ašku skrn bdda tarwa‑ns f‑h̬ziyt, d‑nttan ur‑tn‑iḥṣar.

¹⁴ ġayan a‑f‑ggulliġ ġilad i‑ayt‑ɛali, ur‑sar‑ra‑ttyawdal lh̬ʷšant n‑ayt‑ɛali s‑tġrṣi ula tawafka.»

¹⁵ ign ṣamwil aylliġ‑d‑iġli‑wass, irẓm tiflwin n‑tgmmi n‑sidi rbbi. yiksaḍ ṣamwil a‑iml tawaẓrit‑an i‑ɛali.

¹⁶ iġr‑d ɛali i‑ṣamwil yini: «wa iwi ṣamwil.» yini‑as: «ha nkki.»

¹⁷ yini‑as ɛali: «ma‑iga‑wawal lli‑s‑ak‑d‑inna? a‑ur‑t‑flla‑tḥḍut. ad‑ak‑iskr rbbi uggʷar iġ‑flla‑tssntlt yan‑wawal ġ‑ġaylli‑ak‑d‑inna.»

¹⁸ yini‑as ṣamwil ġakudan f‑kullu, ur‑fllas‑iḥḍi yat. yini ilmma ɛali: «sidi rbbi ayan. aynna dars ifulkin, iskr‑t.»

¹⁹ yimġur ṣamwil, yili dids sidi rbbi. d‑sidi rbbi ur‑a‑itadj yan‑wawal n‑ṣamwil a‑iḍr s‑wakal ġ‑kullu ma‑ittini.

²⁰ kullu ayt‑israyil zġ‑ttmi n‑dan ar tin bir‑šibaɛ ssnn is‑iẓli sidi rbbi ṣamwil a‑ig nnabi.

²¹ iban‑d daġ sidi rbbi ġ‑šiluh. s‑wawal‑ns a‑s‑a‑d‑issban sidi rbbi ih̬f‑ns i‑ṣamwil ġ‑šiluh.