1 ṣamwil 24 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

dawd iga šawl ġ‑laman

¹ yan‑wass iwrri‑d šawl zġ‑imiġ d‑ayt‑filisṭin, inin‑as: «han dawd irgs ġ‑lh̬la n‑ɛin‑gadi.»

² yawi šawl kraḍ id‑walf (3000) n‑urgaz itjhhdn zġ‑gr kullu ayt‑israyil, iddu a‑isiggl s‑dawd d‑irgazn‑ns ġ‑dar ‹ijarifn n‑udadn›.

³ lliġ ifta šawl, ilkm dar‑wazrib n‑uwlli, ikšm s‑yan ifri a‑gis‑idl iḍarn‑ns. ttaġ‑d ifri‑an, illa gis dawd d‑irgazn‑ns, gawrn ġ‑iwẓẓa aggugnin ġ‑ugʷns‑ns.

⁴ inin irgazn i‑dawd: «wan ġassad a‑f‑ak‑inna sidi rbbi: ‹rad‑gġ anuwwaš‑nk ġ‑ufus‑nk, a‑gis‑tskrt aynna zġ‑gik ifulkin.› » inkr dawd imatti‑n s‑tntla, ibbi‑d inrfl zġ‑uslham n‑šawl.

⁵ yakʷi‑uwl n‑dawd ġakudan ġ‑iẓra is‑d‑ibbi inrfl n‑uslham i‑šawl.

⁶ yini i‑irgazn‑ns: «a‑yyi‑iḥṣar sidi rbbi a‑ur‑skrġ ġayan i‑sidi‑ad igan amẓġur n‑rbbi da‑illan. ad‑ur‑fllas‑allġ afus‑inu, lliġd amẓġur n‑sidi rbbi a‑iga.»

⁷ issbidd dawd irgazn‑ns s‑wawal‑an, a‑ur‑n‑akʷin f‑šawl. imma šawl iffuġ zġ‑ifri a‑ikmml f‑uġaras‑ns.

⁸ iḍfur‑t dawd ġakudan s‑brra n‑ifri, iġr i‑šawl yini: «wa sidi agllid.» igrawl‑d šawl tiġurdin. yutš dawd ġakudan f‑ifaddn‑ns, issknu udm‑ns ar akal,

⁹ isawl dawd yini‑as: «mah̬ a‑tsflidt s‑mddn lli‑ak‑ittinin: ‹han dawd ira a‑k‑ihlk›?

¹⁰ ġassad tẓrit s‑walln‑nk mamnk a‑k‑ifka sidi rbbi ġ‑ufus‑inu ġ‑ifri. nnan‑iyi irgazn‑inu a‑k‑nġġ, walaynni ḥnnaġ gik iniġ ‹ur‑rad‑allġ afus‑inu f‑sidi, ašku iga amẓġur n‑rbbi da‑illan.›

¹¹ mnad‑d a‑baba, tẓrt‑d inrfl n‑uslham‑nk ġ‑ufus‑inu. ha‑yyi bbiġ‑ak‑d inrfl n‑uslham‑nk, ur‑k‑nġiġ kiyi, baš a‑tissant ġilad, tfhmt is‑ur‑gik‑qṣadġ kra n‑ššrr ula kra n‑tkndawt. ur‑dik‑ʷh̬šinġ s‑yat, wah̬h̬a tgʷmmrt tudrt‑inu.

¹² a‑iḥkam sidi rbbi ġ‑griyi dik, yamẓ‑iyi gik lḥqq. nkki han ur‑ra‑n‑srk‑gġ afus.

¹³ ġmklli nnan willi zrinin: ‹uh̬ššin a‑d‑itkka ma‑yʷh̬šnn.› s‑ṣṣaḥt afus‑inu ur‑sar‑k‑ilkim.

¹⁴ ma‑f‑d‑iffuġ‑ugllid n‑israyil? ma‑ġ‑tẓẓit ġilad? is‑urd aydi immutn? is‑urd aggurdi?

¹⁵ a‑fllanġ‑ig sidi rbbi lqaḍi, issnfaṣal ġ‑griyi dik. a‑iġli s‑tġawsa‑nu, izzga lḥqq‑inu, ifukku‑yyi zġ‑ufus‑nk.»

¹⁶ ġir ikmml dawd iwaliwn‑an, isqsa‑t šawl: «izd awal‑nk ayan a‑iwi dawd?» yall awal‑ns ar‑yalla.

¹⁷ yini ilmma šawl i‑dawd: «tṣlaḥt kiyi uggʷar‑inu, ašku nkki ar‑gik‑skarġ ma‑yʷh̬šnn, kiyi ar‑iyi‑ti‑ttrarat s‑ufulki.

¹⁸ ġassad tmlit‑iyi mamnk a‑gigi‑tskrt afulki, ašku yiwi‑yyi‑n sidi rbbi ar afus‑nk, sul ur‑iyi‑tnġit.

¹⁹ wanna yumẓn anuwwaš‑ns, is‑rad‑as‑irẓm s‑laman? ad‑ak‑ih̬llṣ sidi rbbi s‑lh̬ir f‑ufulki‑ad gigi tskrt ġassad.

²⁰ ssnġ ġilad izd s‑ṣṣaḥt ra‑tgt agllid, tzga‑tgldit n‑israyil f‑ufus‑nk.

²¹ ggall‑iyi ġilad s‑sidi rbbi ur‑tfnnut amud‑inu tigira‑inu, ula tsfiḍt ism‑inu zġ‑tasut n‑id‑baba.»

²² iggall dawd i‑šawl ġakudan. iddu šawl s‑tgmmi‑ns. imma dawd d‑irgazn‑ns wrrin daġ s‑illiġ rgsn ġ‑ijarifn.