1 ṣamwil 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tawuri n‑uḥšmi ṣamwil

¹¹ iwrri‑d ilmma alqanah s‑tgmmi‑ns ġ‑rama. iqama‑n‑uḥšmi ar‑itsala tawuri n‑sidi rbbi ġ‑dar‑umsakmur ɛali.

¹² tarwa n‑ɛali gan id‑bu‑ijrman, ur‑ssinn sidi rbbi.

¹³ skrn yat‑tnbaṭṭ a‑tili ġ‑gr imsakmurn d‑mddn, tga ġmka. wanna iġrṣn i‑kra n‑tġrṣi, sul a‑tnggʷa‑tfiyi ġ‑waman, ar‑di‑ttaški‑uɛyyal n‑umsakmur yasi‑d yat tazzrt ġ‑llan kraḍ ikawḍn.

¹⁴ ar‑n‑srs‑ikkat ġ‑uruku, ig‑iyt ikin nġd agdur nġd ṭṭnjra. aynna‑di‑tusi tazzrt‑an, yawi‑t i‑umsakmur. ġmkan ad‑skarn ġ‑šiluh i‑kullu mddn n‑ayt‑israyil lli‑d‑darsn‑ittaškin.

¹⁵ d‑kra yaḍni, wanna iġrṣn, ur‑ta‑ijdir tadunt, ar‑d‑srs‑ittaški yus n‑umsakmur yini‑as: «ara tifiyi a‑stt‑iššwi‑umsakmur, ašku ur‑ra‑iqbl tifiyi inwan ġ‑waman. ira tifiyi ur‑inwin.»

¹⁶ iġ‑as‑inna‑urgaz‑an: «ql ard tjdr tadunt, tasit ilmma unšk nna‑trit», irar‑as: «uhu, fk‑iyi‑tt ġil ġil, nġd a‑stt‑awiġ s‑ifaddn.»

¹⁷ han tarwa n‑ɛali ffuġn aġaras bahra ġ‑iẓri n‑sidi rbbi, ašku ḥgrn ma‑ityawfkan i‑sidi rbbi.

¹⁸ ṣamwil ar‑itqasa tawuri‑ns ġ‑umnid n‑sidi rbbi, ig aḥšmi yagsn s‑tbannka n‑lkttan n‑umsakmur.

¹⁹ kraygatt asggʷas ar‑as‑tskar innas yan‑uqššab imẓẓin, ar‑as‑ti‑di‑ttawi ġakud nna‑tiwn nttat d‑urgaz‑ns ad‑ġrṣn i‑tġrṣi n‑usggʷas.

²⁰ ɛali ar‑itdɛu s‑lbaraka i‑alqanah d‑tmġart‑ns tizi‑an, ar‑as‑ittini: «ad‑ak‑ifk sidi rbbi tarwa ġ‑tmġart‑ad. ad‑ak‑ih̬lf arraw lli‑tẓli nttat i‑sidi rbbi.» wrrin ilmma s‑tgmmi‑nsn.

²¹ ibark sidi rbbi ġ‑ḥanna, tzayd ar‑trbbu, taru sul kraḍ ifrh̬an d‑snat‑tfrh̬in. ar‑ittimġur‑uḥšmi ṣamwil ġ‑umnid n‑sidi rbbi.

²² imma ɛali yuwssr bahra, ar‑isflid f‑kullu mad‑skarn tarwa‑ns i‑kullu mddn n‑ayt‑israyil. yissan ula is‑a‑ggan ntni d‑tmġarin lli‑iskarn tawuri ġ‑dar imi n‑uh̬iyyam n‑umnaggar.

²³ yini‑asn: «mah̬ a‑tskarm ġmkan? han ar‑sflidġ ġ‑dar kullu mddn f‑tillay‑nun ʷh̬šnnin.

²⁴ uhu a‑tarwa‑nu, ur‑fulkin lah̬bar‑ad fllawn ttinin ayt‑sidi rbbi.

²⁵ iġ‑itɛdda yan f‑bnadm, ra‑tn‑issnfaṣal rbbi, walaynni iġ‑itɛdda yan f‑sidi rbbi, manwa ra‑tn‑issnfaṣal?» walaynni agʷin ad‑sfldn s‑babatsn, ašku sidi rbbi iqṣad fllasn lmut.

²⁶ imma aḥšmi ṣamwil ar‑itzayad ġ‑tiddi ula ġ‑rrḍa dar sidi rbbi ula mddn.

awal n‑rbbi f‑tarwa n‑ɛali

²⁷ yašk‑id yan‑uh̬ddam n‑rbbi s‑dar ɛali yini‑as: «ha ma‑inna rbbi da‑illan: ‹is‑ur‑a‑n‑ssbayyanġ ih̬f‑inu i‑jddik [harun] d‑warraw‑ns, ġakud lliġ sul llan ġ‑miṣr ġ‑ddu‑ufus n‑firɛawn?

²⁸ is‑ur‑t‑ẓliġ nttan zġ‑gr kullu tiqbilin n‑ayt‑israyil, ad‑iyi‑ig amsakmur iġli s‑dar tisi‑nu n‑tġrṣi ar‑itbh̬h̬ar, ar‑yaggs s‑ubannka n‑tkššuḍin ġ‑umnid‑inu? hati ayt‑dars n‑babak a‑mi‑fkiġ taġamt ġ‑kullu tiwafkiw jdrnin lli‑ssakmurn ayt‑israyil.

²⁹ mah̬ a‑ttḥgarm tiġrṣiw d‑twafkiw lli‑f‑uṣṣaġ ad‑ilint ġ‑udġar‑inu? mah̬ a‑tssimġurt tarwa‑nk flla, ar‑ttasim igzman šwanin zġ‑kullu tiwafkiw n‑mddn‑inu n‑ayt‑israyil baš a‑srsnti‑tssḍnaym ih̬fawn‑nun?›

³⁰ hati inna‑yak sidi rbbi n‑israyil: ‹ġayd izrin qawlġ f‑warraw‑nk d‑warraw n‑jddik is‑rad‑bdda‑kššmn ar‑tffuġn ġ‑umnid‑inu.› imma ġilad inna‑yak sidi rbbi: ‹han yaggug flla mayan. ašku willi‑yyi‑ituqqarn a‑ra‑tuqqarġ. d‑willi‑yyi‑iḥgrn, ur‑rad‑dari‑gn yat.

³¹ han rad‑d‑aškin‑uwssan ġ‑rad‑kksġ imdwas‑nk d‑win‑warraw n‑jddik, a‑ur‑sul‑gisn‑yili yan ilkmn tawssrt.

³² tizi‑an n‑tnukmut, ra‑tmnadt s‑ṭiṭṭ yʷh̬šnn ġ‑tmih̬ar lli‑ra‑ityawfka i‑ayt‑israyil, imma arraw‑nk ur‑sar‑ra‑gisn‑iqama ma‑ituwssurn.

³³ ġir yan giwn a‑ur‑rad‑kksġ zġ‑dar‑udġar n‑tġrṣiw‑inu. nttan ra‑t‑adjġ ad‑bukḍnt‑walln‑ns s‑imṭṭawn, ityagas‑ula‑uwl‑ns s‑tguḍiwin, ašku rad‑mmtn kullu tarwa n‑warraw‑nk s‑uwzzal n‑bnadm.

³⁴ rad‑ak‑tban‑tmatart‑an ġ‑ma‑ra‑ijru i‑sin tarwa‑nk ḥufni d‑finḥas, ašku rad‑mmtn s‑sin ġ‑yan‑wass.

³⁵ rad‑skrġ i‑ih̬f‑inu yan‑umsakmur iṣlaḥn. ra‑iskar s‑ma‑illan ġ‑uwl‑inu d‑ih̬f‑inu. rad‑zzgaġ tasut n‑wamud‑ns, ar‑bdda‑ikššm ar‑itffuġ ġ‑umnid n‑walli ẓẓġurġ nkki.

³⁶ kullu wanna‑d‑iqaman ġ‑wamud‑nk ra‑d‑dars‑yašk, iknu iḍalb‑as yan‑uqarid n‑nnʷqrt nġd yat‑tngult n‑uġrum yini: ġir adj‑yyi ad‑skarġ kra ġ‑twuri n‑imsakmurn ma‑f‑a‑šttaġ imikk n‑uġrum.› »