1 ṣamwil 19 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

inuwwa šawl a‑inġ dawd

¹¹ yazn šawl kra n‑irqqasn s‑tgmmi n‑dawd a‑t‑ḍufn, baš a‑t‑inġ zikk ṣbaḥ. tini‑as‑tmġart‑ns mikal: «iġ‑ur‑tnjmt s‑tudrt‑nk ġ‑iḍ‑ad, ra‑k‑nġn azkka.»

¹² tzzugz‑t mikal zġ‑yan‑warryaḥ, irwl injm.

¹³ tasi‑d mikal yan laṣnam n‑tgmmi, tsrs‑t ġ‑tisi, tg yat lmh̬dda n‑ššɛr n‑waġaḍ dar ih̬f‑ns, tdl‑tt s‑ufawwu.

¹⁴ yazn šawl kra n‑irqqasn ad‑amẓn dawd, imma mikal trur‑asn‑d: «han yaġ‑t kra.»

¹⁵ yazn daġ šawl irqqasn a‑n‑aggʷn s‑dawd, yini‑asn: «awyat‑t‑id f‑tisi‑ns baš a‑t‑nġġ.»

¹⁶ lliġ kšmn irqqasn, afn‑in laṣnam f‑tisi, d‑lmh̬dda n‑ššɛr ġ‑dar ih̬f‑ns.

¹⁷ yini šawl i‑mikal: «mah̬ a‑yyi‑tšmtt trẓmt i‑unuwwaš‑inu aylliġ injm?» trar‑d mikal i‑šawl: «hati inna‑yyi: ‹adj‑iyi ad‑dduġ. mah̬ aylliġ ra‑km‑nġġ kmmi?› »

¹⁸ irwl dawd injm, iddu s‑dar ṣamwil ġ‑rama, yini‑as f‑kullu mad‑as‑iskr šawl. iddu nttan d‑ṣamwil, qaman ġ‑nayut.

¹⁹ ityawnna i‑šawl: «han dawd illa ġ‑nayut ġ‑rama.»

²⁰ yazn šawl kra n‑irqqasn ad‑amẓn dawd. imil mnaggarn ntni yat‑trabbut n‑lanbiya ar‑sawaln s‑mad‑asn‑imala rbbi, izwur‑asn ṣamwil. igguz‑d rruḥ n‑rbbi f‑irqqasn n‑šawl ar‑sawaln ula ntni s‑mad‑asn‑imala rbbi.

²¹ lliġ isfld šawl f‑mayan, yazn irqqasn yaḍni, s‑a‑sawaln ula ntni s‑mad‑asn‑imala rbbi. yazn daġ šawl irqqasn yaḍni tis kraṭṭ‑twal, ar‑daġ‑sawaln ula ntni s‑mad‑asn‑imala rbbi.

²² iddu ilmma ula nttan s‑rama, ilkm tanuḍfi imqqurn lli‑illan ġ‑sih̬u, isqsa‑tn: «maniġ illa ṣamwil d‑dawd?» inin‑as: «hatnin ġ‑nayut ġ‑rama.»

²³ izayd s‑nayut ġ‑rama, iggʷz‑d fllas rruḥ n‑rbbi ula nttan. lliġ a‑ifttu ġ‑uġaras, ar‑isawal s‑mad‑as‑imala rbbi, aylliġ ilkm nayut ġ‑rama.

²⁴ ikks ula nttan timlsa‑ns, izayd ar‑isawal ġ‑umnid n‑ṣamwil s‑mad‑as‑imala rbbi. iġrḍ f‑wakal bla timlsit, ik azal ula iḍ ġmkan. mayan a‑f‑a‑ttinin mddn: «izd ula šawl iga zġ‑lanbiya?»