1 ṣamwil 18 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tiddukkʷla ngr dawd d‑yunatan

¹ lliġ izri‑wawal‑an ġ‑gr dawd d‑šawl, iɛzzu dawd dar yunatan zund ih̬f‑ns, iwrri iga amddakkʷl‑ns s‑rruḥ d‑rruḥ.

² yawi‑t šawl ġassan, ur‑sul‑t‑yudji a‑iwrri s‑tgmmi n‑babas.

³ iskr yunatan lɛhd ġ‑gras d‑dawd ašku iɛzza dars zund ih̬f‑ns.

⁴ ikks‑d yunatan aslham‑ns ifk‑t i‑dawd, ifk‑as ula timlsa‑ns n‑imiġ, d‑uwzzal‑ns d‑lqus d‑taggʷst‑ns.

⁵ izayd dawd ar‑itffuġ s‑imiġ, ar‑itnjaḥ ġ‑kraygatt manis‑t‑yuzn šawl. ig‑t ilmma d‑ih̬f f‑inmmaġn. ifulki mayan ġ‑iẓri n‑kullu mddn, ifulki ula ġ‑iẓri n‑imɛawann n‑šawl.

yusi šawl tanuwwašt f‑dawd

⁶ ġakud lliġ‑d‑wrrin irgazn s‑darsn, iwrri‑d dawd ula nttan zġ‑tnaġa n‑gu‑filisṭin, ffuġnt‑d‑tmġarin zġ‑kullu timdinin n‑israyil ar‑ttirirnt ar‑tḥušnt, baš a‑d‑mnaggarnt d‑ugllid šawl, ar‑kullu‑tfraḥnt s‑illuna d‑id‑rribab.

⁷ allnt awal‑nsnt ar‑tnjawabnt i‑ngratsnt: «šawl inġa id‑walf‑ns, dawd inġa mraw n‑id‑walf.»

⁸ ibzg šawl f‑wawal‑an, iqama‑gis bahra, yini d‑ih̬f‑ns: «fkant i‑dawd mraw n‑id‑walf, fknt‑iyi ġir id‑walf. ur‑as‑iqama abla tagldit?»

⁹ zġ‑ġassan a‑itmnad šawl dawd s‑gar ṭiṭṭ.

¹⁰ ndid azkka tašk‑id daġ rruḥ yʷh̬šnn zġ‑dar rbbi s‑šawl, ar‑issġuyyu ġ‑ugʷns n‑tgmmi‑ns. dawd ar‑as‑itggr i‑luṭar, ġmklli‑as‑iskar ass f‑wass. imma šawl, illa dars yan‑uḥriš ġ‑ufus‑ns.

¹¹ imil inkr šawl iluḥ aḥriš, yini d‑ih̬f‑ns: «rad‑qqnġ dawd ġ‑uġʷrab.» yanf‑as ġakudan dawd snat‑twal.

¹² hati šawl iksuḍ zġ‑dawd, ašku dawd, illa dids sidi rbbi, ifl‑t nttan.

¹³ ikks‑t ilmma šawl zġ‑tgmmi‑ns, ig‑t d‑ih̬f f‑walf n‑unmmaġ. izayd dawd ar‑itffuġ s‑imiġ ar‑d‑ikššm ġ‑iẓri n‑mddn.

¹⁴ ar‑itnjaḥ dawd ġ‑kullu ma‑iskar, ašku illa dids sidi rbbi.

¹⁵ lliġ‑t‑iẓra šawl ar‑bdda‑itnjaḥ, iwrri iġuwḍ zġ‑gis.

¹⁶ walaynni ayt‑israyil d‑ayt‑yahuda kullutn, iɛzza darsn dawd, ašku ẓran‑t ar‑itffuġ s‑imiġ ar‑d‑ikššm.

dawd itahl illis n‑šawl

¹⁷ yini ilmma šawl i‑dawd: «ha illi tifh̬ddit mayrab, rad‑ak‑tt‑fkġ a‑tg tamġart‑nk. walaynni riġ‑k a‑tgt iwi izɛmn, tmmaġt imaġn n‑sidi rbbi.» ašku šawl inna d‑ih̬f‑ns: «yuf a‑ittut f‑ufus n‑ayt‑filisṭin, ula ittut f‑ufus‑inu.»

¹⁸ yini dawd ġakudan i‑šawl: «mad‑giġ nkki, d‑mad‑gan ayt‑dari ula tagʷmat n‑baba ġ‑gr ayt‑israyil, aylliġ rad‑gġ nkki aḍggʷal i‑ugllid?»

¹⁹ walaynni lliġ tlkm tizi a‑ttfk mayrab illis n‑šawl i‑dawd, ttfk ġakudan i‑ɛadriyal gu‑maḥulah a‑tg tamġart‑ns.

²⁰ imma mikal illis yaḍni n‑šawl, nttat ar‑ttiri dawd. lliġ fllas isfld šawl, iɛjb‑t mayan.

²¹ yini šawl d‑ih̬f‑ns: «ad‑as‑tt‑fkġ a‑ur‑imil tg lɛwin ġ‑tẓqqurt n‑ayt‑filisṭin a‑t‑amẓn.» izayd šawl yini daġ i‑dawd: «ra‑tgt aḍggʷal‑inu ġila.»

²² yuṣṣa šawl imɛawann‑ns ad‑sawln s‑dawd ġ‑tntla inin‑as: «hay‑agllid ifrḥ srk, tɛzzat ula dar kullu imɛawann‑ns. ra‑tgt aḍggʷal ġilad i‑ugllid.»

²³ ġmkan a‑s‑a‑n‑tmšmušn imɛawann n‑šawl ġ‑imẓgan i‑dawd. irar‑asn: «is‑tġalm is‑irh̬a ad‑gġ aḍggʷal i‑ugllid? nkki ur‑giġ wad iṭṭafn ayda ula ššan.»

²⁴ ddun imɛawann dar šawl inin‑as: «ha ma‑ittini dawd, inna ġmkad d‑ġmkad.»

²⁵ yini‑asn šawl: «inyat i‑dawd: ‹han agllid ur‑a‑gik‑isiggil tamrwast abla miyya n‑ilmš n‑ayt‑filisṭin, baš a‑ištfu‑ugllid ġ‑inuwwašn‑ns.› » šawl, ikka gis ntta a‑issknuki dawd f‑ufus n‑ayt‑filisṭin.

²⁶ imma dawd, lliġ isfld i‑mad‑nnan imɛawann, irḍu bahra a‑ig aḍggʷal i‑ugllid.

²⁷ ur‑ta‑tzri luqt, iddu dawd, yawi dids irgazn‑ns, inġ sin id‑miyya (200) ġ‑ayt‑filisṭin, yasi‑d ilmšan‑nsn i‑ugllid, isrs‑as ġunšk lli‑ira, baš a‑ig aḍggʷal‑ns. ifk‑as šawl illis mikal ġakudan a‑tg tamġart‑ns.

²⁸ walaynni lliġ iẓra šawl is‑illa sidi rbbi d‑dawd, yissan ula is‑a‑ti‑ttiri illis mikal,

²⁹ yiksaḍ zġ‑dawd s‑uggʷar, yasi fllas tanuwwašt kullu ussan n‑tudrt‑ns.

³⁰ ar‑di‑tffuġn iriyasn n‑ayt‑filisṭin ad‑ssnkarn imiġ. ġakud nna‑d‑ffuġn, ar‑tn‑itnru dawd uggʷar n‑kullu iriyasn n‑šawl, aylliġ iwrri ism‑ns ityawssan bahra.