1 ṣamwil 17 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

imiġ d‑ayt‑filisṭin

¹ ssmunn ayt‑filisṭin ikabarn‑nsn i‑imiġ, munn kullu ġ‑sukuh ġ‑wakal n‑yahuda, srsn‑d ġ‑afas‑dammim lli‑illan ġ‑gr sukuh d‑ɛziqah.

² imun šawl d‑irgazn n‑israyil ula ntni, srsn ġ‑uzaġar n‑aylah. ssngaddan tirubba‑nsn ad‑mmaġn d‑ayt‑filisṭin.

³ biddn‑in ayt‑filisṭin ġ‑ugsar‑an, biddn‑d ayt‑israyil ġ‑ugsar‑ad, tili talat ġ‑gratsn.

⁴ iffuġ‑d yan‑unmmaġ zġ‑usras n‑ayt‑filisṭin, ism‑ns gulyat gu‑gatt. iġzzif s‑kraḍ id‑mitru.

⁵ ig yan‑usddul n‑wanas i‑ih̬f. ils yan‑ubannk ittɛdln zġ‑ikrḍn n‑wanas i‑idmarn‑ns, yili ġ‑ubannk‑an ma‑itggan smmus id‑mraw (50) n‑kilu.

⁶ tiġanimin n‑iḍarn‑ns, isutl‑asnt‑wanas. yagʷl yan iẓḍi n‑wanas ġ‑gr‑tġʷraḍ‑ns.

⁷ tirgġt n‑uḥriš‑ns tga zund tifggigt n‑uṣṭṭa, ssa n‑id‑kilu n‑uwzzal a‑illan ġ‑ih̬f n‑uḥriš‑an. izwur‑as‑d walli‑as‑d‑itasin amsntl‑ns.

⁸ ibidd nttan yall awal‑ns iġr‑d i‑ikabarn n‑ayt‑israyil yini: «mah̬ a‑di‑tffuġm tssngaddam tirubba‑nun i‑imiġ? is‑urd nkki a‑igan gu‑filisṭin, tgm kunni imqasan n‑šawl? styat giwn yan‑urgaz a‑d‑ihuwwd s‑dari.

⁹ iġ‑iẓḍar a‑didi‑immaġ inġ‑iyi, ng darun imqasan. iġ‑t‑nriġ nġġ‑t, tgm darnġ imqasan tqasam‑aġ.»

¹⁰ izayd iġr‑asn‑d gu‑filisṭin yini: «ha‑yyi ar‑rggmġ ġ‑ikabarn n‑israyil ġassad. fkat‑iyi‑d yan‑urgaz a‑nmmaġ nkki dids.»

¹¹ lliġ isfld šawl d‑ayt‑israyil kullutn i‑wawal n‑gu‑filisṭin‑an, ʷggdn iksaḍn bahra.

¹² imma dawd iga yus n‑yan gu‑afrata lli‑izdġn ġ‑bitlaḥm ġ‑yahuda, ism‑ns yassa. yuwssr yassa ġ‑uwssan n‑šawl, imqqur ġ‑lɛmr‑ns, ilin dars tam tarwa.

¹³ kraḍ imzwura ġ‑tarwa n‑yassa ḍfurn šawl s‑imiġ. ismawn n‑kraḍ tarwa‑ns lli‑iddan s‑imiġ, iga ifh̬ddi‑ns aliyab, iwala‑t‑in abinadab, ig wis kraḍ šammah.

¹⁴ imma dawd iga walli kullu gisn imẓẓin. kraḍ lli‑gisn‑mqqurnin a‑iḍfurn šawl.

¹⁵ imma dawd imyur a‑d‑itkka dar šawl, ar‑daġ‑itwrri a‑ikssa ulli n‑babas ġ‑bitlaḥm.

¹⁶ gu‑filisṭin‑an, kkuẓ id‑mraw (40) n‑wass a‑d‑itffuġ, ar‑d‑itbiddad ġakud nna‑di‑tġli tafukt ula ġakud nna‑truḥ.

¹⁷ yini yassa i‑yus dawd: «awi i‑aytmak lɛbrt‑ad n‑trufin, d‑mrawt‑tngwal‑ad, tḥarrut s‑dar aytmak ġ‑usras.

¹⁸ tawit ula mrawt tikkilin qqurnin, tfkt‑tnt i‑uriyas n‑inmmaġn. tẓrt mamnk ad‑gan aytmak, tawit‑iyi‑d kra n‑tmatart zġ‑gisn.»

¹⁹ llan ntni d‑šawl d‑kullu inmmaġn n‑israyil ġ‑uzaġar n‑aylah f‑ad‑mmaġn d‑ayt‑filisṭin.

²⁰ inkr‑d dawd zikk ṣbaḥ, ifl ulli‑ns i‑ungabal, yawi lɛwin iddu ġmklli‑t‑yuṣṣa babas. lliġ‑n‑ilkm asras n‑inmmaġn, yaf‑tn‑in skrn f‑ad‑ffuġn s‑imiġ ar‑tġuwwatn s‑wawal n‑imiġ.

²¹ ngaddant‑trubba n‑ayt‑israyil, ngaddant ula tin ayt‑filisṭin, ngabaln ikabarn‑nsn s‑sin.

²² ifl dawd lɛwin lli‑d‑yiwi ġ‑dar‑waḍaf n‑ifškan, yazzl s‑dar inmmaġn, yaf‑n aytmas isqsa‑tn f‑sslamt‑nsn.

²³ sul a‑didsn‑isawal s‑had anmmaġ gu‑filisṭin ism‑ns gulyat gu‑gatt, iffuġ‑d zġ‑gr‑trubba n‑ayt‑filisṭin, iɛawd daġ i‑wawal‑an ġmklli imyur. isfld‑as dawd.

²⁴ kullu ayt‑israyil, lliġ ẓran anmmaġ‑an iksaḍn bahra ar‑zġ‑gis‑rggʷln.

²⁵ ar‑ttinin ayt‑israyil: «is‑tẓram argaz‑ad ar‑d‑ittaški ar‑d‑irggm ayt‑israyil? han wanna‑t‑inġan, ra‑t‑iġnu‑ugllid s‑lmal ijfan, ifk‑as illis, irẓm i‑ayt‑dar babas zġ‑ḍḍabiyt n‑israyil.»

²⁶ isqsa dawd irgazn lli‑ibiddn ġ‑tama‑ns: «ma‑ra‑yili i‑urgaz nna‑inġan gu‑filisṭin‑an, issitti lɛar f‑ayt‑israyil? ašku ma‑iga gu‑filisṭin‑an bu‑ilmš indsn aylliġ a‑irggm ikabarn n‑rbbi iddrn?»

²⁷ ɛawdn‑as‑d mddn‑an zund iwaliwn imzwura inin‑as: «mayan a‑ra‑yili i‑wanna‑t‑inġan.»

²⁸ isfld gʷmas imqqurn aliyab i‑ma‑inna i‑irgazn‑an, ibzg aliyab f‑dawd yini: «mah̬ aylliġ‑di‑thuwwdt s‑ġid? ma‑mi‑n‑tflt imikk‑an n‑uwlli ġ‑lh̬la? nkki ssnġ lbsalt‑nk ula nniyt yʷh̬šnn n‑uwl‑nk. trit ġir a‑tẓrt imiġ, ġayan a‑f‑di‑thuwwdt.»

²⁹ yini‑as dawd: «mad‑skrġ ġila? is‑ur‑izri ad‑sqsaġ?»

³⁰ igllb dawd s‑dar yan yaḍni, isqsa‑t wan asqsi‑an, ɛawdn‑as‑d mddn‑an zund wiyyaḍ.

³¹ lliġ sfldn i‑wawal n‑dawd, iddu kra gisn ibdr‑t i‑šawl, iġr‑as‑d s‑dars.

³² yini dawd i‑šawl: «a‑ur‑itġaša‑uwl n‑yan f‑ssibt‑ns. amqasa‑yad‑nk a‑ra‑iddu immaġ d‑gu‑filisṭin‑an.»

³³ yini šawl i‑dawd: «ur‑tẓḍart a‑tbiddt ġ‑lgddam n‑gu‑filisṭin‑an tmmaġt dids, ašku ġir aɛzri sul imẓẓin a‑tgit, imma nttan anmmaġ a‑iga zġ‑mẓẓiy‑ns.»

³⁴ walaynni izuyd dawd yini i‑šawl: «wa sidi ar‑kssaġ ulli n‑baba. ġakud nna‑d‑yuška izm nġd ddubb a‑ikks yat zġ‑tuwrut,

³⁵ ẓẓuġ gis utġ‑t, kksġ‑as‑tt‑id zġ‑imi‑ns. iġ‑d‑flla‑yukʷi, amẓġ‑t zġ‑tamart‑ns utġ‑t nġġ‑t.

³⁶ nġiġ a‑sidi izmawn d‑ddubbat. han gu‑filisṭin‑an bu‑ilmš ra‑ig zund ntni, ašku irgm ġ‑ikabarn n‑rbbi iddrn.»

³⁷ izayd dawd yini: «sidi rbbi lli‑yyi‑d‑ifukkan zġ‑waskarn n‑izm ula zġ‑waskarn n‑ddubbat a‑ra‑yyi‑ifukku zġ‑ufus n‑gu‑filisṭin.» yini šawl ġakudan i‑dawd: «zayd a‑dik‑yili sidi rbbi.»

³⁸ inkr šawl issls timlsa‑ns n‑imiġ i‑dawd, ig‑as asddul n‑wanas f‑ih̬f, ig‑as abannk ittɛdln zġ‑ikrḍn n‑wanas.

³⁹ izayd dawd ibkis s‑tuzzalt n‑šawl f‑iggi n‑tmlsa‑yan. yiri a‑iftu s‑ur‑iẓḍar ašku ur‑imyur mayan. yini i‑šawl: «han ur‑ẓḍarġ ad‑ftuġ s‑mayad, ašku ur‑t‑myurġ.» ikks‑tn dawd ġakudan.

⁴⁰ yasi akuray‑ns ġ‑ufus, isti smmus igʷntrn n‑uẓru zġ‑talat, ig‑tn ġ‑uġʷlaf n‑tqʷrabt‑ns n‑umksa. yasi ildi ġ‑ufus‑ns, iddu s‑dar gu‑filisṭin.

dawd iffuġ a‑immaġ d‑gulyat

⁴¹ iftu‑d gu‑filisṭin yakmur‑d s‑dar dawd, izwur‑as‑d walli itasin amsntl‑ns.

⁴² lliġ iẓra dawd iḥgr‑t, ašku ġir aɛzri a‑iga, iṣfu llun‑ns, ifulki i‑iẓri.

⁴³ isawl‑d gu‑filisṭin s‑dawd yini‑as: «is‑giġ aydi aylliġ‑d‑sri‑tusit ikurayn?» izayd gu‑filisṭin ar‑irggm dawd s‑ism n‑id‑rbbi‑ns.

⁴⁴ yini ilmma gu‑filisṭin i‑dawd: «akmur‑d sri ad‑fkġ tifiyi‑nk i‑igḍaḍ n‑ignwan d‑luḥuš n‑tagant.»

⁴⁵ yini‑n dawd i‑gu‑filisṭin: «kiyi tusit‑d sri uzzal d‑uḥriš d‑iẓḍi, imma nkki usiġ‑n srk ism n‑rbbi da‑illan, ig rbbi n‑lmlayka, ig rbbi n‑ikabarn n‑israyil, ašku nttan a‑ġ‑a‑trggmt.

⁴⁶ ġassad ra‑k‑id‑iluḥ sidi rbbi ġ‑ufus‑inu, nġġ‑k bbiġ‑ak ih̬f, fkġ tifiyi n‑ikabarn n‑filisṭin ġassad i‑igḍaḍ n‑ignwan d‑luḥuš n‑lh̬la. ġmkad a‑s‑rad‑issann kullu imzdġn n‑ddunit is‑illa yan igan rbbi ġ‑dar ayt‑israyil.

⁴⁷ rad‑ẓrn kullu willi‑d‑imunn ġassad is‑urd uzzal d‑uḥriš a‑s‑a‑itfukku rbbi da‑illan. ašku imiġ iga win sidi rbbi. ra‑kʷn‑d‑iluḥ ġ‑ifassn‑nġ.»

⁴⁸ inkr gu‑filisṭin iftu‑d, yakmur‑d a‑d‑imnaggar dawd, yazzl dawd ula nttan s‑umnid n‑ayt‑filisṭin a‑t‑in‑imnaggar.

⁴⁹ ig‑n dawd afus s‑tʷqrabt, yasi‑d zġ‑gis yan‑uẓru, ig‑t ġ‑ildi, iẓrḍ‑as srs. yaški‑as‑n ġ‑ignzi, ikšm gis. iḍr f‑uwdm‑ns s‑wakal.

⁵⁰ ġmkan a‑s‑inra dawd gu‑filisṭin s‑ildi d‑uẓru, yut gu‑filisṭin inġ‑t. dawd, ur‑yusi uzzal ġ‑ufus.

⁵¹ yazzl ġakudan ibidd‑n ġ‑tama n‑gu‑filisṭin, yamẓ ġ‑uwzzal n‑gulyat, ildi‑t‑id zġ‑uġʷlaf‑ns inġ‑t, ibbi‑as ih̬f. lliġ ẓran ayt‑filisṭin amdwas‑nsn immut rwln.

⁵² nkrn ayt‑israyil d‑ayt‑yahuda ar‑tġuwwatn, ẓẓun ġ‑ayt‑filisṭin ar tisgiw n‑gatt d‑imawn n‑ɛaqrun. ḍrn imugas n‑ayt‑filisṭin ġ‑uġaras zġ‑šaɛaraym ar gatt d‑ɛaqrun.

⁵³ wrrin‑d ilmma ayt‑israyil s‑illi‑zġ‑ẓẓan ġ‑ayt‑filisṭin, awin‑asn kullu ma‑darsn‑illan ġ‑usras‑nsn.

⁵⁴ yasi dawd ih̬f n‑gu‑filisṭin, yawi‑t‑id s‑urušalim, ig imqlad‑ns ġ‑uh̬iyyam‑ns.

⁵⁵ imma šawl, lliġ iẓra dawd mamnk a‑iffuġ a‑n‑imnaggar d‑gu‑filisṭin‑an, isawl i‑abnar lli‑igan ariyas n‑inmmaġn‑ns, isqsa‑t: «way‑abnar, yus n‑mit a‑iga‑uɛzri‑an?» yini‑as abnar: «f‑tudrt‑nk ay‑agllid, ur‑ssinġ.»

⁵⁶ yini‑as‑ugllid: «zayd sqsa, yus n‑mit a‑iga‑ugʷilal‑an?»

⁵⁷ lliġ‑d‑iwrri dawd zġ‑tnaġa n‑gu‑filisṭin, yawi‑t‑id abnar s‑umnid n‑šawl, yasi‑d sul ih̬f n‑gu‑filisṭin ġ‑ufus‑ns.

⁵⁸ isqsa‑t šawl: «yus n‑mit a‑tgit ay‑aɛzri?» yini‑as dawd: «yus n‑umqasa‑nk yassa gu‑bitlaḥm.»