1 ṣamwil 16 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

aẓġur n‑dawd i‑tgldit

¹ isawl‑d sidi rbbi s‑ṣamwil yini‑as: «mnšk a‑ra‑k‑sul‑taġ‑tguḍi f‑šawl? han ur‑sul‑t‑riġ a‑ig agllid f‑israyil. nkr tasit‑d isk, tɛmmrt‑t s‑zzit tddut. ra‑k‑aznġ s‑dar yassa gu‑bitlaḥm, ašku tarwa‑ns a‑ġ‑skrġ i‑ih̬f‑inu agllid.»

² irar‑as ṣamwil: «mamnk a‑rad‑dduġ? han mayad iġ‑fllas‑isfld šawl, ra‑yyi‑inġ.» yini‑as‑d sidi rbbi: «awi dik yat‑tgizt tinit: ‹uškiġ‑d ad‑srsġ tiġrṣi i‑sidi rbbi›,

³ tġrt‑d i‑yassa s‑dar‑tġrṣi, s‑rad‑ak‑mlġ ma‑ra‑tskrt. ašku rad‑iyi‑tẓẓġurt walli rad‑ak‑n‑mlġ.»

⁴ iskr ṣamwil s‑wawal n‑sidi rbbi, yašk‑id s‑bitlaḥm. ffuġn‑d imġarn n‑tmdint a‑t‑id‑mnaggarn ar‑trgigiyn, sqsan‑t: «izd sslamt a‑f‑di‑tuškit?»

⁵ yini‑asn: «sslamt. tiġrṣi i‑sidi rbbi a‑f‑d‑uškiġ. zaydat tssġusm ih̬fawn‑nun, tmunm didi s‑dar‑tġrṣi.» iddu ntta issġus yassa d‑tarwa‑ns, yawi‑tn‑d‑dids s‑dar‑tġrṣi.

⁶ lliġ‑d‑munn, imnad ṣamwil ġ‑aliyab, yini d‑ih̬f‑ns: «ha walli ra‑iẓẓġur sidi rbbi, ibidd ġila ġ‑umnid‑ns.»

⁷ walaynni inna sidi rbbi i‑ṣamwil: «ad‑ur‑tmnadt udm‑ns ula tiġzi n‑tiddi‑ns, ašku ur‑t‑riġ. urd ġmklli itmnad bnadm a‑itmnad rbbi sidik. bnadm ar‑iẓrra ma‑itbann i‑walln, imma rbbi sidik ar‑iẓrra ma‑illan ġ‑uwl.»

⁸ iġr‑d ilmma yassa i‑abinadab, izzri‑t ġ‑umnid n‑ṣamwil, imma nttan inna: «ula ġwad, ur‑t‑isti sidi rbbi.»

⁹ izayd yassa izzri šammah, yini‑as: «ula ġwad, ur‑t‑isti sidi rbbi.»

¹⁰ izayd yassa izzri tarwa‑ns s‑ssa ġ‑umnid n‑ṣamwil. yini ṣamwil i‑yassa: «sidi rbbi ur‑isti ḥtta yan ġ‑ġwid.»

¹¹ isawl daġ ṣamwil i‑yassa isqsa‑t: «izd kullu tarwa‑nk llan ġid?» yini‑as: «iqama‑n‑umẓẓi, d‑ntta iksa ulli.» yini ṣamwil i‑yassa: «azn srs a‑d‑yašk, ašku ur‑ra‑nšš ard yili ġid.»

¹² yazn srs yašk‑id‑uḥšmi, s‑hati iṣfa llun‑ns, ifulki ġ‑walln‑ns d‑uwdm‑ns. yini sidi rbbi: «nkr tẓẓġurt‑t, ašku nttan ayan.»

¹³ yasi‑d ṣamwil isk‑lli n‑zzit, iẓẓġur‑t ġ‑wammas n‑aytmas. rruḥ n‑sidi rbbi ar‑idḥḥi dawd zġ‑ġassan tasawnt. inkr ṣamwil iddu s‑rama.

iwrri dawd ar‑itqasa šawl

¹⁴ imma šawl, ifl‑t rruḥ n‑sidi rbbi, tašk‑id srs yat rruḥ yʷh̬šnn zġ‑dar sidi rbbi ar‑ti‑tssiwid.

¹⁵ inin‑as imɛawann‑ns: «han yat rruḥ yʷh̬šnn zġ‑dar rbbi a‑k‑issiwidn.

¹⁶ ġir a‑sidi, azn‑aġ nkkʷnin imqasan‑nk a‑nddu a‑nsiggl kra n‑yan issnn bahra i‑luṭar. ġakud nna‑di‑tuška rruḥ‑an yʷh̬šnn zġ‑dar rbbi, ra‑itggr i‑luṭar s‑thnnat.»

¹⁷ yini šawl i‑imɛawann‑ns: «ẓrat‑iyi kra n‑yan issnn bahra i‑luṭar, tawim‑iyi‑t‑id.»

¹⁸ yini‑as‑d yan ġ‑iɛyyaln‑ns: «ẓriġ nkki yan ġ‑tarwa n‑yassa gu‑bitlaḥm issn i‑luṭar bahra, ig amdwas iḥaršn yujad i‑imiġ, yissan a‑isawl, ifulki ġ‑uwdm‑ns, yili dids sidi rbbi.»

¹⁹ yazn šawl irqqasn s‑yassa yini‑as: «azn‑iyi‑d yuk dawd lli‑ikssan ulli.»

²⁰ yawi‑d yassa yan‑uġyul, ig‑as asitti n‑uġrum d‑tayddidt n‑waman n‑waḍil iktin d‑yan ikru, yazn‑tn i‑šawl f‑ufus n‑yus dawd.

²¹ ilkm dawd dar šawl iqasa‑t. iɛzzu bahra dar šawl, iwrri ig walli‑as‑itasin imqlad‑ns.

²² yazn ilmma šawl s‑yassa yini‑as: «adj dawd a‑d‑dari‑iqama ar‑yyi‑itqasa, ašku rḍiġ srs.»

²³ ġakud nna‑di‑tuška rruḥ‑an zġ‑dar rbbi s‑šawl, yasi‑d dawd luṭar. ar‑as‑itggr s‑ifassn ard isunfu šawl ithnnu, tfl‑t ilmma rruḥ‑lli yʷh̬šnn.