1 ṣamwil 15 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

immaġ šawl d‑ayt‑ɛamaliq

¹ isawl ṣamwil s‑šawl yini‑as: «sidi rbbi a‑yyi‑d‑yuznn yadlli a‑k‑ẓẓġurġ a‑tgt agllid f‑mddn‑ns n‑ayt‑israyil. sfld ġilad i‑wawal n‑sidi rbbi.

² ha ma‑inna sidi rbbi n‑lmlayka: ‹rad‑rarġ lḥsab i‑ayt‑ɛamaliq f‑ġaylli skrn i‑ayt‑israyil, tɛrrḍn‑asn ġ‑uġaras ġakud lliġ‑d‑iwnn zġ‑miṣr.

³ nkr ġilad tutt ayt‑ɛamaliq, tfnut kullu ma‑darsn‑illan. a‑ur‑zġ‑gisn‑tḥnnut. zayd tnġt irgazn d‑tmġarin d‑tarwa mẓẓinin d‑wid ssumumnin, tnġt ula imugayn d‑uwlli d‑irɛman d‑iġʷyal.› »

⁴ iġr‑d šawl i‑irgazn‑ns, iḥasb‑tn ġ‑tmdint n‑ṭalaym. gn sin id‑miyya n‑walf (200 000) n‑urgaz lli‑iftan f‑uḍar, ilin ula mraw id‑walf (10 000) n‑urgaz n‑ayt‑yahuda.

⁵ ilkm šawl s‑tama n‑tmdint n‑ɛamaliq, iql ġ‑talat iḍuf.

⁶ yini ġakudan i‑ayt‑qin: «ffuġat‑d zġ‑gr ayt‑ɛamaliq tddum, a‑ur‑kʷn‑hlkġ didsn. ašku afulki a‑tskrm ġ‑ayt‑israyil lliġ‑d‑iwnn zġ‑miṣr.» ffuġn ayt‑qin ġakudan zġ‑gr ayt‑ɛamaliq.

⁷ yakʷi‑n ilmma šawl f‑ayt‑ɛamaliq, ar‑tn‑ikkat zġ‑ḥawila ar šur ġ‑iwtta n‑miṣr.

⁸ yamẓ agag agllid n‑ɛamaliq sul iddr, ifnu kullu mddn‑ns s‑uwzzal ifrsn.

⁹ walaynni iḥnna šawl d‑irgazn‑ns ġ‑agag nttan d‑maylli ifulkin ġ‑uwlli d‑imugayn d‑igayzn ḍninin d‑ilqqaġn ula kullu ma‑igan lh̬ir, ur‑rin a‑tn‑fnun. imma kullu ma‑iḍɛfn iḥfu, fnan‑t.

šawl ur‑iskir s‑wawal n‑rbbi

¹⁰ yašk‑id‑wawal n‑sidi rbbi s‑ṣamwil yini‑as:

¹¹ «tʷgraẓ‑iyi ġ‑lliġ‑n‑giġ šawl d‑ugllid, ašku iwrri zġ‑uġaras‑inu, ur‑a‑iskar s‑luṣiyat‑inu.» ṭiyr i‑ṣamwil bahra. iḍ‑an kullut insa ar‑yaqra s‑sidi rbbi.

¹² inkr ṣamwil zikk ṣbaḥ a‑n‑imnaggar šawl, walaynni nnan‑as mddn: «idda šawl s‑karmal. hatin issbidd gis yan‑uẓru ma‑s‑a‑t‑id‑kttin mddn, izayd ilmma ihuwwd s‑gilgal.»

¹³ iddu ṣamwil s‑dars. lliġ‑t‑in‑ilkm, yini‑as‑d šawl: «a‑k‑ibark sidi rbbi. ha‑yyi kmmlġ luṣiyt n‑sidi rbbi.»

¹⁴ irar‑as ṣamwil: «ma‑iga‑uqqryan‑ad n‑uwlli mi sflidġ, d‑uqqryan n‑imugayn ar‑n‑ikkat ġ‑imzgan‑inu?»

¹⁵ yini‑as šawl: «iwin‑tn‑d irgazn zġ‑dar ayt‑ɛamaliq, ašku ḥnnan ġ‑ma‑ifulkin ġ‑uwlli d‑imugayn ad‑asn‑ġrṣn i‑rbbi sidik. imma wiyyaḍ, nfna‑tn.»

¹⁶ yini ṣamwil ġakudan i‑šawl: «bidd. rad‑ak‑mlġ awal lli‑s‑iyi‑d‑inna sidi rbbi ġ‑iḍ‑ad.» yini‑as: «sawl.»

¹⁷ yini‑as ṣamwil: «wah̬h̬a tmẓẓit dar ih̬f‑nk, is‑urd kiyin a‑igan ih̬f i‑tqbilin n‑israyil, iẓẓġur‑k sidi rbbi a‑tgt agllid f‑ayt‑israyil?

¹⁸ han yuzn‑k sidi rbbi a‑tssafut ma‑iqṣad, yini: ‹ddu tfnut ayt‑ɛamaliq ašku gan ayt‑ḍḍulm, ar‑tn‑tkkatt ard‑tn‑kullu‑laḥ.›

¹⁹ mah̬ aylliġ ur‑tskirt s‑wawal n‑sidi rbbi? mah̬ aylliġ‑n‑tukʷit f‑lh̬ir‑nsn, tskrt ma‑yʷh̬šnn ġ‑grak dids?»

²⁰ yini‑as šawl: «uhu, skrġ s‑wawal n‑sidi rbbi. dduġ ssafuġ ma‑iqṣad sidi rbbi lliġ‑iyi‑yuzn, awiġ‑d agag agllid n‑ɛamaliq, fnuġ ayt‑ɛamaliq.

²¹ awin‑d ilmma irgazn ma‑ifulkin ġ‑uwlli d‑imugayn zġ‑lh̬ir‑nsn lli‑ra‑nfnu, f‑ad‑asn‑ġrṣn i‑rbbi sidik ġ‑gilgal.»

²² yini‑as ṣamwil: «manwa‑s‑a‑itrḍu sidi rbbi? izd yan yakkan isakmurn d‑tġrṣiw jdrnin, nġd yan iskarn s‑wawal n‑sidi rbbi? han yuf a‑srs‑isfld yan, ula ifka‑yas tiġrṣi. yuf a‑srs‑irar lɛaql, ula ifka‑yas tadunt n‑izamarn.

²³ ašku yan ur‑srs‑isflidn iga zund yan itsalan lh̬ʷšant n‑ssiḥr. d‑yan fllas istġnan iga zund yan itqasan tajlh̬it n‑laṣnam. kiyi, lliġ tagʷit awal n‑sidi rbbi, ula nttan yagʷi‑k a‑sul‑tgt agllid.»

²⁴ yini šawl i‑ṣamwil: «ha‑yyi jliġ. ssurfġ luṣiyt n‑sidi rbbi d‑iwaliwn‑nk. ašku ksuḍġ zġ‑irgazn‑inu skrġ s‑wawal‑nsn.»

²⁵ ġilad ġir ṣamḥ‑iyi f‑tjli‑nu, tmunt didi ad‑wrriġ a‑n‑šjdġ ġ‑umnid n‑sidi rbbi.»

²⁶ irar ṣamwil i‑šawl: «ur‑ra‑dik‑munġ, ašku tagʷit awal n‑sidi rbbi, yagʷi‑k ula sidi rbbi a‑sul‑tgt agllid f‑israyil.»

²⁷ igllb ṣamwil a‑iddu, yamẓ‑t‑id šawl zġ‑tama n‑uslham‑ns s‑ibbi.

²⁸ yini‑as ṣamwil: «ġmkad a‑s‑ibbi sidi rbbi tagldit n‑israyil zġ‑ufus‑nk ġassad, ifk‑tt i‑yan‑k‑yufn ġ‑inggʷan‑nk.

²⁹ han rbbi n‑lmajd n‑israyil ur‑a‑isskirkis ula da‑itġlaṭ, ašku ur‑igi bnadm da‑itġlaṭn.»

³⁰ yini‑as ġakudan: «jliġ nkki. walaynni skr‑iyi sul luqr ġ‑umnid n‑imġarn n‑mddn‑inu d‑umnid n‑ayt‑israyil, tmunt‑d didi ad‑wrriġ a‑n‑šjdġ ġ‑umnid n‑rbbi sidik.»

³¹ iwrri‑d ṣamwil imun d‑šawl, išjd šawl ġ‑lgddam n‑sidi rbbi.

³² yini ilmma ṣamwil: «awyat‑iyi‑d agag agllid n‑ɛamaliq.» yašk‑id dars agag s‑zzɛmt, yini d‑ih̬f‑ns: «hati ġilad tzri tawala ismmumn n‑lmut.»

³³ yini‑as ṣamwil: «ġmklli tkkis tuzzalt‑nk tarwa i‑tmġarin a‑ra‑tg innak bla tarwa ġ‑gr‑tmġarin.» yazu‑t ṣamwil ġ‑lgddam n‑sidi rbbi ġ‑gilgal.

³⁴ iddu ṣamwil ġakudan s‑rama, imma šawl yiwn s‑tgmmi‑ns ġ‑gibɛa n‑šawl.

³⁵ zġ‑tizi‑an ur‑jji‑sul‑iẓri ṣamwil šawl, walaynni taġ‑t‑sul‑tguḍi f‑šawl. tʷgraẓ sidi rbbi ġ‑lliġ iga šawl d‑ugllid f‑israyil.