1 ṣamwil 13 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iskr šawl f‑imiġ d‑ayt‑filisṭin

¹ izayd šawl iḥkam f‑ayt‑israyil yan‑usggʷas. wis sin isggʷasn

² iẓli kraḍ id‑walf (3000) n‑urgaz zġ‑ayt‑israyil. issmun sin id‑walf (2000) s‑dars ġ‑tmdint n‑mih̬maš d‑iwrar n‑bayt‑il, yili‑walf (1000) ġ‑dar yus yunatan ġ‑tmdint n‑gibɛa n‑bnyamin. ġwilli iqaman ġ‑irgazn, yazn‑tn kud yan s‑illiġ izdġ.

³ ha yunatan inra lqʷšla n‑inmmaġn n‑filisṭin ġ‑gibɛa, sfldn fllas ayt‑filisṭin. izayd šawl yut nnffar ġ‑tmazirt kullutt yini: «sfldat ay‑ayt‑ɛibr.»

⁴ sfldn kullu ayt‑israyil is‑inra šawl lqʷšla n‑ayt‑filisṭin d‑is‑wrrin ȷ̈̇ȷ̈̇an ayt‑israyil ġ‑tnh̬ar n‑ayt‑filisṭin. tffuġ‑tbrraḥt ad‑d‑kullu‑munn irgazn ad‑ḍfurn šawl ġ‑gilgal.

⁵ munn‑d ayt‑filisṭin a‑n‑akʷin f‑ayt‑israyil s‑kraḍ id‑mraw n‑walf (30 000) n‑lkrarṣ, d‑sḍis id‑walf (6000) n‑umnay, d‑tugtt n‑inmmaġn zund amlal n‑tama n‑umda. awnn‑d srsn ġ‑mih̬maš, ġ‑tsga n‑bayt‑awin lli‑iwalan asġlay n‑tafukt.

⁶ ẓrn irgazn n‑israyil ih̬fawn‑nsn is‑llan ġ‑tassast išqan, ašku inukma fllasn lḥal bahra. rwln mddn‑nsn ġakudan, rgsn ġ‑ifran d‑igʷḍyan d‑ijarifn d‑ismḍal d‑tnuḍfiw.

⁷ kra ġ‑irgazn‑an n‑ayt‑ɛibr bbin asif n‑urdun zġ‑isukkay s‑wakal n‑gad d‑gilɛad. imma šawl sul illa ġ‑gilgal ntta d‑willi‑t‑iḍfurn, ar‑kullu‑trgigiyn.

iga šawl ih̬f‑ns d‑umsakmur

⁸ iql šawl ssa n‑uwssan ġunšk lli‑dids‑iskr ṣamwil, walaynni ur‑d‑yuški ṣamwil s‑gilgal. bdun mddn ar‑fllas‑takutn.

⁹ yini šawl: «awyat‑d dari tiġrṣi d‑twafkiw n‑sslamt.» izayd nttan issattuy tiġrṣi ijdrn.

¹⁰ lliġ tjdr‑tġrṣi, ha ṣamwil yuška‑d. iffuġ šawl a‑n‑dids‑imnaggur insallam dids.

¹¹ imma ṣamwil isqsa‑t: «ma‑tskrt?» yini‑as šawl: «ẓriġ mddn ar‑flla‑takutn, d‑kiyi ur‑di‑tuškit ġ‑luqt lli‑nskr, d‑ayt‑filisṭin hatni munn‑d ġ‑mih̬maš.

¹² iniġ d‑ih̬f‑inu: ‹ġikk s‑d‑flla‑huwwdn ayt‑filisṭin ġ‑gilgal, d‑nkki ur‑ta‑ḍalbġ rrḍa n‑sidi rbbi.› s‑bzzez flla a‑s‑ssattuyġ tiġrṣi ijdrn.»

¹³ yini ṣamwil ġakudan i‑šawl: «anufl ayn tskrt. ur‑tti‑tiwit ġ‑luṣiyt lli‑f‑k‑yuṣṣa rbbi sidik. mra is‑srs‑tskrt, lukun izzga tagldit‑nk f‑ayt‑israyil kullu mayd iftan.

¹⁴ walaynni ur‑ra‑tdum‑tgldit‑nk ġilad. han sidi rbbi isiggl kra n‑yan yakmurn s‑uwl‑ns, iẓli‑t sidi rbbi a‑ig amzwar f‑mddn‑ns, ašku kiyi ur‑tskirt f‑maylli‑f‑k‑yuṣṣa sidi rbbi.»

¹⁵ inkr ṣamwil iffuġ gilgal. imma wiyyaḍ ḍfurn šawl s‑dar inmmaġn yaḍni, awnn dids zġ‑gilgal s‑gibɛa ġ‑wakal n‑bnyamin. izayd šawl iḥasb mddn lli‑dids‑illan, gn ma‑itggan sḍis id‑miyya (600) n‑urgaz.

¹⁶ iqama šawl d‑yus yunatan d‑usmun‑nsn ġ‑gibɛa ġ‑wakal n‑bnyamin. imma ayt‑filisṭin srsn ġ‑mih̬maš.

¹⁷ han kraṭṭ‑trubba n‑ayt‑filisṭin ffuġnt‑d zġ‑usras‑nsn f‑ad‑fllasn‑akʷin akʷrn‑asn ma‑darsn‑illan. yat‑trabbut tkka aġaras n‑ɛafrah s‑wakal n‑šuɛal.

¹⁸ ṭayyaḍ tkka aġaras n‑bayt‑ḥurun. ṭayyaḍ yaḍni tkka aġaras n‑uwttu lli‑n‑yuggʷan s‑uzaġar n‑ṣabuɛim ġ‑tama n‑lh̬la.

¹⁹ tizi‑an ḥtta yan‑umzil ur‑t‑ufin ġ‑wakal n‑israyil kullut, ašku nnan ayt‑filisṭin: «a‑ur‑imil ɛdln ayt‑ɛibr i‑ih̬f‑nsn tuzzal d‑iẓḍkan.»

²⁰ kud yan ġ‑ayt‑israyil, iġ‑ira a‑issfrs tamkrazt nġd amadir nġd aglzim nġd asmmawd, ar‑ithuwwad s‑dar ayt‑filisṭin.

²¹ ig‑watig n‑ussfrs‑an snat‑tqaridin n‑nnʷqrt i‑tmkrazt ula amadir, ig yat‑tqaridt i‑ussfrs n‑uglzim nġd amnqaš.

²² lliġ‑d‑ilkm‑wass n‑imiġ, han ur‑ufin kra n‑tuzzalt ula kra n‑iẓḍi dar‑usmun n‑šawl d‑yunatan. ġir šawl d‑yus yunatan a‑tn‑iṭṭafn.