1 ṣamwil 12 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awal n‑ṣamwil i‑ayt‑israyil

¹ isawl ṣamwil s‑kullu ayt‑israyil yini‑asn: «ha‑yyi sfldġ s‑wawal‑nun ġ‑kullu ma‑s‑iyi‑tnnam, skrġ fllawn agllid.

² hati ġilad agllid a‑rad‑awn‑izgguru. nkki uwssrġ šiybġ, tarwa‑nu hatni didun. zġ‑mẓẓiy‑inu a‑ywn‑zwurġ sul s‑ġassad.

³ ha nkki, fkat flla tuggʷa ġ‑umnid n‑sidi rbbi d‑umnid n‑walli iẓẓġur. is‑iwiġ amugay i‑kra n‑yan? is‑iwiġ aġyul i‑kra n‑yan? is‑jji‑ḍlmġ kra n‑yan? is‑jji‑tɛddaġ f‑kra n‑yan? is‑jji‑umẓġ rršwa zġ‑dar kra n‑yan a‑fllas‑dlġ alln‑inu? fkat flla tuggʷa, s‑awn‑t‑id‑rurġ.»

⁴ inin‑as: «ur‑aġ‑tḍlmt ula ttɛddat fllanġ ula tumẓt kra zġ‑dar kra n‑yan ginġ.»

⁵ yini‑asn: «sidi rbbi a‑fllawn‑igan inigi, ig‑ula‑umẓġur‑ns inigi ġassad, ur‑tufim yat ġ‑ufus‑inu.» inin‑as‑d kullu: «iga nttan inigi.»

⁶ izayd ṣamwil yini i‑mddn: «inigi iga‑t sidi rbbi lli‑istin musa d‑harun, issawn‑d id‑babatun zġ‑wakal n‑miṣr.

⁷ imma ġilad biddat a‑giwn‑zzgaġ lḥqq ġ‑umnid n‑sidi rbbi f‑kullu ifulkitn lli‑awn‑iskr sidi rbbi kunni d‑id‑babatun.

⁸ lliġ idda yaɛqub s‑miṣr, ar‑aqran id‑babatun s‑sidi rbbi. yazn‑asn‑d musa d‑harun, ssufġn‑d id‑babatun zġ‑miṣr, zzdġn‑tn ġ‑wakal‑ad.

⁹ ttun ilmma rbbi siditsn, iluḥ‑tn ġ‑ufus n‑sisra ariyas n‑inmmaġn n‑ḥaṣur, iluḥ‑tn daġ ġ‑ufus n‑ayt‑filisṭin, iluḥ‑tn ula ġ‑ufus n‑ugllid n‑muwab, ar‑tn‑kullu‑kkatn.

¹⁰ ġrn ġakudan i‑sidi rbbi ar‑ttinin: ‹ha‑yaġ njla bahra, ašku nfl rbbi da‑illan ar‑ntqasa id‑rbbi ‹baɛl› d‑‹ɛaštarut›. imma ġilad fukku‑aġ zġ‑ifassn n‑inuwwašn‑nġ baš a‑k‑nqasa kiyi.›

¹¹ yazn‑d sidi rbbi yarubbaɛl d‑baraq d‑iftaḥ d‑ṣamwil, ifukku‑kʷn‑d zġ‑ufus n‑inuwwašn‑nun zġ‑kraygatt tasga, aylliġ tzdġm ġ‑laman.

¹² walaynni lliġ tẓram naḥaš agllid n‑ɛammun yiwn‑d srun, tinim‑iyi‑d: ‹uhu, nra kra n‑ugllid a‑fllanġ‑iḥkam,› wah̬h̬a s‑lḥqq iga rbbi siditun agllid‑nun.

¹³ ġilad hay‑agllid lli‑tram tḍalbm‑t. ašku issbidd fllawn sidi rbbi yan‑ugllid.

¹⁴ iġ‑a‑bdda‑ttuqqarm rbbi siditun ar‑ti‑ttqasam, ar‑tsflidm s‑ma‑ittini, iġ‑ur‑sar‑a‑ttḥgarm luṣiyat n‑rbbi siditun, iġ‑tzuydm kunni d‑ugllid lli‑fllawn‑iḥkamn ar‑bdda‑tfttum ġ‑uġaras n‑rbbi siditun, hati mayan ifulki‑awn.

¹⁵ walaynni iġ‑ur‑a‑tsflidm s‑wawal n‑rbbi siditun, tḥgrm luṣiyat‑ns, han afus n‑rbbi siditun a‑ra‑kʷn‑iḍaḍḍ ġmklli iḍaḍḍ id‑babatun.

¹⁶ biddat ġilad tẓrm lɛjb‑ad ra‑iskr sidi rbbi ġ‑iẓri‑nun.

¹⁷ is‑urd azmz n‑tmgra n‑irdn ayad? rad‑ġrġ i‑sidi rbbi a‑d‑yazn iggig d‑unẓar, f‑a‑tẓrm tissanm is‑bahra‑yʷh̬šn ġaylli tskrm ġ‑iẓri n‑sidi rbbi, lliġ tḍalbm ad‑awn‑yili kra n‑ugllid.»

¹⁸ iġr ṣamwil ġakudan i‑sidi rbbi. yazn‑d iggig d‑unẓar ġassan, s‑wrrin kullu mddn‑an ksuḍn bahra zġ‑sidi rbbi ula zġ‑ṣamwil.

¹⁹ inin mddn kullutn i‑ṣamwil: «ẓẓall i‑rbbi sidik, tḍalbt‑as f‑ih̬ddamn‑nk a‑ur‑nmmt. ašku kullu ġaylli nskr yʷh̬šn, nzayd‑as lh̬ʷšant‑ad lliġ nḍalb ad‑aġ‑yili kra n‑ugllid.»

²⁰ yini ṣamwil i‑mddn: «ad‑ur‑tiksaḍm. wah̬h̬a tskrm kullu ġayan yʷh̬šnn, a‑ur‑tffuġm zġ‑uġaras n‑sidi rbbi. zaydat tqasam sidi rbbi zġ‑ttmi n‑uwl‑nun.

²¹ a‑ur‑n‑tgllbm s‑dar kra ur‑akkʷ‑igin yat, ur‑a‑itnfaɛ ula da‑ijjnjam, ašku ur‑igi yat.

²² ha rbbi da‑illan, f‑ssibt n‑ism‑ns imqqurn a‑f‑ur‑ra‑ifl mddn‑ns, ašku irḍa a‑kʷn‑ig d‑mddn‑ns.

²³ imma nkki, yaggug flla ad‑ġḍrġ sidi rbbi bbiġ tiẓulla‑nu f‑ssibt‑nun. rad‑awn‑malaġ aġaras lli‑iṣlaḥn inm.

²⁴ ġir a‑ttuqqarm sidi rbbi, ar‑ti‑ttqasam s‑nniyt izgan d‑uwl iṣfan. swangmat‑d lɛjayb mqqurnin lli‑awn‑iskr.

²⁵ walaynni iġ‑tzuydm ar‑ttsalam ma‑yʷh̬šnn, han ra‑kʷn‑ihlk kunni ula agllid‑nun.»