1 ṣamwil 11 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

šawl inra ayt‑ɛammun

¹ izri ma‑izrin s‑d‑yiwn naḥaš agllid n‑ayt‑ɛammun, igli tamdint n‑yabiš ġ‑wakal n‑gilɛad. inin kullu ayt‑yabiš i‑naḥaš: «skr didnġ lɛhd, ng‑ak ih̬ddamn.»

² irar‑asn naḥaš gu‑ɛammun: «ra‑didun‑skrġ lɛhd s‑yan ššrḍ. rad‑ssukfġ ṭiṭṭ tafasiyt i‑kraygatt yan giwn, a‑yili lɛar ġ‑kullu ayt‑israyil.»

³ inin‑as imġarn n‑yabiš: «adj‑aġ ssa n‑uwssan ard nazn irqqasn s‑kullu timizar n‑israyil. iġ‑ur‑illi ma‑yġ‑itfukkun, nsllm‑ak ih̬fawn‑nġ.»

⁴ aškin‑d irqqasn s‑gibɛa, tga tamdint n‑šawl. ɛawdn i‑mddn f‑ma‑ijran, ar‑kullu‑ssġuyyun ar‑allan.

⁵ tasaɛt‑an a‑d‑yuška šawl zġ‑igran, issalsa‑d imugayn. isqsa: «ma‑yaġn ayt‑tmazirt aylliġ a‑allan?» ɛawdn‑as f‑wawal lli‑d‑iwin irqqasn n‑yabiš.

⁶ lliġ isfld šawl i‑wawal‑an, idḥi‑t rruḥ n‑rbbi, iznd gis lġaḍab irġan.

⁷ yawi‑d sin imugayn ibḍu‑tn f‑igzman, isafḍ‑tn f‑ufus n‑irqqasn s‑kullu timizar n‑israyil, yini: «wanna‑ur‑d‑iffuġn a‑iḍfur šawl d‑ṣamwil, ġmkad a‑ra‑ijru i‑imugayn‑ns.» ḍrnt‑tksaḍ n‑sidi rbbi f‑mddn, ffuġn‑d kullu s‑yan‑uwl.

⁸ iḥasb‑tn ġakudan ġ‑tmdint n‑bazaq, yaf‑n gisn kraḍ id‑miyya n‑walf (300 000) n‑ayt‑israyil, d‑kraḍ id‑mraw n‑walf (30 000) n‑ayt‑yahuda.

⁹ inin ilmma i‑irqqasn lli‑d‑darsn‑uškanin: «inyat i‑ayt‑yabiš ġ‑gilɛad: ‹azkka ur‑ta‑trġi tafukt, ra‑tnjmm.› » ddun irqqasn sslkmn awal i‑ayt‑yabiš, frḥn bahra.

¹⁰ inin ilmma ayt‑yabiš i‑naḥaš: «azkka ra‑n‑darun‑nffuġ, tskrm ginġ aynna ifulkin ġ‑iẓri‑nun.»

¹¹ ibḍu šawl ġ‑iḍ‑an irgazn‑ns f‑kraṭṭ‑trubba. zikk ṣbaḥ kšmn s‑usras n‑ayt‑ɛammun, ar‑tn‑kkatn aylliġ irġa‑wass. akutn willi gisn iqaman, ur‑sul‑illi yan imunn d‑wayya.

frḥn ayt‑israyil s‑ugllid‑nsn

¹² inin ilmma mddn i‑ṣamwil: «manza willi ittinin: ‹is‑rad‑fllanġ‑iḥkam šawl?› awyat‑tn‑d ġila a‑tn‑nnġ.»

¹³ irar‑asn šawl: «ur‑ra‑nnġ yan ġassad. ašku ġassad a‑issuwfa sidi rbbi ajnjm i‑ayt‑israyil.»

¹⁴ isawl ṣamwil ġakudan s‑mddn yini: «rwaḥat a‑nddu s‑gilgal nzzga tagldit.»

¹⁵ ddun mddn kullutn s‑gilgal, gn šawl d‑ugllid‑nsn ġ‑umnid n‑sidi rbbi ġ‑gilgal. ġrṣn ġin i‑tġrṣiw n‑sslamt ġ‑umnid n‑sidi rbbi. ifrḥ bahra šawl d‑kullu mddn n‑ayt‑israyil.