1 ṣamwil 10 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

aẓġur n‑šawl i‑tgldit

¹ yasi‑d ṣamwil yat‑tbʷqqalt imẓẓin n‑zzit, iffi‑tt‑id f‑ih̬f n‑šawl issudn‑t yini: «is‑ur‑k‑iẓli sidi rbbi a‑tgt amzwar f‑mddn‑ns n‑ayt‑israyil?

² iġ‑n‑dari‑tffuġt ġassad, ra‑tmnaggart sin irgazn ġ‑tama n‑umḍḍal n‑raḥil ġ‑ṣalṣaḥ ġ‑wakal n‑bnyamin. rad‑ak‑inin: ‹han iġʷyal lli‑s‑tffuġt ar‑tsiggilt, ufan‑tn. imma babak isrs lhmm n‑iġʷyal, yasi winun s‑uggʷar ar‑ittini: ma‑rad‑skrġ f‑iwi?›

³ tzaydt ilmma d‑uġaras‑nk ard tlkmt aṣġar n‑tasaft n‑tabur. ra‑k‑mnaggarn kraḍ irgazn iwnn s‑dar rbbi ġ‑bayt‑il. yan yusi kraḍ ikrwan, wis sin yusi kraṭṭ‑tngwal, wis kraḍ yusi tayddidt n‑waman n‑waḍil iktin.

⁴ rad‑fllak‑sllmn fkn‑ak snat‑tngwal, tamẓt‑tnt zġ‑ufus‑nsn.

⁵ truḥt ilmma gibɛa‑aluhim [awrir n‑rbbi], tlla gis lqʷšla n‑ayt‑filisṭin. ġakud nna‑tlkmt tamdint‑an, ra‑tmnaggart yat tamunt n‑lanbiya huwwdn‑d zġ‑uwrir s‑rribab d‑wallun d‑uɛwwad d‑luṭar, ar‑sawaln s‑mad‑asn‑d‑imala rbbi.

⁶ ra‑k‑in‑idḥi rruḥ n‑sidi rbbi ar‑tsawalt ġ‑gratsn s‑mad‑ak‑imala rbbi. ra‑tbddlt kiyi tgt argaz n‑ljdid.

⁷ tizi‑an ġ‑ak‑d‑bannt‑tmitar‑ad, skar aynna yufa‑ufus‑nk a‑t‑iskr, ašku illa dik rbbi.

⁸ thuwwdt ilmma tzwurt‑iyi s‑gilgal. ha‑yyi ra‑n‑huwwdġ s‑dark baš a‑n‑ssattuyġ isakmurn jdrnin, ġrṣġ i‑tġrṣiw n‑sslamt. ssa n‑uwssan a‑ra‑tqlt ġin ard‑n‑dark‑aškġ, mlġ‑ak ma‑ra‑tskrt.»

⁹ igrawl šawl ifl ṣamwil, s‑ifka rbbi ul n‑ljdid i‑šawl. jrunt‑as‑ilmma‑tmitar‑an kullutnt ġassan.

¹⁰ lliġ‑n‑lkmn gibɛa, ha yat tamunt n‑lanbiya imnaggar‑tn, idḥi‑t rruḥ n‑rbbi, ar‑isawal ġ‑gratsn s‑mad‑as‑d‑imala rbbi.

¹¹ willi‑t‑yadlli‑issnn, lliġ‑t‑ẓran ar‑isawal ġ‑gr lanbiya s‑maylli‑as‑d‑imala rbbi, ar‑kullu‑ssmqsan i‑ingratsn: «ma‑ijran i‑yus n‑qiš? is‑iga šawl ula ntta zġ‑lanbiya?»

¹² isawl‑d yan‑urgaz gu‑ġin yini: «imma ġwid, ma‑igan babatsn?» bdun mddn ar‑kkatn awal ar‑ttinin: «is‑iga šawl ula ntta zġ‑lanbiya?»

¹³ lliġ ikmml iwaliwn lli‑as‑d‑imla rbbi, iddu s‑uwrir‑an.

¹⁴ ha ɛmmis n‑šawl isqsa‑t ilmma ntta d‑uh̬ddam‑ns: «manis tddam?» irar‑as: «ndda a‑nsiggl s‑iġʷyal. lliġ‑ur‑tn‑nufi, nkmml s‑dar ṣamwil.»

¹⁵ izayd ɛmmis n‑šawl isqsa‑t: «ini‑yyi, ma‑s‑awn‑inna ṣamwil?»

¹⁶ yini šawl i‑ɛmmis: «inna‑yaġ s‑lḥqq, han iġʷyal, ufan‑tn.» imma taġawsa n‑tgldit lli‑f‑as‑isawl ṣamwil, ur‑as‑fllas‑inni yat.

ibidd šawl ġ‑umnid n‑mddn‑ns

¹⁷ iġr‑d ilmma ṣamwil i‑mddn s‑umnid n‑sidi rbbi ġ‑miṣfah.

¹⁸ yini i‑ayt‑israyil: «ha ma‑inna rbbi da‑bdda‑illan ig rbbi n‑israyil: ‹nkkin a‑d‑issiwnn ayt‑israyil zġ‑miṣr, fukkuġ‑kʷn‑d zġ‑ufus n‑ayt‑miṣr d‑ifassn n‑kullu igldan lli‑srun‑issnukmun.›

¹⁹ imma ġassad, han kunni tagʷim rbbi‑nun lli‑kʷn‑ijjnjmn zġ‑kullu timmariw‑nun ula kullu tassasin‑nun, tinim‑as: ‹uhu, ssbidd fllanġ kra n‑yan a‑ig agllid‑nġ.› ġilad ḥaḍrat‑d ġ‑umnid n‑rbbi siditun s‑tqbilin‑nun wala tagʷmatin‑nun.»

²⁰ iġr‑d ilmma ṣamwil f‑ad‑d‑kullu‑munnt‑tqbilin n‑israyil s‑dars. ttyawstay‑zġ‑gratsnt‑tqbilt n‑bnyamin.

²¹ iẓli taqbilt n‑bnyamin s‑tagʷmatin‑ns. ttyawstay zġ‑gratsnt tagʷmat n‑maṭri. zġ‑gisnt a‑zġ‑ityawstay šawl yus n‑qiš. ddun ar‑srs‑siggiln, ur‑t‑ufin.

²² sqsan daġ sidi rbbi inin: «is‑ur‑ta‑d‑yuški nttan?» yini‑d sidi rbbi: «hatin irgs ġ‑gr ifškan.»

²³ azzln awin‑t‑id zġ‑ġin, ibidd ġ‑gr mddn. iġzzif fllasn kullu, lkmn‑as ġir taġruṭṭ.

²⁴ yini ṣamwil i‑mddn kullutn: «is‑tẓram walli isti sidi rbbi? hati ur‑illi zund nttan ġ‑gr mddn kullutn.» alln awal‑nsn ġakudan ar‑kullu‑ttinin: «tudrt i‑ugllid.»

²⁵ isawl ṣamwil ġakudan s‑mddn f‑tnbaḍin n‑tgldit d‑twuriwin‑ns, yara‑tnt ġ‑yan‑warra, isrs‑t‑in ġ‑umnid n‑sidi rbbi. isafḍ ilmma ṣamwil mddn kullutn, kraygatt yan s‑tgmmi‑ns.

²⁶ iwrri šawl ula ntta s‑tgmmi‑ns ġ‑gibɛa, munn dids kra n‑irgazn ḥaršnin lli‑mi‑n‑iggr rbbi i‑uwl‑nsn.

²⁷ walaynni kra n‑id‑bu‑ijrman ar‑ttinin: «ġwad, mamnk a‑s‑ra‑yġ‑ijjnjm?» ḥgrn‑t, ur‑as‑fkin tasmġurt. imma ntta ifssa.