1 ṣamwil 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

talalit n‑ṣamwil

¹ ikka‑tt‑in yan‑urgaz ġ‑tmdint n‑rama n‑ayt‑ṣuf ġ‑iwrar n‑afraym, iga ism‑ns alqanah. ig yus n‑yaruḥam lli‑igan yus n‑alihu lli‑igan yus n‑tuḥu zġ‑tagʷmat n‑ṣuf lli‑igan zġ‑tqbilt n‑afraym.

² itahl snat‑tmġarin. iga ism n‑yat ḥanna, ig ism n‑ṭayyaḍ faninna. ttaġ‑d faninna teṭṭaf tarwa, imma ḥanna ur‑teṭṭaf tarwa.

³ asggʷas ar asggʷas ar‑itawn alqanah zġ‑tmdint‑ns a‑isjd i‑sidi rbbi n‑lmlayka ġ‑šiluh, iġrṣ‑n f‑ism‑ns ġ‑dar ḥufni d‑finḥas tarwa n‑ɛali lli‑ganin imsakmurn n‑sidi rbbi.

⁴ ass nna‑iġrṣ alqanah ar‑bdda‑yaṭṭu taġamin i‑tmġart‑ns faninna nttat d‑tarwa‑ns d‑istis.

⁵ imma ḥanna, ar‑as‑yakka snat taġamin, ašku tɛzza dars, wah̬h̬a‑yas‑iqqn sidi rbbi aḥlig‑ns.

⁶ walaynni takna‑ns faninna ar‑gis‑ṭṭnaẓ bahra, ar‑as‑tti‑tssṭiyar ašku iqqn‑as sidi rbbi aḥlig‑ns.

⁷ ar‑ijrru ġmkan kraygatt asggʷas. ġakud nna‑tiwn s‑tzdġt n‑sidi rbbi, ar‑gis‑ṭṭnaẓ takna‑ns, ar‑talla ḥanna, tagʷi a‑sul‑tšš.

⁸ yini‑as‑urgaz‑ns alqanah: «wa ḥanna, mah̬ a‑tallat? mah̬ aylliġ ur‑a‑tšttat? mah̬ ad‑bahra‑yuḍn‑uwl‑nm? ha nkki, is‑ur‑am‑ufġ mraw tarwa?»

⁹ tigira n‑mad‑ššan sun ġ‑šiluh, tnkr ḥanna tffuġ. tasaɛt‑an illa‑umsakmur ɛali, igawr f‑lkursi ġ‑tama n‑imi n‑tzdġt n‑sidi rbbi.

¹⁰ ṭiyr i‑ḥanna bahra, ar‑ttẓalla i‑sidi rbbi, ar‑talla zġ‑uwl‑ns ityagasn.

¹¹ tggall tagallit‑ad tini: «wa sidi rbbi n‑lmlayka, iġ‑trḍit a‑di‑tmnadt tassast n‑th̬ddamt‑nk, d‑iġ‑iyi‑di‑tswangmt ur‑iyi‑tettut, d‑iġ‑tzuydt tfkt i‑th̬ddamt‑nk yan‑uḥšmi, ra‑t‑ẓliġ a‑ig wink kullu ussan n‑tudrt‑ns, ur‑sar‑issmakkrḍ ih̬f‑ns.»

¹² lliġ tqama ar‑sul‑ttẓalla ġ‑umnid n‑sidi rbbi, han ɛali ar‑itmnad ġ‑imi n‑ḥanna.

¹³ nttat ar‑ttẓalla s‑uwl‑ns, ar‑tmussun infurn‑ns, walaynni ur‑isfld ɛali i‑kra n‑wawal. iġal is‑tga tamġart taskayriyt.

¹⁴ yini‑as ɛali: «mnšk a‑ra‑tqamat ġmka ar‑ttnufult s‑tissi? kkis fllam aman n‑waḍil issmlilliyn.»

¹⁵ trar‑as‑d ḥanna: «uhu a‑sidi, giġ tamġart mi‑tġufa rruḥ‑ns bahra. ur‑swiġ ma‑iktin ula ma‑issmlilliyn. ha‑yyi ar‑di‑ttffiġ ma‑illan ġ‑uwl‑inu ġ‑umnid n‑sidi rbbi.

¹⁶ ad‑ur‑tḥasbt tah̬ddamt‑nk zund mmu‑lɛar, ašku f‑tugtt n‑usmammi d‑tguḍi a‑f‑ssiġzifġ taẓallit.»

¹⁷ isawl ɛali yini‑as: «zayd s‑sslamt. ad‑am‑ifk rbbi n‑israyil maylli‑zġ‑gis‑tḍalbt.»

¹⁸ tini‑as: «ad‑afġ rrḍa ġ‑iẓri‑nk a‑sidi.» tffuġ‑tmġart ġakudan, ur‑sul‑ikrs‑uwdm‑ns, tddu ar‑tštta.

¹⁹ nkrn‑d zikk ṣbaḥ, šjdn ġ‑umnid n‑sidi rbbi, muddun ilmma s‑tgmmi‑nsn ġ‑rama. ikšm alqanah f‑tmġart‑ns ḥanna, d‑nttat iswangm‑tt‑id sidi rbbi.

²⁰ tffuġ ilmma ar‑trbbu, aylliġ tlkm luqt‑ns taru yan‑uḥšmi. tg‑as ism ṣamwil, ašku tnna: «ḍalbġ‑t zġ‑sidi rbbi.»

aẓlay n‑warraw i‑rbbi

²¹ izri ma‑izrin, yawn alqanah d‑kullu ayt‑tgmmi‑ns a‑n‑iġrṣ i‑tġrṣi n‑usggʷas f‑ism n‑sidi rbbi, issafu tagallit‑ns.

²² imma ḥanna ur‑didsn‑tmun. tnna i‑urgaz‑ns: «ard kksġ tibbišt i‑iwi, awiġ‑t ġakudan a‑n‑iḥaḍr ġ‑umnid n‑sidi rbbi, iqama‑n bdda ġin.»

²³ isawl‑d‑urgaz‑ns alqanah yini‑as: «skr aynna ifulkin ġ‑iẓri‑nm, tqlt ard‑as‑ukan‑tkkst tibbišt. nra ġir a‑yafu‑wawal sidi rbbi.» tqama‑tmġart ar‑tssngay yus aylliġ‑as‑tkkis tibbišt.

²⁴ lliġ‑as‑tti‑tkkis, tssawn‑t dids, wah̬h̬a sul imẓẓi. tawi yan‑umugay ikkan kraḍ isggʷasn, d‑lɛbrt n‑uggʷrn [20 litru], d‑tayddidt n‑waman n‑waḍil iktin, tsslkm‑t tazdġt n‑sidi rbbi ġ‑šiluh.

²⁵ ġrṣn ilmma i‑umugay, awin aḥšmi s‑dar ɛali.

²⁶ tini‑as: «wa sidi, f‑tudrt n‑rruḥ‑nk a‑sidi, nkkin a‑igan tamġart lli‑yadlli‑ibiddn ġid ġ‑dark ar‑tẓallaġ i‑sidi rbbi.

²⁷ aḥšmi‑ad ḍalbġ zġ‑sidi rbbi, ikmml‑iyi sidi rbbi taẓallit‑inu.

²⁸ ġmkan a‑f‑t‑ẓliġ i‑sidi rbbi. kullu ma‑ra‑ik ġ‑tudrt‑ns, hati ityawẓlay i‑sidi rbbi.» išjd ɛali ġakudan i‑sidi rbbi.