1 igldan 9 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awal n‑sidi rbbi i‑suliman

¹ lliġ ikmml suliman tabnnayt n‑tgmmi n‑sidi rbbi ula tigmmi n‑ugllid ula kullu ma‑s‑irḍa suliman a‑t‑iskr,

² iban‑d sidi rbbi i‑suliman tis snat‑twal, ġmklli‑as‑d‑iban ġ‑gibɛun.

³ yini‑as: «han sfldġ i‑tẓallit‑nk ula ma‑ttḍalabt ġ‑umnid‑inu, ẓliġ i‑ih̬f‑inu tigmmi‑ad lli‑tbnit. ra‑fllas‑yili ism‑inu bdda, qamant‑gis‑walln‑inu d‑uwl‑inu kullu mayd iftan.

⁴ imma kiyi, iġ‑a‑tfttut ġ‑umnid‑inu zund babak dawd s‑nniyt izgan d‑uwl iṣfan, iġ‑a‑tskart s‑kullu ma‑f‑k‑uṣṣaġ, ar‑tti‑ttawit ġ‑tnbaḍin d‑lḥkamat‑inu,

⁵ han rad‑zzgaġ lɛrš n‑tgldit‑nk f‑ayt‑israyil kullu mayd iftan, ġmklli‑s‑qawlġ i‑babak dawd iniġ‑as: ‹ur‑sar‑rad‑ak‑laḥ yan f‑lɛrš n‑israyil.›

⁶ walaynni iġ‑tffuġt zġ‑uġaras‑inu, kiyi nġd tarwa‑nk, iġ‑ur‑a‑stti‑ttawim ġ‑tnbaḍin d‑luṣiyat‑inu lli‑awn‑in‑mliġ, iġ‑tddam ar‑ttqasam id‑rbbi yaḍni ar‑asn‑ttsjadm,

⁷ han rad‑ssittiġ ayt‑israyil zġ‑wakal lli‑asn‑fkiġ, flġ tigmmi lli‑ẓliġ i‑ism‑inu, ard iwrri ig ism n‑israyil lɛar, ar‑srs‑rggmn iqbiln yaḍni i‑ngratsn.

⁸ ra‑tg‑tgmmi‑ad uh̬rib, itɛjjb gis wanna izrin, yut s‑unfus yini: ‹mah̬ a‑iskr sidi rbbi ġmkad i‑tmazirt‑ad d‑tgmmi‑ad?›

⁹ rarn‑as‑d ġakudan: ‹ašku fln rbbi siditsn lli‑d‑issufġn id‑babatsn zġ‑wakal n‑miṣr, ḍfurn id‑rbbi yaḍni ar‑asn‑tsjadn ar‑tn‑tqasan. ġayan a‑f‑d‑fllasn‑izzugz sidi rbbi‑nsn tagat‑ad išqan.› »