1 igldan 8 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ikšm ṣṣnduq s‑tgmmi n‑rbbi

¹ ġakudan issmun‑d suliman imġarn n‑ayt‑israyil, d‑kullu ih̬fawn n‑tqbilin, d‑inmġurn n‑tagʷmatin n‑ayt‑israyil, ad‑biddn ġ‑umnid n‑ugllid suliman ġ‑urušalim, baš ad‑d‑ssawnn ṣṣnduq n‑lɛhd n‑sidi rbbi zġ‑tmdint n‑dawd lli‑mi‑ttinin ‹ṣiyun›.

² munn‑d kullu irgazn n‑israyil s‑dar‑ugllid suliman ġ‑wass n‑lɛid ġ‑wayyur n‑‹aytanim› lli‑igan wis ssa n‑iyrn.

³ mattin‑d kullu imġarn n‑ayt‑israyil. nkrn imsakmurn asin‑d ṣṣnduq.

⁴ ssawnn‑d ṣṣnduq n‑lɛhd n‑sidi rbbi. ssawnn‑d ula ah̬iyyam n‑umnaggar, d‑irukutn imẓlayn lli‑illan ġ‑uh̬iyyam‑an. hatni imsakmurn d‑ayt‑lawi a‑tn‑d‑yusin.

⁵ ibidd‑ugllid suliman ġ‑lgddam n‑ṣṣnduq, nttan d‑kullu tamunt n‑israyil lli‑d‑dars‑imunn, ar‑qqrṣn i‑ihray d‑imugayn ggutnin, ur‑iẓḍar yan a‑tn‑iḥasb ula issn mnnaw ad‑gan.

⁶ zaydn ilmma imsakmurn, šškšmn ṣṣnduq n‑lɛhd n‑sidi rbbi s‑udġar‑ns, s‑tḥanut lli‑n‑illan kullu ġ‑ugʷns n‑tgmmi tamẓlayt, a‑stt‑igan d‑tḥanut ityawqdasn, ġ‑ddu ifrawn n‑lmh̬luqat tjhhdnin.

⁷ ašku lmh̬luqat‑an tjhhdnin fsrn ifrawn‑nsn f‑iggi n‑illiġ illa ṣṣnduq, ssmulun i‑ṣṣnduq d‑ikurayn‑ns.

⁸ ġzzifn ikurayn‑an aylliġ a‑di‑tbayyann ih̬fawn‑nsn ġ‑tḥanut tamẓlayt ġ‑lgddam n‑tḥanut ityawqdasn, walaynni ur‑a‑di‑tbayyann ġ‑brra. ilin ġin sul s‑ġassad.

⁹ ur‑illi yat ġ‑ṣṣnduq abla snat tilwaḥ n‑uẓru lli‑gis‑isrs musa ġ‑dar‑udrar n‑ḥurib, lliġ iskr sidi rbbi lɛhd d‑ayt‑israyil, ġakud lliġ‑d‑ffuġn zġ‑wakal n‑miṣr.

¹⁰ ffuġn‑d ilmma imsakmurn zġ‑tḥanut tamẓlayt, s‑ha yat‑tmdlut tɛmmr tigmmi n‑sidi rbbi.

¹¹ ur‑ẓḍarn imsakmurn ad‑biddn f‑twuri‑an f‑ssibt n‑tmdlut, ašku lmajd n‑sidi rbbi a‑iɛmmrn tgmmi n‑sidi rbbi.

idɛa suliman s‑lbaraka i‑mddn‑ns

¹² isawl suliman ġakudan yini: «ġayd izrin inna sidi rbbi: ‹rad‑zdġġ ġ‑umdlu illasn.›

¹³ s‑ṣṣaḥt bniġ‑ak ġilad yat‑tgmmi yattuyn ma‑ġ‑a‑tzddġt kullu mayd iftan.»

¹⁴ igrawl‑d‑ugllid ġakudan, idɛu s‑lbaraka i‑tamunt n‑ayt‑israyil kullutn, d‑ntni biddn ġin

¹⁵ izayd suliman yini: «ambarki a‑iga rbbi da‑illan ig rbbi n‑israyil lli‑issuwfan s‑ufus‑ns awal n‑imi‑ns lli‑s‑iqawl i‑baba dawd lliġ inna:

¹⁶ ‹zġ‑wass lli‑ġ‑d‑ssufġġ mddn‑inu n‑ayt‑israyil zġ‑miṣr, ur‑stiġ kra n‑tmdint ġ‑gr‑kullu tiqbilin n‑israyil a‑gis‑ttbnu‑tgmmi ma‑f‑a‑ittili ism‑inu. walaynni ẓliġ dawd a‑ig agllid f‑mddn‑inu n‑ayt‑israyil.›

¹⁷ han illa ġ‑uwl n‑baba dawd a‑ibnu yat‑tgmmi f‑ism n‑rbbi da‑illan ig rbbi n‑israyil.

¹⁸ imma sidi rbbi inna i‑baba dawd: ‹lliġ tnuwwat ġ‑uwl‑nk a‑tbnut yat‑tgmmi f‑ism‑inu, ifulki‑ak ma‑tnuwwat ġ‑uwl‑nk.

¹⁹ walaynni ur‑ra‑tbnut tigmmi‑an. ašku yuk lli‑rad‑dark‑ilal, nttan a‑ra‑ibnu tigmmi f‑ism‑inu.›

²⁰ hati ġilad issuwfa sidi rbbi awal‑ns izgan. ašku ġliġ nkki s‑lɛrš n‑israyil ġ‑udġar n‑baba dawd, ġmklli‑s‑inna sidi rbbi, bnuġ tigmmi f‑ism n‑rbbi da‑illan ig rbbi n‑israyil.

²¹ skrġ gis adġar i‑ṣṣnduq lli‑ġ‑illa lɛhd lli‑iskr sidi rbbi d‑id‑babatnġ, ġakud lliġ‑tn‑d‑issufġ zġ‑wakal n‑miṣr.»

taẓallit n‑suliman f‑tgmmi n‑rbbi

²² ibidd suliman ġ‑lgddam n‑tisi n‑tġrṣi n‑sidi rbbi, ġ‑umnid n‑kullu tamunt n‑ayt‑israyil. yall ifassn‑ns s‑ignwan

²³ yini: «wa rbbi da‑illan, wa rbbi n‑israyil, ur‑illi kra n‑rbbi zund kiyi ġ‑ignwan n‑uflla ula ġ‑wakal n‑iyzdar. tumẓt bdda ġ‑lɛhd‑nk, tssbayynt‑d tayri‑nk izgan i‑ih̬ddamn‑nk lli‑ifttun ġ‑umnid‑nk zġ‑ttmi n‑uwl‑nsn,

²⁴ tssafut awal lli‑s‑tqawlt i‑uh̬ddam‑nk baba dawd. tnnit‑t ġayn izrin s‑imi, tssafut‑t ġassad s‑ufus.

²⁵ ġilad a‑sidi rbbi, a‑rbbi n‑israyil, skr i‑uh̬ddam‑nk baba dawd maylli‑s‑as‑tqawlt lliġ‑as‑tnnit: ‹iġ‑a‑traran tarwa‑nk lɛaql s‑uġaras‑nsn, ar‑fttun ġ‑umnid‑inu ġmklli tfttut kiyi ġ‑umnid‑inu, ur‑sar‑rad‑ak‑laḥ yan a‑igawr ġ‑umnid‑inu f‑lɛrš n‑israyil.›

²⁶ ġilad a‑rbbi n‑israyil, ḍalbġ‑ak a‑tkmmlt awal‑nk lli‑s‑tqawlt i‑uh̬ddam‑nk baba dawd.

²⁷ «walaynni izd ṣṣaḥt ra‑izdġ rbbi ġ‑wakal? ha ignwan ula tattuyt n‑ignwan ur‑k‑uwmin, mamnk a‑ra‑k‑tamu‑tgmmi‑ad lli‑bniġ?

²⁸ walaynni sfld i‑tẓallit n‑uh̬ddam‑nk a‑sidi rbbi‑nu, tssḥssut s‑mayd‑zġ‑gik‑ḍalbġ ġassad ġ‑a‑yk‑aqraġ ar‑tẓallaġ ġ‑umnid‑nk.

²⁹ adj alln‑nk ad‑tmnadnt ġ‑iyḍ ula azal ġ‑tgmmi‑ad lli‑f‑tnnit ‹rad‑fllas‑yili ism n‑rbbi da‑illan,› f‑ad‑bdda‑tsflidt i‑tẓulla nna‑s‑a‑tẓallaġ s‑tsga lli‑s‑tlla‑tgmmi‑ad.

³⁰ sfld i‑ma‑itḍalab‑uh̬ddam‑nk ula mddn‑nk n‑ayt‑israyil, ġakud nna‑tẓallan s‑umnid n‑ġid. sflid ġ‑ignna lli‑igan tazdġt‑nk, d‑ġakud nna‑tsfldt, tṣamḥt‑aġ.

³¹ «iġ‑illa yan iskrn kra yʷh̬šnn ġ‑wayyaḍ, yini‑as a‑izzga awal‑ns s‑tgallit, iġ‑d‑yuška s‑tgmmi‑ad iggall ġ‑umnid n‑tisi n‑tġrṣi‑nk,

³² sfld kiyi ġ‑ignna, tkšmt tssnfaṣalt ih̬ddamn‑nk, tutt lḥukm f‑wanna iskrn lh̬ʷšant, trart fllas kullu ġaylli iskr yʷh̬šn, tbrrat wanna iṣlaḥn, tfkt‑as f‑ufulki‑ns.

³³ «iġ‑ttrẓan mddn‑nk n‑ayt‑israyil, inru‑tn‑unuwwaš‑nsn ašku ffuġn zġ‑uġaras‑nk, iġ‑d‑srk‑wrrin ar‑aqran i‑ism‑nk, ar‑tẓallan ar‑ki‑tḍalabn ġ‑tgmmi‑ad,

³⁴ sfld kiyi ġ‑ignna, tṣamḥt i‑ufuġ n‑mddn‑nk n‑ayt‑israyil, trart‑tn‑d s‑wakal‑ad lli‑tfkit i‑id‑babatsn.

³⁵ «iġ‑d‑fllasn‑qqnn ignwan, ibbi‑n‑unẓar ašku ffuġn zġ‑uġaras‑nk, iġ‑ẓẓullan ġakudan s‑umnid n‑ġid, ar‑aqran i‑ism‑nk, wrrin‑d zġ‑ufuġ‑nsn lli‑f‑tn‑tssknukit,

³⁶ sfld kiyi ġ‑ignna, tṣamḥt i‑ufuġ n‑ih̬ddamn‑nk n‑ayt‑israyil lli‑ganin mddn‑nk, tsslmdt‑asn aġaras iṣlaḥn a‑gis‑fttun, tfkt‑asn‑d anẓar f‑wakal‑ad‑nk lli‑tfkit i‑mddn‑nk a‑ig lwrt‑nsn.

³⁷ «iġ‑illa‑uġʷni ġ‑tmazirt nġd aṭṭan nġd aẓawaḍ nġd tilišt nġd tamurġi nġd tawkka, iġ‑igli‑unuwwaš imawn n‑tmdinin‑nsn, mknna tga tagat nġd tamaḍunt,

³⁸ iġ‑iḍalb yan ġ‑mddn‑nk n‑ayt‑israyil, nġd ar‑kullu‑srk‑aqran, yissan kraygatt yan ma‑yaġn ul‑ns imdi‑n srk ifassn‑ns s‑umnid n‑tgmmi‑ad,

³⁹ sfld kiyi ġ‑ignna lli‑igan tazdġt‑nk, tṣamḥt‑asn, trart‑d i‑kud yan f‑kullu iskkirn‑ns, kiyi da‑issnn ulawn‑nsn. ašku kiyi waḥduk a‑issnn ma‑illan ġ‑uwlawn n‑kullu tarwa n‑bnadm.

⁴⁰ ġmkan a‑s‑ra‑ki‑ttuqqarn kullu ussan n‑tudrt‑nsn ġ‑wakal‑ad lli‑tfkit i‑id‑babatnġ.

⁴¹ «ġmkan d‑ubrrani ula nttan, wah̬h̬a ur‑igi ġ‑mddn‑nk n‑ayt‑israyil, iġ‑d‑yuška zġ‑tmazirt yaggugn f‑a‑k‑itqasa.

⁴² ašku rad‑sfldn f‑ism‑nk imqqurn, d‑uġruḍ‑nk itjhhdn, d‑ufus‑nk imdin. iġ‑d‑yuška ar‑itẓalla s‑umnid n‑tgmmi‑ad,

⁴³ sfld kiyi ġ‑ignna lli‑igan tazdġt‑nk, tskrt‑as kullu ġmklli‑ak‑iḍalb, baš ad‑wrrin kullu iqbiln n‑ddunit issann ism‑nk, ar‑ki‑tuqqarn zund mddn‑nk n‑israyil, issann izd ism‑nk a‑illan f‑tgmmi‑ad lli‑bniġ.

⁴⁴ «iġ‑ffuġn mddn‑nk ad‑mmaġn d‑unuwwaš‑nsn ġ‑innas‑tn‑tuznt, iġ‑d‑grawln s‑umnid n‑tmdint‑ad lli‑tẓlit ula tigmmi‑ad lli‑bniġ f‑ism‑nk, ar‑tẓallan i‑rbbi siditsn,

⁴⁵ sfld kiyi ġ‑ignna i‑tẓallit‑nsn d‑maylli tḍalabn, tamẓt‑asn lḥqq‑nsn.

⁴⁶ «iġ‑skrn lh̬ʷšant ġ‑gratsn dik, ašku ur‑illi yan ur‑iskirn kra yʷh̬šnn, imil tġḍbt fllasn tsllmt‑tn ġ‑ufus n‑unuwwaš‑nsn, ard‑tn‑awin s‑iskraf s‑tmazirt n‑unuwwaš‑an, ig‑iyt mani yaggugn nġd mani yakmurn.

⁴⁷ iġ‑d‑rurn ulawn‑nsn s‑dark ġ‑tmazirt lli‑s‑tyattayn s‑iskraf, fln iskkirn‑nsn ʷh̬šnnin, ar‑k‑siggiln ġ‑wakal n‑unuwwaš‑nsn ar‑ttinin: ‹ha‑yaġ njla bahra zġ‑uġaras‑nk, nanf‑ak nskr ma‑yʷh̬šnn.›

⁴⁸ iġ‑d‑wrrin s‑uġaras‑nk zġ‑ttmi n‑uwl‑nsn d‑ttmi n‑ih̬f‑nsn, ġ‑wakal n‑unuwwaš lli‑tn‑yiwin s‑iskraf, ar‑ak‑tẓallan s‑umnid n‑wakal‑ad‑nsn lli‑tfkit i‑id‑babatsn, d‑umnid n‑tmdint‑ad lli‑tẓlit ula tigmmi‑ad lli‑bniġ f‑ism‑nk,

⁴⁹ sfld kiyi ġ‑ignna lli‑igan tazdġt‑nk i‑tẓallit‑nsn d‑maylli tḍalabn, tamẓt‑asn lḥqq‑nsn.

⁵⁰ tṣamḥt i‑mddn‑nk lli‑iskrn ma‑yʷh̬šnn ġ‑gratsn dik, tṣamḥt‑asn ġ‑kullu‑tkndawt lli‑s‑a‑ki‑tknadn, tfkt‑asn lḥnant ġ‑iẓri n‑willi‑tn‑yiwin s‑iskraf, baš a‑gisn‑ḥnnun.

⁵¹ ašku ntni a‑igan mddn‑nk d‑ayt‑tmazirt‑nk lli‑di‑tssufġt zġ‑miṣr, zġ‑ufarnu issfsayn uzzal.

⁵² «adj alln‑nk ad‑tmnadnt ġ‑maylli‑ak‑itḍalab‑uh̬ddam‑nk ula ġ‑maylli‑ak‑tḍalabn mddn‑nk n‑ayt‑israyil, ar‑asn‑sflidn imzgan‑nk ġakud nna‑yak‑aqran.

⁵³ ašku tẓlit‑tn zġ‑gr kullu iqbiln n‑ddunit f‑ad‑gn wink, a‑sidi rbbi da‑bdda‑illan, ġmklli‑s‑tnnit f‑ufus n‑uh̬ddam‑nk musa ġakud lliġ‑di‑tssufġt id‑babatnġ zġ‑miṣr.»

yuṣṣa suliman mddn‑ns

⁵⁴ ġmkan a‑yull suliman taẓallit‑ns d‑ddɛut‑ns i‑sidi rbbi, d‑nttan yutš f‑ifaddn‑ns ġ‑lgddam n‑tisi n‑tġrṣi, imdi‑n ifassn‑ns s‑ignwan. inkr‑d ilmma

⁵⁵ ibidd, yall awal‑ns idɛu s‑lbaraka i‑kullu tamunt n‑israyil yini:

⁵⁶ «ambarki a‑iga sidi rbbi lli‑d‑ifkan asunfu i‑mddn‑ns n‑ayt‑israyil, issafu kullu ma‑s‑inna. ur‑iḍr ḥtta yan‑wawal zġ‑iwaliwn fulkinin lli‑s‑iqawl f‑ufus n‑uh̬ddam‑ns musa.

⁵⁷ imma ġilad, ḍalbġ ad‑didnġ‑yili rbbi siditnġ, ġmklli illa d‑id‑babatnġ. a‑ur‑aġ‑sar‑ifl ula iwrri fllanġ.

⁵⁸ ad‑aġ‑d‑bdda‑itrara ulawn‑nġ s‑dars, f‑ad‑bdda‑nfttu ġ‑iġarasn‑ns, ar‑tt‑ntawi ġ‑luṣiyat‑ns d‑tnbaḍin‑ns d‑lḥkamat‑ns lli‑f‑yuṣṣa id‑babatnġ.

⁵⁹ ad‑attuyn iwaliwn‑ad lli‑s‑ḍalbġ ġ‑umnid n‑sidi rbbi, qaman ġ‑dar rbbi siditnġ ġ‑iyḍ ula azal. a‑yamẓ lḥqq i‑uh̬ddam‑ns ula lḥqq i‑mddn‑ns n‑ayt‑israyil ass f‑wass mknna iḥtajja‑wass‑an.

⁶⁰ ġmkan a‑s‑rad‑kullu‑issann iqbiln n‑ddunit izd rbbi siditnġ a‑igan rbbi n‑ṣṣaḥt, issann is‑ur‑illi abla nttan.

⁶¹ amẓat ġilad ġ‑rbbi siditnġ s‑nniyt n‑uwl‑nun izgan, ar‑bdda‑tfttum f‑tnbaḍin‑ns, ar‑bdda‑tskarm s‑luṣiyat‑ns, ġmklli tnuwwam ġassad.»

⁶² iġrṣ‑ilmma‑ugllid d‑kullu ayt‑israyil ġ‑umnid n‑sidi rbbi.

⁶³ ifk suliman tiġrṣiw n‑sslamt i‑sidi rbbi, gant sin id‑mraw d‑sin n‑walf (22 000) n‑umugay, d‑miyya d‑sin id‑mraw n‑walf (120 000) n‑uwlli. ġmkan a‑s‑iẓli‑ugllid d‑kullu ayt‑israyil tigmmi‑an i‑rbbi da‑bdda‑illan.

⁶⁴ izayd‑ugllid ġassan, iẓli‑as ula ġ‑usarag, adġar lli‑illan ġ‑umnid n‑tgmmi n‑sidi rbbi, issattuy gis tiġrṣiw jdrnin ula imndi ula tadunt n‑sslamt. ašku tmẓẓi tisi n‑wanas lli‑illan ġ‑lgddam n‑tgmmi n‑sidi rbbi, ur‑tuwmi isakmurn‑an jdrnin d‑win imndi ula tadunt n‑sslamt.

⁶⁵ ġmkan a‑izzri suliman lɛid ġ‑umnid n‑sidi rbbi, nttan d‑kullu ayt‑israyil. munn‑d s‑kigan zġ‑kraygatt tasga, zġ‑imi n‑ḥamat ar asif n‑miṣr, qaman ġ‑umnid n‑rbbi siditnġ ssa n‑uwssan.

⁶⁶ wis tam‑uwssan yadj mddn‑an ad‑wrrin s‑darsn. dɛun kullu s‑lbaraka i‑ugllid, iftu kud yan s‑illiġ izdġ. frḥn fjjijn‑uwlawn‑nsn f‑kullu ifulkitn lli‑iskr sidi rbbi ġ‑uh̬ddam‑ns dawd d‑mddn‑ns n‑ayt‑israyil.