1 igldan 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

taḥkimt n‑suliman ula timih̬ar‑ns

²⁰ ġ‑uwssan‑an ar‑ttigatn ayt‑yahuda d‑ayt‑israyil aylliġ gan zund amlal n‑tama n‑umda, ar‑šttan ar‑ssan ar‑tfraḥn.

²¹ iḥkam suliman f‑kullu timizar zġ‑wasif n‑furat ar akal n‑ayt‑filisṭin, ula ar iwtta n‑miṣr. ar‑as‑di‑tawin ayt‑tmizar‑an ḍḍabiyt, ilin ġ‑ddu‑ufus‑ns kullu ussan n‑tudrt‑ns.

²² ass f‑wass ar‑ištta suliman d‑mddn‑ns uggʷar n‑sḍis id‑walf (6000) litru n‑ibrin, d‑uggʷar n‑kraḍ d‑mraw n‑id‑walf (13 000) litru n‑uggʷrn,

²³ d‑mraw imugayn ḍninin, d‑sin id‑mraw (20) n‑umugay n‑tiyssa, d‑miyya n‑uhruy. ilin ula izʷnkaḍ d‑tzʷnkaḍin d‑ma‑tn‑irwasn, ilin ula ifullusn ḍninin.

²⁴ ašku iḥkam nttan f‑kullu timizar zġ‑wasif n‑furat ar tisgiw lli‑ġ‑a‑n‑teṭar tafukt, zġ‑tmdint n‑tifsaḥ ar tin ġazza. ilin kullu igldan‑an ġ‑ddu‑ufus‑ns zġ‑wasif n‑furat ar amṭar n‑tafukt, tili‑as sslamt gras d‑willi‑as‑isutln zġ‑kraygatt tasga.

²⁵ zdġn ayt‑yahuda d‑ayt‑israyil ġ‑laman, kraygatt yan ġ‑ddu ddilit‑ns ula ġ‑ddu tazart‑ns, zġ‑ttmi n‑dan ar ttmi n‑bir‑šibaɛ kullu ussan n‑suliman.

²⁶ ilin kkuẓ id‑mraw n‑walf (40 000) n‑wayyis n‑lkurriṣa ġ‑rrwa n‑suliman, d‑sin d‑mraw n‑walf (12 000) n‑wayyis n‑umnay.

²⁷ willi‑n‑iga d‑lḥukkam f‑tmizar‑an ar‑di‑tawin amššu i‑ugllid suliman, kud yan d‑wayyur‑ns, baš a‑ištta‑ugllid suliman d‑usmun‑ns kullut. ur‑ḥtajjan yat.

²⁸ ar‑di‑tawin ula ṭumẓin d‑walim i‑iysan ṣḥanin d‑wid fssusnin ġ‑idġarn‑nsn, kud yan d‑twala‑ns.

²⁹ ifk rbbi i‑suliman taḥkimt d‑tfhimt yugʷrn lqyas, ifk‑as lɛaql yusɛan, zund amlal n‑tama n‑umda.

³⁰ taḥkimt n‑suliman tugʷr taḥkimt n‑kullu ayt‑tmizar ġ‑tsgiw n‑usġlay n‑tafukt ula kullu taḥkimt n‑ayt‑miṣr.

³¹ ašku ar‑itfham uggʷar n‑kullu mddn, uggʷar n‑aytan gu‑azraḥ, d‑hayman d‑kalkul d‑dardaɛ tarwa n‑maḥul. ityawssan nttan ġ‑gr kullu iqbiln lli‑as‑isutln.

³² isawl s‑kraḍ id‑walf (3000) n‑umrwas. issmurg alf d‑smmus (1005) n‑umarg.

³³ ar‑isawal f‑kullu ma‑igan aṣġar, zġ‑idgl lli‑inkkrn ġ‑lubnan, ar azukkʷni lli‑d‑itmġayn ġ‑iġʷrban. ar‑isawal f‑lhyuš d‑igḍaḍ d‑ifaġrn d‑islman.

³⁴ ar‑di‑ttaškin mddn zġ‑kullu iqbiln ad‑sflidn i‑tḥkimt n‑suliman, ula zġ‑dar kullu igldan n‑ddunit lli‑isfldn f‑tḥkimt‑ns.