1 igldan 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

suliman iḍalb tafhimt

¹ iskr suliman lɛhd n‑littihal d‑firɛawn agllid n‑miṣr. yawi‑d illis n‑firɛawn s‑tmdint n‑dawd, tzdġ gis aylliġ tkmml‑tbnnayt n‑tgmmi n‑ugllid d‑tgmmi n‑sidi rbbi d‑ugadir lli‑ra‑isslulliy i‑urušalim.

² ġ‑uwssan‑an ar‑sul‑qqrṣn mddn f‑ikʷrkar ġ‑iggi n‑iwrar, ašku ur‑ta‑ttbni‑tgmmi f‑ism n‑rbbi da‑bdda‑illan.

³ suliman ira sidi rbbi bahra, iḍfur luṣiyat n‑babas dawd, walaynni ar‑iqqrṣ ar‑itbh̬h̬ar ġ‑iggi n‑iwrar.

⁴ yan‑wass idda suliman s‑gibɛun a‑n‑iġrṣ, ašku ġin a‑ġ‑illa‑ukrkur ihiyyan. imyur suliman a‑n‑issakmur alf n‑tġrṣi ijdrn f‑ukrkur‑an.

⁵ iban‑d sidi rbbi i‑suliman ġ‑gibɛun, ġ‑yat‑twargit ġ‑iyḍ, yini‑as rbbi: «ḍalb kra trit ad‑ak‑t‑fkġ.»

⁶ yini‑as suliman: «ġayd izrin tskrt d‑uh̬ddam‑nk baba dawd s‑tayri idumn izgan, ašku ar‑ifttu ġ‑umnid‑nk s‑nniyt iṣfan d‑uwl iġusn d‑wawal inmn, yamẓ bdda gik. kiyi tqamat dids s‑tayri‑nk iggutn izgan, tfkt‑as arraw a‑igawr ġassad f‑lɛrš‑ns.

⁷ ġilad a‑sidi rbbi‑nu tgit‑iyi d‑ugllid, nkki ah̬ddam‑nk, ġ‑udġar n‑baba dawd, wah̬h̬a sul mẓẓiġ nkki, ur‑ta‑ssinġ mamnk a‑tffuġġ ula mamnk a‑kššmġ.

⁸ hay‑ah̬ddam‑nk ġ‑wammas n‑mddn‑nk lli‑tẓlit i‑ih̬f‑nk. gn ntni aqbil imqqurn. ur‑iẓḍar yan a‑iḥasb tugtt‑nsn ula issn mnšk ad‑gan.

⁹ f‑mayan a‑f‑ak‑ḍalbġ ġilad, a‑tfkt i‑uh̬ddam‑nk lɛaql itfhamn, baš ad‑issanġ mamnk ad‑tḥkamġ f‑mddn‑nk, ar‑ẓlayġ ma‑ifulkin zġ‑ma‑yʷh̬šnn. ašku ma‑iẓḍarn a‑iḥkam f‑uqbil‑ad‑nk ihiyyan?»

¹⁰ irḍu siditnġ s‑wawal n‑suliman lli‑s‑as‑iḍalb mayan.

¹¹ yini‑as rbbi: «lliġ tḍalbt mayan, ur‑tḍalbt tiġzi n‑tudrt nġd tugtt n‑wayda i‑ih̬f‑nk, nġd lmut i‑inuwwašn‑nk, lliġ tḍalbt tafhimt a‑tissant ma‑yʷġẓann,

¹² rad‑ak‑skrġ ġilad s‑wawal‑nk. hati fkiġ‑ak lɛaql a‑ttfhamt ar‑tẓẓmẓlayt uggʷar n‑kullu ma‑k‑izwurn ula kullu ma‑rad‑ak‑iggru,

¹³ fkġ‑ak ula maylli ur‑tḍalbt, a‑t‑igan d‑wayda d‑ššan sinitsn. ur‑ra‑yili zund kiyi ġ‑gr igldan kullu ussan‑nk.

¹⁴ d‑iġ‑a‑bdda‑tfttut ġ‑iġarasn‑inu, ar‑tskart s‑tnbaḍin d‑luṣiyat‑inu zund babak dawd, han rad‑ak‑ssigatġ ussan‑nk.»

¹⁵ ifaq‑d suliman ġakudan zġ‑iyṭs, yissan izd tawargit ayan. yašk‑id s‑urušalim, ibidd ġ‑lgddam n‑ṣṣnduq n‑lɛhd n‑sidi rbbi, issattuy tiġrṣiw jdrnin d‑isakmurn n‑sslamt, iskr imkli imqqurn i‑ih̬ddamn‑ns kullutn.

awal n‑suliman i‑snat‑tmgganin

¹⁶ ttaġ‑d snat‑tmgganin uškant‑d biddnt ġ‑umnid n‑ugllid.

¹⁷ tsawl‑d yat gisnt tini: «wa sidi, nzdġ nkki d‑tmġart‑ad ġ‑yat‑tgmmi. aruġ arraw, d‑nttat tlla didi ġ‑tgmmi.

¹⁸ zrin kraḍ‑uwssan s‑turu‑tmġart‑ad ula nttat. ng waḥduyaġ ġ‑tgmmi, ur‑darnġ yan abla nkkʷninti s‑snat.

¹⁹ imil immt d‑iyḍ yus n‑tmġart‑ad, ašku tgn tgllb fllas.

²⁰ tnkr ilmma ġ‑tuẓẓunt n‑iyḍ, sul ṭṭasġ nkki, tsrs yus lli‑immutn f‑tibbišt‑inu, tasi‑d iwi zġ‑tama‑nu, tsrs‑t‑in f‑tibbišt‑ns.

²¹ lliġ‑d‑nkrġ zikk ṣbaḥ ad‑ssngiġ iwi, afġ‑t‑in immut. akʷzġ‑t ilmma is‑ur‑igi iwi lli‑uruġ.»

²² tsawl‑d tis snat ġakudan trar‑as: «uhu, ġwad iddrn a‑igan winu. walli immutn a‑igan winm.» trar‑as ṭayyaḍ: «uhu, iwi ayd iddrn. yum a‑immutn.» ġmkan a‑s‑a‑ttinint ġ‑umnid n‑ugllid.

²³ isawl‑d‑ugllid yini: «ha yat ar‑ttini: ‹iwi a‑iddrn, yum a‑immutn.› ṭayyaḍ ar‑ttini: ‹uhu, yum a‑immutn, iwi a‑iddrn.› »

²⁴ yini‑ilmma‑ugllid: «awyat‑iyi‑d yat‑tuzzalt.» awin‑d tuzzalt i‑ugllid.

²⁵ yamr‑ugllid ġakudan: «bḍwat‑asnt arraw f‑mnaṣṣ. fkat mnaṣṣ i‑yat, tfkm mnaṣṣ yaḍni i‑ṭayyaḍ.»

²⁶ tsawl‑d‑tmġart lli‑mi‑iddr‑warraw, nttat tḥnna ġ‑yus bahra, tini i‑ugllid: «wa sidi, fk‑as wad iddrn. a‑ur‑ti‑tnġt.» imma ṭayyaḍ trur‑d: «a‑ur‑ig winm ula winu. bḍwat‑t.»

²⁷ isawl‑d‑ugllid ġakudan yamr‑tn: «fkat arraw iddrn i‑tmġart tamzwarut. a‑ur‑ti‑tnġm. ašku nttat a‑igan innas.»

²⁸ sfldn kullu ayt‑israyil f‑tnbaṭṭ‑an lli‑s‑iḥkam‑ugllid, ar‑ti‑tuqqarn bahra ašku ẓran is‑as‑ifka rbbi taḥkimt a‑izzga lḥqq.