1 igldan 21 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

urti n‑waḍil lli‑igan win nabut

¹ yan‑uwrti n‑waḍil illa ġ‑tama n‑tgmmi n‑aḥab agllid n‑samira, ig urti‑an win nabut gu‑izraɛil.

² yan‑wass isawl aḥab s‑nabut yini‑as: «fk‑iyi urti‑ad n‑waḍil a‑gis‑skrġ tibḥirt n‑lh̬ʷḍrt, ašku yakmur‑d s‑tgmmi‑inu. rad‑ak‑tt‑ssnflġ s‑ma‑t‑yufn ġ‑uwrtan n‑waḍil. nġd iġ‑trit, rad‑ak‑fkġ atig‑ns s‑iqaridn.»

³ isawl‑d nabut irar‑as: «a‑yyi‑iḥṣar sidi rbbi a‑ur‑ak‑fkġ lwrt n‑id‑baba.»

⁴ iwrri aḥab s‑tgmmi‑ns iqlaql, iqama‑gis‑wawal n‑nabut gu‑izraɛil lli‑s‑as‑inna: «ur‑rad‑ak‑fkġ lwrt n‑id‑baba.» iẓl f‑tisi‑ns, irar udm‑ns s‑uġʷrab, yagʷi a‑sul‑išš.

⁵ tkšm‑n‑dars‑tmġart‑ns izabal tsqsa‑t: «ma‑k‑yaġn aylliġ tqlaqlt tagʷit a‑tššt?»

⁶ yini‑as: «ašku sawlġ s‑nabut gu‑izraɛil nniġ‑as: ‹zznz‑iyi urti‑nk n‑waḍil. nġd iġ‑trit, ad‑ak‑tt‑ssnflġ s‑ma‑t‑yufn ġ‑uwrtan n‑waḍil.› irar‑iyi‑d: ‹ur‑rad‑ak‑t‑fkġ.› »

⁷ tsawl‑d izabal tini‑as: «izd kiyin a‑igan agllid f‑israyil nġd uhu? nkr tššt, tfjjijt f‑ih̬f‑nk. rad‑ak‑fkġ urti n‑nabut gu‑izraɛil.»

⁸ tzayd izabal tara tibratin s‑ism n‑aḥab, tršm‑tnt s‑rršm‑ns, tazn‑tnt i‑imġarn d‑inmġurn n‑tmdint lli‑ġ‑izdġ nabut.

⁹ tara ġ‑tbratin‑an: «brrḥat s‑uẓum, tssbiddm nabut ġ‑umnid n‑mddn,

¹⁰ tawim‑d sin id‑bu‑ijrman ad‑srs‑aštkkan, fkn fllas tuggʷa inin: ‹ha kiyi trgmt rbbi d‑ugllid.› tssufġm‑t‑in ilmma, ar‑ti‑tkkatm s‑iẓran ard immt.»

¹¹ ddun imġarn d‑inmġurn d‑ayt‑tmdint‑ns, skrn ġmklli‑s‑asn‑tnna izabal ġ‑tbratin.

¹² brrḥn s‑uẓum, ssbiddn nabut ġ‑umnid n‑mddn,

¹³ aškin‑d sin id‑bu‑ijrman ar‑srs‑taštkkan. zaydn id‑bu‑ijrman‑an fkn fllas tuggʷa ġ‑umnid n‑kullu mddn, ar‑ttinin: «han nabut irgm rbbi d‑ugllid.» ssufġn‑t ġakudan s‑brra n‑tmdint, ar‑t‑kkatn s‑iẓran aylliġ immut.

¹⁴ aznn s‑izabal inin‑as: «han nabut nrjm‑t s‑iẓran immt.»

¹⁵ lliġ tsfld izabal is‑ittut nabut s‑iẓran immt, tini i‑aḥab: «nkr tamẓt urti n‑waḍil lli‑s‑yagʷi nabut gu‑izraɛil ad‑ak‑t‑izznz. ašku nabut ur‑sul‑iddr, han immut.»

¹⁶ lliġ isfld aḥab is‑immut nabut, inkr ihuwwd s‑uwrti n‑nabut gu‑izraɛil a‑t‑yamẓ i‑ih̬f‑ns.

awal n‑rbbi i‑ugllid aḥab

¹⁷ yašk‑id‑wawal n‑sidi rbbi ġakudan s‑iliyah gu‑tišbi yini‑as:

¹⁸ «nkr thuwwdt a‑n‑tmnaggart aḥab lli‑igan agllid n‑israyil ġ‑samira. hatin illa ġ‑uwrti n‑waḍil n‑nabut, ihuwwd srs a‑t‑yamẓ i‑ih̬f‑ns.

¹⁹ sawl srs tinit‑as: ‹ha ma‑inna sidi rbbi: is‑ur‑tnġit takʷrt?› tinit‑as daġ: ‹ha mad‑ak‑d‑inna sidi rbbi: ġ‑illiġ llġn‑iyḍan idammn n‑nabut, ġin a‑ġ‑rad‑llġn‑iyḍan idammn‑nk ula kiyi.› »

²⁰ yini aḥab i‑iliyah: «is‑iyi‑tufit ay‑anuwwaš‑inu?» irar‑as: «ufiġ‑k ašku tzznzit ih̬f‑nk a‑tskrt ma‑yʷh̬šnn ġ‑iẓri n‑sidi rbbi.

²¹ han rad‑fllak‑zzugzġ lhalak, fnuġ kullu amud‑nk, bbiġ kullu iwtman zġ‑ayt‑aḥab, gn‑iyt uḍɛifn nġd imdwas, ġ‑wakal n‑israyil.

²² rad‑rarġ tasut‑nk a‑tg zund tasut n‑yarabɛam yus n‑nabaṭ, d‑zund tasut n‑baɛša yus n‑aḥiyah, ašku tssṭiyrt‑iyi‑tt tjlut ayt‑israyil bahra.»

²³ yini daġ sidi rbbi f‑izabal: «han iḍan a‑ra‑išš izabal ġ‑ugʷns n‑ugadir n‑izraɛil.

²⁴ han wanna immutn ġ‑ayt‑aḥab ġ‑tmdint, ra‑t‑ššn‑iyḍan. wanna immutn ġ‑ayt‑aḥab ġ‑brra, ra‑t‑ššn igḍaḍ n‑ignwan.»

²⁵ ur‑jji‑illi ma‑izznzan ih̬f‑ns zund aḥab lli‑tldi‑tmġart‑ns izabal f‑a‑iskar ma‑yʷh̬šnn ġ‑iẓri n‑sidi rbbi.

²⁶ ar‑itsala ġaylli bahra ijlh̬n lliġ iḍfur laṣnam, ġmklli yadlli skarn ayt‑amur lli‑iṭṭay sidi rbbi ġ‑lgddam n‑ayt‑israyil.

²⁷ lliġ isfld aḥab i‑iwaliwn‑an, ibbi timlsit‑ns, ils lh̬iš i‑ddat‑ns yaẓum. iqama ar‑iggan s‑lh̬iš ar‑izzigiz s‑twada iẓẓayn.

²⁸ yašk‑id‑wawal n‑sidi rbbi s‑iliyah gu‑tišbi yini‑as:

²⁹ «is‑tẓrit mamnk a‑issdulla aḥab ih̬f‑ns ġ‑umnid‑inu? lliġ issdulla ih̬f‑ns ġ‑umnid‑inu, ur‑ra‑n‑zzugzġ lhalak ġ‑uwssan‑ns, walaynni ġ‑uwssan n‑yus a‑ġ‑ra‑n‑zzugzġ lhalak f‑ayt‑aḥab.»