1 igldan 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

dawd yuṣṣa yus suliman

¹ lliġ akmurn‑uwssan a‑immt dawd, yuṣṣa yus suliman yini‑as:

² «imikk rad‑munġ d‑uġaras n‑kullu ma‑illan ġ‑ddunit. g‑n tiqqi‑nk tgt argaz.

³ skar s‑kullu ma‑f‑k‑yuṣṣa rbbi sidik, ar‑tfttut ġ‑iġarasn‑ns, ar‑ttlhut s‑tnbaḍin‑ns d‑luṣiyat‑ns d‑lḥkamat‑ns d‑tuggʷa‑ns ġmklli kullu ityaran ġ‑ulmmud n‑musa. ġmkan a‑s‑ra‑ttnjaḥt ġ‑kullu ma‑tskart ula kullu manis a‑ttidut,

⁴ f‑a‑izzga sidi rbbi awal lli‑flla‑inna: ‹iġ‑a‑traran tarwa‑nk lɛaql s‑uġaras‑nsn, ar‑fttun ġ‑umnid‑inu s‑nniyt izgan zġ‑ttmi n‑uwl‑nsn d‑ttmi n‑ih̬f‑nsn, ur‑sar‑rad‑ak‑laḥ yan f‑lɛrš n‑israyil.› »

lmut n‑dawd

¹⁰ immt ilmma dawd, ign ġ‑gr id‑babas, ityawmḍal ġ‑tmdint n‑dawd [urušalim].

¹¹ ikka‑tt‑in iga agllid f‑ayt‑israyil kkuẓ id‑mraw (40) n‑usggʷas. iḥkam ġ‑ḥabrun ssa n‑isggʷasn, iḥkam ġ‑urušalim kraḍ id‑mraw d‑kraḍ (33) n‑usggʷas.

¹² iġli suliman s‑lɛrš n‑babas dawd, tzga‑tgldit‑ns trṣu.