1 igldan 19 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

irwl iliyah s‑lh̬la

¹ ar‑yaddr aḥab i‑izabal kullu maylli iskr iliyah ula mamnk a‑inġa kullu lanbiya s‑tuzzalt.

² tazn izabal yan‑urqqas s‑iliyah tini‑as: «ggulliġ s‑id‑rbbi a‑yyi‑ɛddbn s‑uggʷar, iġ‑ur‑ak‑skirġ ġmklli‑asn‑tskrt. ra‑tmmtt kiyi ur‑ta‑tlkim tasaɛt‑ad azkka.»

³ yiksaḍ iliyah, irwl ar‑itazzal a‑ijjnjm tudrt‑ns, aylliġ ilkm bir‑šibaɛ ġ‑wakal n‑yahuda, ifl gis ah̬ddam‑ns.

⁴ izayd nttan waḥdut, iftu ġ‑lh̬la tawada n‑wass, aylliġ‑n‑ilkm yat‑tṣġart n‑tlggutt, iskiws ġ‑ddawas, yiri a‑immt yini: «yuwda‑yyi ġunškad a‑sidi rbbi. asi tudrt‑inu, ašku ha‑yyi ur‑ufġ id‑baba.»

⁵ iẓl ġ‑ddu‑tṣġart‑an n‑tlggutt iṭṭas. s‑ha yan lmalak iggr‑as yini‑as: «nkr tššt.»

⁶ imnad ġakudan s‑iẓra ġ‑tama n‑ih̬f‑ns yat‑tngult n‑tannurt d‑yat‑tbʷqqalt n‑waman. išš isu, ign daġ.

⁷ imikk s‑d‑iwrri lmalak n‑sidi rbbi tis snat‑twal, iggr‑as yini‑as: «nkr tššt. han iġzzif‑fllak‑uġaras.»

⁸ inkr išš isu, ar‑ifttu s‑tdwast n‑tirmt‑an kkuẓ id‑mraw (40) n‑wass azal wala iḍ, aylliġ ilkm ḥurib lli‑igan adrar n‑rbbi.

isawl‑d sidi rbbi s‑iliyah

⁹ ikšm s‑yan ifri ġin, igawr gis. hay‑awal n‑sidi rbbi yuška‑d srs yini‑as: «ma‑tskart ġid a‑iliyah?»

¹⁰ yini‑as: «ha‑yyi ar‑iyi‑bahra‑tkkat tunfust f‑rbbi da‑illan ig rbbi n‑lmlayka. ašku ayt‑israyil fln lɛhd‑nk, h̬lun ikʷrkar‑nk, nġn lanbiya‑nk s‑tuzzalt. ha nkki waḥduyy a‑iqaman, ula nkki ar‑sri‑siggiln a‑yyi‑kksn tudrt‑inu.»

¹¹ irar‑as‑d: «ffuġ tbiddt f‑udrar ġ‑umnid n‑rbbi sidik.» izri sidi rbbi ġakudan. inkr‑d‑waḍu itjhhdn iqjrn, yut idrarn, irẓ ijarifn ġ‑umnid n‑sidi rbbi. walaynni sidi rbbi ur‑illi ġ‑waḍu. lliġ izri‑waḍu, indudi‑wakal s‑jjhd, walaynni sidi rbbi ur‑illi ġ‑undudi.

¹² lliġ izri‑undudi, ttabɛa‑t‑id lɛafiyt ijddrn, walaynni sidi rbbi ur‑illi ġ‑lɛafiyt. lliġ tzri lɛafiyt, itabɛa‑tt‑id imikk n‑wawal ifssusn ithnnan.

¹³ lliġ‑as‑isfld iliyah, idl udm‑ns s‑uslham‑ns, iffuġ ibidd ġ‑imi n‑ifri, s‑as‑d‑yuška yan‑wawal isqsa‑t: «ma‑tskrt ġid a‑iliyah?»

¹⁴ ijawb nttan yini: «ha‑yyi ar‑iyi‑bahra‑tkkat tunfust f‑rbbi da‑illan ig rbbi n‑lmlayka. ašku ayt‑israyil fln lɛhd‑nk, h̬lun ikʷrkar‑nk, nġn lanbiya‑nk s‑tuzzalt. ha nkki waḥduyy a‑iqaman, ula nkki ar‑sri‑siggiln a‑yyi‑kksn tudrt‑inu.»

¹⁵ yini‑as‑d sidi rbbi: «ddu twrrit ġ‑uġaras lli‑di‑tkkit, tmunt dids ar lh̬la n‑dimašq. ġakud nna‑n‑truḥt, tẓẓġurt gis ḥazayil a‑ig agllid f‑ayt‑aram,

¹⁶ tẓẓġurt yahu yus n‑nimši a‑ig agllid f‑ayt‑israyil, tẓẓġurt ališaɛ yus n‑šafaṭ gu‑abal‑maḥulah a‑ig nnabi tigira‑nk.

¹⁷ wanna injmn zġ‑tuzzalt n‑ḥazayil, inġ‑t yahu. wanna injmn zġ‑tuzzalt n‑yahu, inġ‑t ališaɛ.

¹⁸ walaynni rad‑adjġ ġ‑ayt‑israyil ssa n‑id‑walf (7000) ur‑jji‑n‑kʷnin i‑‹baɛl› wala ssudnn‑t.»

imnaggar iliyah d‑ališaɛ

¹⁹ iffuġ‑d iliyah ġakudan zġ‑ġin. yaf‑n ališaɛ yus n‑šafaṭ, d‑nttan ar‑ikkrz ġ‑tasaɛt‑an s‑snat d‑mrawt (12) n‑tyuga n‑umugay ġ‑umnid‑ns, imun ntta d‑tis snat d‑mrawt. izri iliyah s‑dars, iluḥ‑n fllas aslham‑ns.

²⁰ ifl ališaɛ imugayn, yazzl iḍfur iliyah yini‑as: «ġir adj‑iyi ad‑dduġ ssudnġ‑n baba d‑inna, munġ ilmma dik.» irar‑as: «wrri. mad‑ak‑skrġ nkki?»

²¹ igrawl ališaɛ iddu, yasi sin imugayn‑an iġrṣ‑asn, issnu tifiyi‑nsn ġ‑waman s‑ikššuḍn n‑tyuga, ibḍu‑tt i‑mddn‑ns ar‑kullu‑šttan. inkr ilmma imun d‑iliyah ar‑as‑itɛawan.