1 igldan 18 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

imnaggar iliyah d‑ugllid aḥab

¹ zrin‑uwssan ggutnin, ar wis kraḍ isggʷasn, yašk‑id‑wawal n‑sidi rbbi i‑iliyah yini‑as: «ddu tbant‑n s‑aḥab, s‑n‑uznġ anẓar f‑wakal.»

² inkr iliyah iftu a‑n‑iban i‑aḥab. ġ‑uwssan‑an illa‑uġʷni išqan ġ‑tmazirt‑an n‑samira.

³ iġr‑d aḥab i‑ɛubadyah lli‑illan f‑tgmmi‑ns. ɛubadyah iga wad bahra ituqqarn sidi rbbi.

⁴ lliġ a‑tnqqa izabal lanbiya n‑sidi rbbi, yawi ɛubadyah miyya n‑nnabi issrgs‑tn, smmus id‑mraw (50) i‑ifri, ar‑asn‑yakka aġrum d‑waman.

⁵ yini aḥab i‑ɛubadyah: «zayd tsslakat tamazirt kullutt, tsigglt s‑talɛinin ula talatin, a‑ur‑imil naf kra n‑tuga mad‑šttan‑iysan d‑isrdan a‑ur‑kullu‑mmtnt lbhaym.»

⁶ ġmkan a‑s‑bḍan tamazirt i‑ngratsn a‑stt‑kullu‑sslakan. iddu aḥab s‑yat‑tsga, iddu ɛubadyah s‑ṭayya.

⁷ lliġ ifta ɛubadyah ġ‑uġaras, ha iliyah imnaggar‑t. yakʷz‑t ɛubadyah, iknu s‑wakal ġ‑umnid‑ns, isqsa‑t: «izd kiyin aya, a‑sidi iliyah?»

⁸ yini‑as: «nkkin ayad. wrri tinit i‑sidik: ‹ha iliyah illa ġid.› »

⁹ irar‑as‑d: «man lɛib gigi illan a‑sidi, aylliġ trit a‑yyi‑n‑tluḥt ġ‑ufus n‑aḥab a‑yyi‑inġ?

¹⁰ f‑tudrt n‑sidi rbbi‑nk, hati yuzn‑ugllid ma‑srk‑isiggiln ġ‑kraygatt tamazirt ula kraygatt tagldit nna‑illan. akud nna‑yas‑nnan: ‹ur‑illi ġid›, ar‑itzayad ar‑tn‑issgalla ġ‑tgldit‑an ula tamazirt‑an baš a‑yissan izd ṣṣaḥt ur‑k‑ufin.

¹¹ imma ġilad tnnit‑iyi: ‹wrri tinit i‑sidik: ha iliyah illa ġid.›

¹² ad‑ukan‑dik‑ngaraġ, ra‑k‑yasi rruḥ n‑sidi rbbi s‑kra n‑mani lli‑ur‑ssinġ. iġ‑ddiġ iniġ‑t i‑aḥab yašk‑id ur‑k‑id‑yufi, s‑iyi‑inġa a‑sidi, wah̬h̬a da‑tuqqarġ rbbi da‑illan zġ‑lliġ mẓẓiġ.

¹³ is‑ur‑tsfldt a‑sidi f‑maylli skrġ, lliġ a‑tnqqa izabal lanbiya n‑sidi rbbi? hati ssrgsġ miyya n‑nnabi n‑sidi rbbi, smmus id‑mraw (50) i‑ifri, ar‑asn‑akkaġ aġrum d‑waman.

¹⁴ kiyi ġilad tnnit‑iyi: ‹wrri tinit i‑sidik: ha iliyah illa ġid.› hati ra‑yyi‑inġ.»

¹⁵ yini‑as iliyah: «nniġ‑ak f‑tudrt n‑sidi rbbi n‑lmlayka lli‑tqasaġ, ra‑n‑srs‑banġ ġassad.»

¹⁶ iddu ɛubadyah ġakudan a‑n‑imnaggar d‑aḥab, iɛlm‑t. yašk‑id aḥab a‑d‑imnaggar d‑iliyah.

¹⁷ lliġ‑n‑iẓra aḥab iliyah, yini‑as‑d aḥab: «izd kiyin ayad, a‑walli ijllun ayt‑israyil?»

¹⁸ irar‑as iliyah: «urd nkkin a‑ijllun ayt‑israyil. kiyi d‑ayt‑dar babak a‑tn‑ijlan, lliġ tflm luṣiyat n‑sidi rbbi, tḍfurm ‹id‑baɛl›.

¹⁹ imma ġilad azn ma‑d‑issmunun kullu ayt‑israyil s‑dari ġ‑udrar n‑karmal, tawit‑d kkuẓ id‑miyya d‑smmus id‑mraw (450) n‑nnabi n‑‹baɛl›, tawit‑d ula kkuẓ id‑miyya (400) n‑nnabi n‑‹ašrah› lli‑išttan ġ‑lmida n‑izabal.»

iliyah d‑lanbiya n‑baɛl

²⁰ yazn aḥab s‑kullu mddn n‑ayt‑israyil, issmun‑d lanbiya kullutn ġ‑udrar n‑karmal.

²¹ yakmur‑n iliyah s‑kullu mddn‑an yini‑asn: «mnšk a‑rad‑sul‑tssbiḍirm ġ‑gr sin iġarasn? ẓrat kunni. iġd sidi rbbi a‑igan rbbi n‑ṣṣaḥt, tḍfurm‑t. iġd ‹baɛl› a‑t‑igan, tḍfurm‑t.» fssan mddn‑an, ur‑as‑d‑rurn s‑yat.

²² izayd iliyah yini‑asn: «nkki waḥduyy ayd sul iqaman ġ‑lanbiya n‑sidi rbbi, imma lanbiya n‑‹baɛl› gan kkuẓ id‑miyya d‑smmus id‑mraw (450).

²³ awyat‑d sin imugayn, f‑ad‑stin lanbiya n‑‹baɛl› yan gisn, bbin‑t f‑igzman, srsn‑t‑in f‑ikššuḍn. walaynni ad‑ur‑ssrġn lɛafiyt. amugay yaḍni, ra‑t‑jjujadġ srsġ‑t‑in f‑ikššuḍn. ula nkki ur‑rad‑ssrġġ lɛafiyt.

²⁴ tġrm i‑ism n‑rbbi‑nun, ġrġ nkki i‑ism n‑rbbi da‑bdda‑illan. rbbi nna‑d‑irurn s‑lɛafiyt, nttan a‑igan rbbi n‑ṣṣaḥt.» sawln‑d mddn‑an kullutn inin: «ifulki‑wawal.»

²⁵ yini iliyah ġakudan i‑lanbiya n‑‹baɛl›: «zwurat tstim yan‑umugay tjjujadm‑t, ašku kunni a‑iggutn, tġrm i‑ism n‑rbbi‑nun, walaynni ad‑ur‑tssrġm lɛafiyt.»

²⁶ asin‑d amugay lli‑stin jjujadn‑t, zaydn ar‑aqran i‑ism n‑‹baɛl› zġ‑zikk ṣbaḥ ar tuẓẓunt n‑wass ar‑ttinin: «wa baɛl, jawb‑aġ.» ur‑sfldn i‑yat ula ijawb‑asn yan. zaydn ar‑takʷin ar‑tlulliyn i‑ukrkur n‑tġrṣi lli‑bnan.

²⁷ lliġ tlkm tuẓẓunt n‑wass, ar‑gisn‑iteṭnaẓ iliyah yini‑asn: «aqrayat‑as s‑jjhd. is‑urd rbbi a‑iga? han irwas is‑a‑iswingim d‑ih̬f‑ns, nġd is‑idda a‑n‑immass, nġd is‑imudda, nġd is‑ign ar‑d‑itfaq.»

²⁸ zaydn ntni ar‑as‑aqran s‑jjhd, ar‑tbbin ddat‑nsn ġmklli myurn s‑tuzzal d‑iḥraš, aylliġ‑zġ‑gisn‑ngin idammn.

²⁹ tzri tuẓẓunt n‑wass, sul a‑ukan‑ssġuyyun, aylliġ tlkm tasaɛt lli‑ġ‑rad‑ssattuyn asakmur‑nsn, walaynni ur‑sfldn i‑yat, ula ijawb‑asn yan, ula yiwi‑tt gisn yan.

³⁰ yini iliyah ġakudan i‑mddn kullutn: «akmurat‑d s‑dari.» munn‑d fllas mddn kullutn. inkr ar‑ibnnu akrkur n‑sidi rbbi lli‑ih̬ʷlan.

³¹ yasi‑d sin d‑mraw n‑uẓru, ġunšk lli‑gant‑tqbilin n‑tarwa n‑yaɛqub, lli‑mi‑inna sidi rbbi: «ism‑nk ra‑ig ‹israyil›.»

³² ibnu akrkur s‑iẓran‑an i‑ism n‑rbbi da‑bdda‑illan. iġz asaru isslulliy‑t i‑ukrkur. ra‑yasi‑usaru‑an ma‑itggan kkuẓ d‑mraw (14) litru n‑imndi.

³³ issasstwa ikššuḍn, ibbi amugay f‑igzman, isrs‑t‑in f‑ikššuḍn. yini ilmma: «ɛmmrat‑d kkuẓ ibʷqqaln n‑waman tffim‑tn f‑tġrṣi d‑ikššuḍn.»

³⁴ yini‑asn ilmma: «ɛawdat‑as.» ɛawdn‑as. yini‑asn: «ɛawdat‑as tis kraṭṭ‑twal» ɛawdn‑as daġ tis kraṭṭ‑twal.

³⁵ zrin‑waman f‑ukrkur kullut, iɛmmr‑usaru ula nttan s‑waman.

³⁶ lliġ truḥ tasaɛt lli‑igan i‑usattuy n‑usakmur, yakmur‑n nnabi iliyah iẓẓall yini: «wa rbbi da‑bdda‑illan, wa rbbi n‑ibrahim d‑isḥaq d‑israyil, ssbayyn‑d i‑mddn‑ad ġassad ad‑issann izd kiyin a‑igan rbbi n‑ayt‑israyil, issann ula izd ah̬ddam‑nk ad‑giġ, d‑wawal‑nk a‑s‑skrġ kullu mayad.

³⁷ sfld‑iyi a‑sidi rbbi, tjawbt‑iyi baš ad‑issann mddn‑ad izd kiyin a‑igan rbbi n‑ṣṣaḥt, trart‑d ulawn‑nsn s‑dark a‑sidi rbbi.»

³⁸ ġakudan a‑di‑tgguz lɛafiyt n‑sidi rbbi, tjdr kullu tiġrṣi d‑ikššuḍn d‑iẓran d‑wakal, tsu ula aman n‑usaru.

³⁹ lliġ ẓran kullu ayt‑israyil mayan, knun f‑uwdm‑nsn ar akal, ar‑ttinin: «sidi rbbi a‑igan rbbi n‑ṣṣaḥt. walli bdda illan a‑igan rbbi.»

⁴⁰ yini‑asn iliyah: «amẓat lanbiya n‑‹baɛl›, a‑ur‑gisn‑injm yan.» amẓn‑tn, yawi‑tn iliyah s‑dar talat n‑qišun, iġrṣ‑asn ġin.

sidi rbbi yuzn‑d anẓar

⁴¹ yini iliyah ġakudan i‑aḥab: «nkr tššt tsut. ha ijjij n‑unẓar iggutn ifta‑d.»

⁴² inkr aḥab a‑išš isu. imma iliyah iġli s‑ih̬f n‑udrar n‑karmal, iknu ar akal, ig agayu‑ns ġ‑gr ifaddn‑ns.

⁴³ yini i‑uh̬ddam‑ns: «ġli tmnadt‑n ġilad s‑tsga n‑umda.» iġli imnad‑n yini‑as‑d: «ur‑iban yat.» izayd ar‑t‑daġ‑itazn ssa n‑twal ar‑as‑ittini: «ddu daġ».

⁴⁴ tis ssa n‑twal yini‑as‑d‑uh̬ddam‑ns: «han yat‑tmdlut imẓẓin unšk n‑tdiklt n‑ufus, ar‑di‑taqlay zġ‑umda.» yini‑as iliyah: «zayd tinit i‑aḥab: ‹qqn lkurriṣa‑nk thuwwdt, a‑ur‑imil igli‑k‑id‑unẓar.› »

⁴⁵ imikk s‑wrrin ignwan ar‑di‑tlassn s‑imdla ḍlanin. inkr‑d‑ilmma‑waḍu, ar‑d‑iṭar‑unẓar iggutn. issudu aḥab lkurriṣa‑ns aylliġ ilkm tamdint n‑izraɛil.

⁴⁶ yili‑d‑ufus n‑sidi rbbi f‑iliyah, yass taggʷst‑ns yazzl, izwur aḥab s‑imi n‑izraɛil.