1 igldan 17 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iliyah ġ‑uwssan n‑uġʷni

¹ iliyah gu‑tišbi iga yan ġ‑ġwilli igawrn ġ‑wakal n‑gilɛad. isawl iliyah s‑ugllid aḥab yini‑as: «f‑tudrt n‑rbbi da‑illan ig rbbi n‑israyil lli‑tqasaġ, ur‑ra‑ttili la tiġli ula anẓar ġ‑isggʷasn‑ad abla s‑wawal‑inu.»

² yaški‑as‑d‑ilmma‑wawal n‑sidi rbbi yini‑as:

³ «ffuġ zġ‑ġid, tddut s‑tsgiw n‑usġlay n‑tafukt, trgst ġ‑dar talat n‑kirit ġ‑tsga yaḍni n‑wasif n‑urdun.

⁴ ra‑tssat zġ‑talat‑an. han umrġ i‑ihaqqayn a‑yk‑n‑tawin ma‑tšttat.»

⁵ iddu ġakudan iskr s‑wawal n‑sidi rbbi, igawr ġ‑dar talat n‑kirit ġ‑tsga n‑wasif n‑urdun lli‑iwalan asġlay.

⁶ zikk ṣbaḥ ar‑as‑di‑tawin ihaqqayn aġrum d‑tfiyi. tadggʷat ar‑as‑di‑tawin daġ aġrum d‑tfiyi. ar‑issa aman n‑talat.

tahjjalt ullt‑ṣarfat

⁷ ik ma‑ikka s‑a‑di‑ttiqar talat, ašku laḥ anẓar ġ‑wakal‑an.

⁸ yašk‑id‑wawal n‑sidi rbbi s‑iliyah yini‑as:

⁹ «nkr tddut s‑tmdint n‑ṣarfat ġ‑wakal n‑ṣidun, tgawrt ġin. hati umrġ i‑yat‑thjjalt ad‑ak‑takka ma‑tšttat.»

¹⁰ inkr ġakudan iddu s‑ṣarfat. lliġ‑n‑ilkm imi n‑tmdint, had yat‑thjjalt ar‑tssmunu tikššuḍin. iġr‑as yini‑as: «ġir awi‑yyi‑d yat‑tqʷllalt n‑waman ad‑suġ.»

¹¹ lliġ‑n‑tgrawl ad‑as‑tn‑di‑tawi, iġr‑as daġ yini‑as: «ġir g‑d dim yat‑tuffaẓt n‑uġrum ġ‑ufus‑nm.»

¹² tini‑as‑d: «f‑tudrt n‑rbbi sidik, ur‑dari kra inwan. ur‑sul‑dari‑iqama abla yan‑uwmmaẓ n‑uggʷrn ġ‑tkint d‑yan imikk n‑zzit ġ‑tbʷqqalt. ha‑yyi ar‑ssmunuġ yan snat‑tkššuḍin ma‑s‑a‑ssnwaġ mad‑šttaġ nkki d‑iwi, a‑t‑nš nmmt ilmma s‑laẓ.»

¹³ yini‑as iliyah: «ad‑ur‑tiksaḍt. zayd tskrt ġmklli‑s‑tnnit, walaynni skr‑iyi‑d zwar zġ‑gis yat‑tngult imẓẓin, tawit‑iyi‑stt‑id. tskrt ilmma i‑kmmi d‑yum ma‑tšttam.

¹⁴ ašku ha ma‑inna rbbi da‑illan ig rbbi n‑israyil: ‹tikint n‑uggʷrn ur‑ra‑th̬wu, d‑tbʷqqalt n‑zzit ur‑ra‑tšḥu, ar ass lli‑ġ‑d‑yiwi sidi rbbi anẓar i‑wakal.›

¹⁵ tddu s‑tgmmi‑ns tskr s‑wawal n‑iliyah, s‑hati illa dars ma‑ištta iliyah d‑nttat d‑ayt‑tgmmi‑ns yan mnnaw‑uwssan.

¹⁶ tikint n‑uggʷrn ur‑th̬wi, d‑tbʷqqalt n‑zzit ur‑tšḥi, ġmklli‑s‑inna sidi rbbi s‑wawal‑ns f‑imi n‑iliyah.

¹⁷ izri ma‑izrin s‑yuḍn yus n‑tmġart‑an lal n‑tgmmi, iḥawl‑as‑waṭṭan aylliġ ur‑sul‑a‑itnffas.

¹⁸ tini nttat i‑iliyah: «ma‑yyi‑tḍfart ay‑ah̬ddam n‑rbbi, tuškit‑d dari a‑yyi‑di‑tssktit ddnub‑inu, trart‑iyi‑d s‑lmut n‑iwi?»

¹⁹ yini‑as: «fk‑iyi‑d yum» yasi‑t‑id iliyah zġ‑gr ifassn n‑innas, issġli‑t s‑tadwarit lli‑ġ‑a‑itgawar nttan, isrs‑t f‑tisi‑ns.

²⁰ ar‑yaqra i‑rbbi da‑bdda‑illan yini: «wa sidi rbbi‑nu, mah̬ a‑tzuydt tammara i‑thjjalt‑ad lli‑dar‑tgawarġ, aylliġ‑as‑immut ula yus?»

²¹ iẓl iliyah f‑uḥšmi kraṭṭ‑twal, ig taġuyit s‑rbbi da‑illan yini: «wa sidi rbbi‑nu, ġir a‑di‑trart tudrt i‑uḥšmi‑ad.»

²² isfld sidi rbbi s‑wawal‑n‑iliyah, twrri‑t‑id tudrt iddr.

²³ yasi‑d iliyah aḥšmi, izzugz‑t‑id zġ‑tadwarit s‑ugʷns n‑tgmmi ifk‑t i‑innas. yini‑as iliyah: «ẓr, ha yum iddr.»

²⁴ tini‑tmġart i‑iliyah: «ssnġ ġilad izd ah̬ddam n‑rbbi a‑tgit, issanġ izd lḥqq a‑iga‑wawal n‑sidi rbbi da‑d‑itffuġn zġ‑imi‑nk.»