1 igldan 14 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lmut n‑yarabɛam

¹⁹ iskkirn yaḍni n‑yarabɛam, mamnk a‑itmmaġ ula mamnk a‑itḥkam, hati tyaran ġ‑warra n‑uwssan n‑igldan n‑ayt‑israyil.

²⁰ tk‑tgldit n‑yarabɛam sin id‑mraw d‑sin (22) n‑usggʷas, ign ilmma ġ‑gr id‑babas. iwala‑t‑in yus nadab, iwrri ig agllid.

ayt‑yahuda qasan tajlh̬it

²¹ iḥkam raḥbɛam yus n‑suliman ġ‑wakal n‑yahuda. lliġ iġli raḥbɛam s‑tgldit, ilin dars kkuẓ id‑mraw d‑yan (41) n‑usggʷas. iḥkam ssa d‑mraw (17) n‑usggʷas ġ‑tmdint n‑urušalim lli‑iẓli sidi rbbi ġ‑gr kullu tiqbilin n‑israyil a‑fllas‑yili ism‑ns. innas n‑raḥbɛam, iga ism‑ns naɛmah, tg ult‑ɛammun.

²² walaynni ar‑skarn ayt‑yahuda ma‑yʷh̬šnn ġ‑iẓri n‑sidi rbbi, ssṭiyrn‑as‑tt s‑lh̬ʷšanat lli‑tsalan uggʷar n‑kullu ġaylli salan id‑babatsn.

²³ ašku zuydn ntni bnun ikʷrkar, ssbiddn ifariwn d‑tggjda n‑‹ašrah› ġ‑iggi n‑kraygatt awrir yattuyn ula ġ‑ddu kraygatt aṣġar izgzawn.

²⁴ ilin ġ‑wakal‑an imggann imkiriyn lli‑itfsadn f‑ism n‑id‑rbbi‑nsn, ar‑tqasan kullu tajlh̬it n‑iqbiln lli‑iṭṭay sidi rbbi ġ‑lgddam n‑ayt‑israyil.

²⁵ wis smmus isggʷasn ġ‑tgldit n‑raḥbɛam, iwnn‑d šišaq agllid n‑miṣr, yakʷi f‑urušalim.

²⁶ yakʷr irukutn ġʷlanin n‑tgmmi n‑sidi rbbi, d‑win‑tgmmi n‑ugllid, yawi‑tn kullutn. izayd yakʷr kullu timsntlin n‑uwrġ lli‑iskr suliman.

²⁷ inkr‑ugllid raḥbɛam ig‑n timsntlin n‑wanas ġ‑udġar‑nsnt, ifk‑tnt ġ‑ifassn n‑iriyasn n‑waḍafn lli‑itbiddadn ġ‑imi n‑tgmmi n‑ugllid.

²⁸ ġakud nna‑ikšm‑ugllid s‑tgmmi n‑sidi rbbi, ar‑n‑tasin‑waḍafn timsntlin‑an, rarn‑tnt ilmma s‑uḥanu n‑tiḍaf.

²⁹ iskkirn yaḍni n‑raḥbɛam ula kullu ma‑itsala, is‑ur‑tyaran ġ‑warra n‑iskkirn n‑igldan n‑yahuda?

³⁰ illa bdda imiġ ġ‑gr raḥbɛam d‑yarabɛam.

³¹ ign ilmma raḥbɛam ġ‑gr id‑babas, ityawmḍal‑n d‑id‑babas ġ‑tmdint n‑dawd. ism n‑innas iga naɛmah ullt‑ɛammun. iwala‑t‑in ilmma yus abiyam, iwrri ig agllid.