1 igldan 12 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ẓin ayt‑israyil d‑yus n‑suliman

¹ iddu raḥbɛam [yus n‑suliman] s‑tmdint n‑šakim, ašku munn‑d kullu ayt‑israyil ġ‑šakim a‑t‑gn d‑ugllid.

² isfld fllas yarabɛam yus n‑nabaṭ lli‑irwln zġ‑suliman s‑miṣr. iwrri‑d yarabɛam ġakudan zġ‑miṣr.

³ aznn srs mddn, ġrn‑as‑d. yašk‑id yarabɛam d‑kullu tamunt n‑ayt‑israyil s‑dar raḥbɛam inin‑as:

⁴ «ikka‑ttin babak isrs fllanġ aḥlas iẓẓayn. ġilad ssifsas fllanġ tiwizi išqan d‑uḥlas iẓẓayn lli‑d‑fllanġ‑isrs babak, s‑k‑nqasa.»

⁵ irar‑asn‑d: «ddwat ard zrin kraḍ‑uwssan, twrrim‑d.» ddun ġakudan mddn‑an.

⁶ izayd‑ugllid raḥbɛam imšawar d‑imġarn lli‑sttin‑kkanin biddn d‑babas suliman lliġ sul iddr, isqsa‑tn: «ma‑ttinim? man awal s‑rad‑rarġ i‑mddn‑an?»

⁷ inin‑as: «iġ‑tufit a‑tgt ah̬ddam i‑mddn‑ad ġassad, tqasat‑tn trart‑asn s‑iwaliwn šwanin, rad‑gn ih̬ddamn‑nk kullu mayd iftan.»

⁸ walaynni yagʷi tanbaṭṭ n‑imġarn, iddu imšawar d‑inggʷan‑ns lli‑sttin‑ikka ar‑didsn‑itgawar ġ‑mẓẓiy‑ns, biddn ġilad ġ‑tama‑ns.

⁹ isqsa‑tn: «ma‑ttinim kunni? man awal s‑rad‑rarġ i‑mddn‑an lli‑yyi‑iḍalbn a‑fllasn‑ssifsasġ aḥlas lli‑fllasn‑isrs baba?»

¹⁰ sawln‑d inggʷan‑ns lli‑d‑itgawar ġ‑mẓẓiy‑ns inin: «ha ma‑ra‑tinit i‑mddn‑an lli‑ak‑innan babak isrs fllasn aḥlas iẓẓayn, irin‑k kiyi a‑t‑fllasn‑tssifsast. ha ma‑rad‑asn‑tinit: ‹talḍaṭṭ‑inu tṣḥa f‑umṣaḍ n‑baba.

¹¹ baba isrs fllawn aḥlas iẓẓayn, nkki rad‑awn‑zaydġ ma‑iẓẓayn f‑uḥlas‑an. baba ikrz srun s‑izakarn, imma nkki ra‑srun‑krzġ s‑iġrdmiwn.› »

¹² wis kraḍ‑uwssan iwrri‑d yarabɛam d‑mddn kullutn s‑dar‑ugllid raḥbɛam ġmklli‑s‑asn‑inna: «ar wis kraḍ‑uwssan, twrrim‑d dari.»

¹³ irar‑d‑ugllid i‑mddn s‑wawal iqjrn, yagʷi tanbaṭṭ n‑imġarn,

¹⁴ isawl srsn ġmklli‑s‑as‑nnan inggʷan‑ns mẓẓinin, yini‑asn: «baba isrs fllawn aḥlas iẓẓayn, imma nkki rad‑awn‑zaydġ ma‑iẓẓayn f‑uḥlas‑an. baba ikrz srun s‑izakarn, imma nkki ra‑srun‑krzġ s‑iġrdmiwn.»

¹⁵ ur‑isfld‑ugllid s‑mddn, ašku iqṣad sidi rbbi ġmkan, baš a‑issafu awal‑ns lli‑s‑d‑inna sidi rbbi f‑imi n‑nnabi aḥiyah gu‑šiluh i‑yarabɛam yus n‑nabaṭ.

¹⁶ mddn‑an n‑kullu tiqbilin n‑israyil, lliġ ẓran agllid ur‑srsn‑isfld, rarn ntni i‑ugllid: «mad‑aġ‑illan ġ‑wakal n‑dawd? man lwrt ra‑nṭṭaf ġ‑dar yus n‑yassa? wrryat s‑darun ay‑ayt‑israyil. awyat‑stt ġ‑ma‑igan winun ay‑ayt‑dawd.» akutn ayt‑israyil ġakudan, wrrin s‑darsn.

¹⁷ raḥbɛam iḥkam sul f‑kra ġ‑ayt‑israyil lli‑izdġn ġ‑tmdinin n‑yahuda.

¹⁸ walaynni agllid raḥbɛam, lliġ yuzn aduram lli‑igan angabal f‑twizi s‑dar ayt‑israyil, nkrn ar‑t‑kullu‑kkatn s‑iẓran aylliġ immut. irwl‑ugllid raḥbɛam ġakudan, issudu lkurriṣa‑ns iwrri s‑urušalim.

¹⁹ ġmkan a‑s‑wrrin ar‑tẓin ayt‑israyil d‑ayt‑tgldit n‑dawd sul s‑ġassad.

yarabɛam agllid n‑israyil

²⁰ lliġ sfldn kullu ayt‑israyil is‑d‑iwrri yarabɛam s‑darsn, ġrn‑as‑d s‑umnid n‑tamunt‑nsn, gn‑t d‑ugllid f‑israyil kullut. ur‑illi ma‑iḍfurn ayt‑dawd abla taqbilt n‑yahuda waḥdutt.

²¹ lliġ ilkm raḥbɛam s‑urušalim, issmun‑d kullu ayt‑yahuda d‑ayt‑bnyamin, gan miyya d‑tam id‑mraw n‑walf (180 000) n‑urgaz itjhhdn ujadn i‑imiġ, f‑ad‑mmaġn d‑ayt‑israyil rarn‑d tagldit i‑raḥbɛam yus n‑suliman.

²² walaynni yuška‑d‑wawal n‑rbbi s‑šmaɛyah lli‑igan ah̬ddam n‑rbbi yini‑as:

²³ «sawl s‑raḥbɛam yus n‑suliman agllid n‑yahuda, tsawlt s‑kullu ayt‑yahuda d‑ayt‑bnyamin d‑mddn‑an yaḍni, tinit‑asn:

²⁴ ‹ha ma‑inna sidi rbbi: ad‑ur‑tawnm a‑tmmaġm d‑aytmatun n‑ayt‑israyil. wrryat kraygatt yan s‑tgmmi‑ns, ašku nkki a‑iqṣadn mayd ijran.› » s‑sfldn ġakudan s‑wawal n‑sidi rbbi, ddun kullu wrrin s‑darsn, ġmklli‑s‑asn‑inna sidi rbbi.

ayt‑israyil ar‑tɛbadn laṣnam

²⁵ imma yarabɛam ibna tamdint n‑šakim ġ‑iwrar n‑afraym izdġ gis. ik imikk ifl‑tt, iddu daġ ibnu tamdint n‑fanwil.

²⁶ yini yarabɛam d‑ih̬f‑ns: «nkki iġ‑ur‑skirġ yat, ra‑twrri‑tgldit i‑ayt‑dawd.

²⁷ iġ‑a‑tawnn mddn‑inu s‑urušalim a‑n‑qqrṣn ġ‑tgmmi n‑sidi rbbi, rad‑daġ‑irin‑uwlawn‑nsn raḥbɛam agllid n‑yahuda lli‑yadlli‑igan siditsn. ra‑yyi‑nġn nkki, ḍfurn raḥbɛam agllid n‑yahuda.»

²⁸ imšawar d‑willi dids illan, iɛdl sin igayzn zġ‑uwrġ, yini i‑mddn: «hati išqa fllawn ad‑bdda‑ttawnm s‑urušalim. ha id‑rbbi‑nun lli‑kʷn‑d‑issiwn zġ‑miṣr.»

²⁹ issbidd yan ġ‑bayt‑il, issbidd wayya ġ‑dan.

³⁰ ġmkan a‑s‑wrrin mddn ar‑bahra‑jllun, aylliġ a‑tmuddun ar tuggugt n‑dan a‑n‑ḥaḍrn ġ‑umnid n‑walli gis illan.

³¹ izayd yarabɛam ibnu lqubbat ġ‑iggi n‑iwrar, iskr‑asnt imsakmurn zġ‑gr kullu mddn, ur‑gin zġ‑ayt‑lawi.

³² iskr‑asn yan lɛid ġ‑wis tam‑iyrn ġ‑wass wis smmus d‑mraw (15), zund lɛid ġ‑dar ayt‑yahuda, issattuy gis isakmurn f‑ukrkur n‑tġrṣi. ġmkan a‑iskar ġ‑bayt‑il, ar‑iqqrṣ f‑igayzn lli‑iɛdl. izzdġ imsakmurn ġ‑bayt‑il f‑a‑tqasan ikʷrkar lli‑ibna ġ‑iggi n‑iwrar.