1 igldan 11 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

timġarin lli‑ijlan suliman

¹ imma agllid suliman iḥubba kigan d‑tmġarin ist‑tmizar yaḍni, urd ġir illis n‑firɛawn waḥdutt. yawi‑d timġarin zġ‑tmazirt n‑muwab d‑ɛammun d‑adum d‑ṣidun d‑ḥit,

² zġ‑iqbiln lli‑f‑inna sidi rbbi i‑ayt‑israyil: «a‑ur‑zġ‑darsn‑ttettahalm, ula da‑n‑zġ‑darun‑tettahaln. ašku s‑ṣṣaḥt rad‑rarn ulawn‑nun s‑dar id‑rbbi‑nsn.» walaynni suliman ar‑tnt‑itḥubbu bahra iġwi gisnt.

³ itahl ssa n‑id‑miyya (700) n‑istis n‑igldan, d‑kraṭṭ id‑miyya (300) n‑tsmgt. jlunt‑tmġarin‑ns ul‑ns.

⁴ ašku lliġ yuwssr suliman, ldint‑tmġarin‑ns ul‑ns s‑dar id‑rbbi yaḍni. ur‑sul‑iqama yumẓ ġ‑rbbi sidis s‑uwl izgan, ġmklli gis yumẓ babas dawd.

⁵ ašku suliman idda ar‑isiggil ‹ɛašturat› lli‑tɛbadn ayt‑ṣidun, ar‑isiggil ‹milkum› lli‑igan jjlih̬t n‑ayt‑ɛammun.

⁶ iwrri ar‑iskar suliman ma‑yʷh̬šnn ġ‑iẓri n‑sidi rbbi. ur‑sul‑iḍfur rbbi da‑illan zġ‑ttmi n‑uwl‑ns zund babas dawd.

⁷ izayd suliman ibnu yan‑ukrkur ma‑ġ‑a‑tɛbadn ‹kamuš› lli‑igan jjlih̬t n‑ayt‑muwab, ġ‑uwrir ġ‑tama n‑urušalim lli‑iwalan asġlay n‑tafukt. ibnu wayyaḍ i‑‹mulah̬› lli‑igan jjlih̬t n‑ayt‑ɛammun.

⁸ ġmkan a‑iskr i‑kullu timġarin‑ns tibrraniyin, zaydnt ntnti ar‑qqrṣnt ar‑tbh̬h̬arnt i‑id‑rbbi‑nsnt.

sidi rbbi iwrri iḍaḍḍa suliman

⁹ iġḍb sidi rbbi f‑suliman, ašku igllb‑uwl‑ns zġ‑rbbi da‑illan ig rbbi n‑israyil lli‑as‑d‑ibann snat‑twal

¹⁰ yuṣṣa‑t f‑tġawsa‑yad yini‑as: «a‑ur‑sar‑ttɛbadt id‑rbbi yaḍni.» imma suliman ur‑iqama ġ‑wawal‑an.

¹¹ isawl‑d sidi rbbi ġakudan s‑suliman yini‑as: «lliġ a‑ttsalat ġmkan, lliġ ur‑sul‑a‑stti‑ttawit ġ‑lɛhd‑inu ula tinbaḍin‑inu lli‑s‑k‑uṣṣaġ, ha‑yyi rad‑ak‑kkisġ tagldit‑nk, fkġ‑tt i‑yan ġ‑ih̬ddamn‑nk.

¹² walaynni f‑uwdm n‑babak dawd, ur‑rad‑skrġ mayan ġ‑uwssan‑nk. ra‑stt‑kkisġ i‑yuk.

¹³ ula ġmkan ur‑rad‑as‑kksġ tagldit kullutt. rad‑sul‑fkġ yat‑tqbilt i‑yuk f‑uwdm n‑uh̬ddam‑inu dawd, ula f‑ssibt n‑urušalim lli‑ẓliġ a‑tg tinu.»

awal n‑rbbi i‑yarabɛam

²⁶ yan zġ‑willi yulln afus‑nsn f‑ugllid, iga ism‑ns yarabɛam yus n‑nabaṭ gu‑afraym zġ‑tmdint n‑ṣridah, ig yan zġ‑ih̬ddamn n‑suliman. ism n‑innas iga ṣaruɛa, tg nttat tahjjalt.

²⁷ ġayad a‑f‑yusi ḍiḍḍ d‑ugllid. igra suliman a‑iɛmmr talat ġ‑wawgʷns n‑urušalim s‑iẓran, iqqn anqubbi imqqurn lli‑illan ġ‑ugadir n‑tmdint n‑babas dawd.

²⁸ han yarabɛam iga aɛyyal iḥaršn. lliġ‑t‑iẓra suliman ar‑ith̬dam s‑zzɛmt, ig‑t d‑ungabal f‑twizi n‑tqbilt n‑ayt‑yusf.

²⁹ yan‑wass iffuġ yarabɛam zġ‑urušalim, yaf‑t‑in nnabi aḥiyah gu‑šiluh ġ‑uġaras. ilsa aḥiyah aslham n‑ljdid. ilin ntni s‑sin ġ‑lh̬la, ur‑didsn yan.

³⁰ yamẓ‑d aḥiyah aslham‑ns n‑ljdid, ibbi‑t f‑sin d‑mraw (12) n‑ugzzum.

³¹ yini i‑yarabɛam: «asi mraw igzman i‑ih̬f‑nk, ašku ha ma‑inna rbbi da‑illan ig rbbi n‑israyil. yan imikk rad‑bbiġ tagldit zġ‑ufus n‑suliman, fkġ‑ak gis mrawt‑tqbilin.

³² ntta rad‑as‑sul‑tqama yat‑tqbilt f‑uwdm n‑uh̬ddam‑inu dawd ula f‑ssibt n‑tmdint n‑urušalim lli‑ẓliġ zġ‑gr kullu tiqbilin n‑ayt‑israyil.

³³ ašku fln‑iyi ddun ar‑tɛbadn ‹ɛašturat› n‑ayt‑ṣidun, d‑‹kamuš› n‑ayt‑muwab, d‑‹milkum› n‑ayt‑ɛammun. ur‑a‑fttun f‑iġarasn‑inu, ula da‑skarn ma‑iṣlaḥn ġ‑iẓri‑nu, ula da‑stti‑tawin ġ‑tnbaḍin‑inu d‑lḥkamat‑inu ġmklli iskar babas dawd.

³⁴ ur‑rad‑as‑kksġ tagldit kullutt. s‑ṣṣaḥt rad‑sul‑iqama ig agllid kullu ussan n‑tudrt‑ns, f‑uwdm n‑uh̬ddam‑inu dawd lli‑stiġ, izga ġ‑tnbaḍin d‑luṣiyat‑inu.

³⁵ walaynni rad‑kksġ tagldit i‑yus, fkġ‑ak gis mrawt‑tqbilin.

³⁶ ra‑tqama yat‑tqbilt i‑yus, fkġ‑as‑tt f‑ad‑bdda‑tili yat‑tsafut i‑uh̬ddam‑inu dawd ġ‑umnid‑inu ġ‑tmdint n‑urušalim lli‑ẓliġ a‑fllas‑yili ism‑inu.

³⁷ imma kiyi, rad‑ak‑fkġ a‑tḥkamt f‑kullu mani trit, tgt agllid n‑israyil.

³⁸ iġ‑a‑tskart s‑kullu ma‑f‑a‑k‑tuṣṣaġ, ar‑bdda‑tfttut ġ‑iġarasn‑inu, ar‑tskart ma‑iṣlaḥn ġ‑iẓri‑nu, ar‑tti‑ttawit ġ‑tnbaḍin d‑luṣiyat‑inu, ġmklli iskar‑uh̬ddam‑inu dawd, hati rad‑dik‑iliġ, zzgaġ‑ak tasut n‑wamud‑nk, ġmklli skrġ i‑dawd. rad‑ak‑fkġ israyil,

³⁹ ssdulluġ amud n‑dawd, walaynni urd bdda.»

⁴⁰ suliman ar‑isiggil ġakudan a‑inġ yarabɛam, walaynni inkr yarabɛam irwl s‑miṣr, s‑dar šišaq agllid n‑miṣr. iqama‑n ġin aylliġ immut suliman.

lmut n‑suliman

⁴¹ iskkirn yaḍni n‑suliman ula kullu ma‑itsala ula taḥkimt‑ns, is‑ur‑tyaran ġ‑warra n‑iskkirn n‑suliman?

⁴² ikka‑tt‑in iga suliman agllid f‑kullu ayt‑israyil kkuẓ id‑mraw (40) n‑usggʷas ġ‑urušalim.

⁴³ ign ilmma suliman ġ‑gr id‑babas, ityawmḍal‑n ġ‑tmdint n‑babas dawd. iwala‑t‑in yus raḥbɛam, iwrri ig agllid.