1 igldan 10 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tagllidt n‑saba

¹ lliġ tsfld‑tgllidt n‑saba f‑kullu ma‑iskar suliman s‑ism n‑rbbi da‑illan, tašk‑id dars a‑ti‑tarm s‑isqsitn šqanin.

² tlkm‑d urušalim nttat d‑yan‑ukabar imqqurn s‑irɛman yusin isafarn hiyyanin ula tugtt n‑uwrġ d‑iẓran ġʷlanin. tkšm dar suliman, ar‑as‑taddr kullu ma‑illan ġ‑ih̬f‑ns.

³ ar‑as‑d‑itrara suliman f‑kullu isqsitn‑ns. ur‑illi kra intln ula kra mi‑ur‑iẓḍar‑ugllid ad‑as‑t‑ifasr.

⁴ lliġ tẓra‑tgllidt n‑saba kullu taḥkimt n‑suliman, tẓr tigmmi lli‑ibna,

⁵ tẓr tiram lli‑ittrsn f‑lmida‑ns, d‑igiwr n‑imɛawann‑ns, d‑twuriw n‑imqasan‑ns d‑tmlsa‑nsn, d‑id‑bu‑tissi lli‑t‑itqabaln, tẓr isakmurn jdrnin lli‑n‑issattuy ġ‑tgmmi n‑rbbi da‑bdda‑illan, hattin issduhda‑tt kullu mayan bahra.

⁶ tini ilmma i‑ugllid: «hati iṣḥa maylli mi fllak sflidġ ġ‑tmazirt‑inu f‑iskkirn‑nk ula taḥkimt‑nk.

⁷ walaynni ur‑uminġ tiġawsiwin‑an ar ġilad ġ‑d‑uškiġ ẓrġ‑tnt s‑walln‑inu. imma ġilad maylli mi sfldġ ur‑akkʷ‑igi mnaṣṣ n‑mayd dark illan. hati taḥkimt‑nk d‑wayda‑nk ugʷrn kullu ma‑s‑iyi‑nnan mddn.

⁸ imbarkiyn ad‑gan ih̬ddamn‑nk. d‑imbarkiyn ad‑gan imqasan‑nk lli‑itbiddadn ġ‑umnid‑nk, ar‑bdda‑sflidn i‑tḥkimt‑nk.

⁹ ambarki a‑iga sidi rbbi‑nk lli‑fllak‑irḍan, isrs‑k f‑lɛrš n‑ayt‑israyil. ašku issdum tayri‑ns i‑israyil, ig‑k fllasn d‑ugllid ad‑darsn‑tzzgat lḥqq d‑ufulki.»

¹⁰ tzayd nttat tfk i‑ugllid kkuẓ id‑walf (4000) n‑kilu n‑uwrġ, tawi‑as‑d ma‑iggutn ġ‑isafarn hiyyanin d‑iẓran ġʷlanin. tugtt n‑isafarn‑an lli‑tfka‑tgllidt n‑saba i‑ugllid suliman, ur‑jji‑sul‑ikšim zund ġunškan zġ‑ġassan tasawnt.

¹¹ ġ‑uwssan‑an ar‑zrayn‑wanawn n‑ugllid ḥiram zġ‑umda, ar‑di‑tawin urġ zġ‑ufir, ar‑di‑tawin ula tugtt n‑ukššuḍ n‑almug d‑iẓran ġʷlanin zġ‑wakal n‑ufir.

¹² akššuḍ‑an a‑zġ‑iskr suliman tannalin n‑tgmmi n‑sidi rbbi d‑tin‑tgmmi n‑ugllid, iskr zġ‑gis ula luṭarat d‑rribabat i‑ayt‑umarg. ur‑jji‑sul‑illi ma‑d‑itawin zund akššuḍ‑an n‑almug ula ma‑t‑sul‑iẓran sul s‑ġassad.

¹³ ifk‑ugllid suliman i‑tgllidt n‑saba kullu ma‑stt‑iɛjbn, ifk‑as maylli‑zġ‑gis‑tḍalb, issafu‑as zġ‑lh̬ir lli‑išaḍn ġ‑ufus n‑ugllid suliman. twrri ilmma s‑tmazirt‑ns nttat d‑ih̬ddamn‑ns.

timuġra n‑suliman

²³ yugʷr‑ugllid suliman kullu igldan n‑ddunit ġ‑wayda d‑tḥkimt.

²⁴ ar‑d‑kullu‑dars‑ttaškin ayt‑tmizar n‑ddunit, irin ad‑sfldn i‑tḥkimt lli‑as‑ifka rbbi ġ‑lɛaql‑ns.

²⁵ asggʷas ar asggʷas ar‑di‑ttaškin, yawi‑d kud yan tasmġurt‑ns ġ‑irukutn n‑nnʷqrt d‑uwrġ d‑tmlsa d‑lmurr d‑isafarn d‑iysan d‑isrdan.