yuḥanna 7 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

isawl lmasiḥ d‑aytmas

¹ tiġurdin n‑mayan ar‑itlulli yasuɛ ġ‑tmazirt n‑jalil. ur‑iri a‑iffuġ s‑tmazirt n‑yudaya ašku ar‑ttirin imġarn n‑ayt‑yudaya a‑t‑nġn.

² ġ‑uwssan‑an yakmur‑d lɛid n‑ayt‑yudaya lli‑mi‑ttinin lɛid n‑iḥšaš.

³ sawln‑d aytmas n‑yasuɛ inin‑as: «ddu zġ‑ġid s‑yudaya ad‑ẓrn imḥḍarn‑nnk ma‑tskart.

⁴ ašku yan iran a‑ityawssan ur‑a‑itḥḍu iskkirn‑ns. iġ‑a‑tskart tiġawsiwin‑ad, ih̬ṣṣa‑k a‑di‑tssbayynt ih̬f‑nnk i‑ddunit.»

⁵ ašku ur‑srs‑uminn aytmas.

⁶ yini‑asn yasuɛ: «azmz‑nnun illa‑bdda, walaynni ur‑ta‑d‑ilkim‑uzmz‑inu.

⁷ kunni, ur‑gigun‑illi ma‑f‑a‑kʷn‑tkrhun ayt‑ddunit‑ad, imma nkki ar‑iyi‑tkrhun f‑tugga lli‑akkaġ f‑lh̬ʷšanat lli‑skarn.

⁸ zaydat kunni a‑tzzrim lɛid ġin. ur‑ta‑rad‑dduġ nkki ašku ur‑ta‑d‑ilkim‑uzmz‑inu.»

⁹ inna‑yasn ġmkad, igawr sul ġ‑tmazirt n‑jalil.

¹⁰ walaynni lliġ ftan aytmas ad‑zzrin lɛid ġ‑urušalim, iftu ula ntta s‑tntla baš a‑t‑ur‑akʷzn mddn.

isawl lmasiḥ d‑ayt‑urušalim

¹¹ ar‑srs‑siggiln imġarn n‑ayt‑yudaya ġ‑uwssan l‑lɛid ar‑ttinin: «manza ġwalli?»

¹² iggut ma‑fllas‑itnšmušn. kra gisn ar‑ittini: «argaz ifulkin a‑iga.» kra ar‑ittini: «uhu, ar‑ijllu mddn.»

¹³ walaynni ur‑iẓḍar yan a‑yall awal‑ns, ašku ksuḍn zġ‑imġarn n‑ayt‑yudaya.

¹⁴ lliġ iruḥ mnaṣṣ ġ‑uwssan l‑lɛid, ikšm yasuɛ s‑tgmmi n‑rbbi ar‑isslmad.

¹⁵ ar‑gis‑tɛjjabn imġarn n‑ayt‑yudaya ar‑ttinin: «argaz‑ad ur‑d‑ikki lmdrst. mamnk a‑s‑issn ġunškad n‑ulmmud?»

¹⁶ imma yasuɛ irur‑asn inna: «almmud‑ad ur‑igi winu. iga win ġwalli‑yyi‑d‑yuznn.

¹⁷ wanna iran a‑iskar ma‑ira rbbi, nttan a‑ra‑yissan almmud‑ad izd dar rbbi a‑zġ‑d‑yuška nġd ar‑d‑sawalġ zġ‑ih̬f‑inu.

¹⁸ yan‑d‑isawaln zġ‑ih̬f‑ns, ar‑ittiri a‑t‑alġn mddn. walaynni yan ittirin a‑t‑yalġ ġwalli‑t‑id‑yuznn, nttan ar‑ittini lḥqq ur‑a‑isskirkis.

¹⁹ musa ifka‑yawn ššrɛ n‑rbbi, walaynni ur‑gigun‑illi yan iskarn s‑ššrɛ. mah̬ aylliġ a‑ttirim a‑yyi‑tnġm?»

²⁰ rarn‑as‑d mddn‑an: «kiyi, kra l‑ljnn a‑k‑ikšmn. ma‑iran a‑k‑inġ?»

²¹ yini‑asn yasuɛ: «yan‑uskkir kad‑skrġ, ar‑kullu‑gis‑ttɛjjabm.

²² yuṣṣa‑kʷn musa a‑tẓẓallm i‑tarwa‑nnun, wah̬h̬a urd musa ka‑izwarn ġ‑tẓallit‑an walaynni imzwura‑nnun a‑zwar‑iẓẓullan. tmyarm ġilad a‑tẓẓallm i‑bnadm ula ġ‑wass n‑usunfu.

²³ walaynni iġ‑tẓẓullam i‑bnadm ġ‑wass n‑usunfu baš a‑tskarm s‑ššrɛ n‑musa, ma‑f‑awn‑flla‑ṭiyyr lliġ jjujjiġ bnadm kullut ġ‑wass n‑usunfu?

²⁴ a‑ur‑ttnbaḍm s‑ma‑d‑ibann i‑mddn walaynni tnbaḍat s‑lḥqq.»

²⁵ bdun kra n‑ayt‑urušalim ar‑sqsan i‑ngratsn ar‑ttinin: «is‑urd ġwad ad‑ran imġarn a‑t‑nġn?

²⁶ hati ar‑isawal ġ‑wammas n‑mddn, ur‑as‑nnin yat. ḥaqqan ssnn izd s‑ṣṣaḥt nttan a‑igan lmasiḥ n‑rbbi?

²⁷ walaynni argaz‑ad, nssn manizġ‑d‑yuška. iġ‑d‑yuška lmasiḥ, ur‑ra‑yissan yan manizġ‑d‑yuška.»

²⁸ ar‑isslmad yasuɛ ġ‑tgmmi n‑rbbi, yall awal‑ns yini: «is‑iyi‑tssnm? is‑tssnm manizġ‑d‑uškiġ? ur‑d‑uznġ ih̬f‑inu. lḥqq a‑iga ġwalli‑yyi‑d‑yuznn, walaynni ur‑ti‑tssinm kunni.

²⁹ ssnġ‑t nkki ašku giġ zġ‑gis, d‑nttan a‑yyi‑d‑yuznn.»

³⁰ nkrn mddn ġakudan a‑t‑ġwin, walaynni ur‑iẓḍar yan a‑n‑srs‑ig afus ašku ur‑ta‑di‑tlkim tasaɛt‑ns.

³¹ walaynni iggut ġ‑mddn‑an ma‑srs‑yumnn, ar‑ttinin: «iġ‑d‑yuška lmasiḥ n‑rbbi is‑ra‑iskr lmɛjizat uggʷar n‑maylli iskr‑urgaz‑ad?»

³² sfldn ifarisin i‑ma‑ttinin mddn i‑ngratsn f‑yasuɛ. nkrn ntni d‑inmġurn n‑tgmmi n‑rbbi, aznn‑d imh̬zniyn a‑t‑amẓn.

³³ isawl yasuɛ s‑mddn yini‑asn: «ġir kra idrusn a‑ra‑sul‑didun‑iliġ, wrriġ ilmma s‑walli‑yyi‑d‑yuznn.

³⁴ ra‑sri‑tsiggilm walaynni ur‑ra‑yyi‑tafm, ašku illis rad‑dduġ ur‑tẓḍarm a‑srs‑tddum.»

³⁵ ssmqsan ilmma mddn‑an n‑ayt‑yudaya i‑ngratsn inin: «manis ra‑iddu aylliġ ur‑ra‑t‑naf nkkʷni? is‑ira a‑iddu s‑dar ayt‑darnnġ lli‑zdġnin ġ‑tmizar yaḍni a‑ġin‑isslmad ayt‑tmizar‑an?

³⁶ ha‑ntta inna ra‑srs‑nsiggil ur‑ra‑t‑naf, yini is‑ur‑nẓḍar a‑nddu s‑illis ra‑iddu. ma‑tga lmɛna n‑wawal‑ad?»

isaffn n‑waman n‑tudrt

³⁷ ġ‑wass iggʷran l‑lɛid, iga ass kullu ihiyyan, ibidd yasuɛ yall awal‑ns yini: «wanna yaġ irifi, a‑d‑sri‑yašk isu.

³⁸ wanna sri yumnn, ‹isaffn n‑waman n‑tudrt a‑ra‑iftu zġ‑uwl‑ns› ġmklli ityaran.»

³⁹ awal‑ad, inna‑t yasuɛ f‑rruḥ n‑rbbi lli‑ra‑d‑igguz f‑willi srs umnnin. ġ‑uwssan‑an ur‑ta‑yasn‑d‑ityawfka rruḥ, ašku ur‑ta‑ityalal yasuɛ s‑lmjd.

⁴⁰ lliġ sfldn mddn i‑wawal‑an, kra gisn inna: «s‑ṣṣaḥt, ġwad a‑igan nnabi lli‑s‑a‑ntql.»

⁴¹ inin wiyyaḍ: «ġwad a‑igan lmasiḥ n‑rbbi.» imma wiyyaḍ nnan: «izd tamazirt n‑jalil a‑zġ‑ra‑d‑yašk lmasiḥ?

⁴² is‑ur‑ityara ġ‑warra n‑rbbi, lmasiḥ ra‑ig zġ‑tasut n‑ugllid dawd, ilal ġ‑bitlaḥm aduwwar lli‑ġ‑ttin ikka izdġ dawd?»

⁴³ bḍun mddn‑an i‑ngratsn f‑ssibt‑ns.

⁴⁴ kra gisn ira a‑t‑iġwi, walaynni ur‑n‑srs‑igi yan afus‑ns.

⁴⁵ wrrin imh̬zniyn s‑dar inmġurn n‑tgmmi n‑rbbi d‑ifarisin. sqsan‑tn ntni: «mah̬ aylliġ ur‑t‑id‑tiwim?»

⁴⁶ inin‑asn imh̬zniyn: «ur‑jju‑illi yan isawaln zund argaz‑an.»

⁴⁷ inin‑asn ifarisin: «izd ula kunni tjlam?

⁴⁸ is‑illa zġ‑imġarn nġd ifarisin ma‑srs‑yumnn?

⁴⁹ imma mddn‑an yaḍni lli‑ur‑ssinnin ššrɛ, tagat a‑tn‑yutn.»

⁵⁰ illa yan ġ‑gr ifarisin‑an ism‑ns niqudimus, ikka‑ttin yuška‑d dar yasuɛ. isawl ġakudan yini‑asn:

⁵¹ «is‑ra‑iḥkam ššrɛ‑nnġ f‑yan ur‑ta‑nsfld i‑ma‑ittini f‑ih̬f‑ns ula nssn ma‑iskar?»

⁵² imma ntni rurn‑as: «izd ula kiyi gu‑jalil a‑tgit? siggil ġ‑warratn tissant is‑ur‑ra‑d‑yašk kra n‑nnabi zġ‑jalil.»

⁵³ nkrn iftu kud yan s‑tgmmi‑ns.