yuḥanna 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

isawl lmasiḥ s‑uwllt‑samira

¹ sfldn ifarisin is‑a‑iskar yasuɛ imḥḍarn uggʷar n‑yuḥanna, ar‑tn‑issddam ġ‑waman.

² urd f‑ufus n‑yasuɛ a‑f‑a‑tddamn walaynni f‑ufus n‑imḥḍarn‑ns,

³ walaynni lliġ isfld yasuɛ f‑mayd ttinin iffuġ tamazirt n‑yudaya yamẓ aġaras n‑jalil.

⁴ iqqan‑t‑id a‑izri zġ‑tmazirt n‑samira.

⁵ ilkm‑d yat‑tmdint ġ‑samira ar‑as‑ttinin suh̬ar. tlla ġ‑tsga n‑igr lli‑ifka yaɛqub i‑yus yusf.

⁶ illa‑ġin‑wanu n‑yaɛqub. igawr yasuɛ ġ‑tama n‑wanu ašku irmi ġ‑uġaras, ig lḥal ṭuẓẓunt n‑wass.

⁷ tašk‑id yat‑tmġart ullt‑samira a‑n‑taggʷm. isawl srs yasuɛ yini‑as: «fk‑iyi ad‑suġ.»

⁸ ur‑dids‑llin imḥḍarn‑ns ġ‑tasaɛt‑an, ašku ddan s‑tmdint ad‑d‑sġn mad‑šttan.

⁹ tini‑as‑d‑tmġart: «mah̬ a‑yyi‑tḍalbt a‑tsut? kiyi tgit gu‑yudaya, nkki giġ ullt‑samira.» ašku ayt‑yudaya ur‑a‑ssan zġ‑irukutn n‑ayt‑samira.

¹⁰ isawl yasuɛ yini‑as: «mrad is‑tssnt tawafka n‑rbbi ula ma‑iga ġwad‑am‑innan ‹fk‑iyi ad‑suġ,› ikun tḍalbt‑iyi fkġ‑am aman n‑tudrt.»

¹¹ trar‑as‑d‑tmġart: «wa‑sidi, han anu idra, ur‑dark ddlu. maniġ ra‑taft aman‑lli n‑tudrt?

¹² is‑tugʷrt babatnnġ yaɛqub lli‑aġ‑ifkan anu‑ad, isu zġ‑gis ntta d‑tarwa‑ns d‑lksibt‑ns?»

¹³ isawl yasuɛ yini‑as: «kullu wanna iswan zġ‑waman‑ad rad‑daġ‑irufu,

¹⁴ imma wanna iswan zġ‑waman lli‑rad‑as‑fkġ nkki, ur‑sar‑irufi. ašku aman lli‑rad‑as‑fkġ ra‑zgis‑ngin zund yat talɛint n‑tudrt idumn.»

¹⁵ tini‑as‑d‑tmġart ġakudan: «wa‑sidi, fk‑iyi aman‑ad, a‑yyi‑ur‑sul‑yaġ irifi ula‑da‑d‑sul‑ttaškiġ a‑n‑aggʷmġ.»

¹⁶ yini‑as yasuɛ: «zayd ġr‑d i‑urgaz‑nnm twrrid‑d.» imma nttat trur‑as‑d:

¹⁷ «ur‑dari argaz.» yini‑as yasuɛ: «tʷġẓant lliġ tnnit ur‑darm argaz,

¹⁸ ašku tkkit‑sttin ttahalt smmus irgazn. imma ġwalli‑da‑tllit ġ‑uwssan‑ad ur‑km‑itahil. lḥqq ayd‑s‑tnnit.»

¹⁹ tini‑as‑d‑tmġart: «wa‑sidi, ssnġ ġilad izd kra n‑nnabi a‑tgit.

²⁰ ha‑imzwura‑nnġ nkkʷni ar‑tɛbadn rbbi ġ‑iggi n‑udrar‑ad, imma kunni ar‑ttinim ‹urušalim a‑ġ‑d‑iqqan mddn ad‑tɛbadn.›»

²¹ isawl yasuɛ yini‑as: «amn‑iyi a‑tamġart. rad‑d‑aškin‑uwssan ġ‑ra‑ttɛbadm rbbi babatnnġ urd ġir ġ‑udrar‑ad nġd ġ‑urušalim.

²² kunni ar‑ttɛbadm ġwalli ur‑tssinm. nkkʷni nssn ma‑ntɛbad, ašku dar ayt‑yudaya a‑d‑ikka‑ujnjm n‑rbbi.

²³ walaynni rad‑d‑aškin kra n‑uwssan, hatni‑nnit lkmn‑d, lli‑ġ‑rad‑ilin kra n‑mddn ar‑tɛbadn rbbi babatnnġ ġmklli ira, s‑tḥkimt n‑rruḥ lqudus ula lḥqq. zund ġwid a‑ira babatnnġ a‑ti‑tɛbadn.

²⁴ rbbi iga rruḥ. winna ranin a‑ti‑tɛbadn iqqan‑tn‑d a‑ti‑tɛbadn s‑tḥkimt n‑rruḥ ula lḥqq.»

²⁵ tini‑as‑d‑tmġart: «ssnġ is‑ra‑d‑yašk lmasiḥ (a‑t‑igan d‑umẓlay n‑rbbi). ġakud nna‑d‑yuška rad‑aġ‑d‑iml kullu tiġawsiwin‑ad.»

²⁶ yini‑as yasuɛ: «nkki‑ad didm isawaln a‑t‑igan.»

²⁷ ġakudan ad‑d‑wrrin imḥḍarn n‑yasuɛ. tɛjjbn lliġ‑t‑in‑ufan ar‑isawal d‑yat‑tmġart, walaynni ur‑as‑nnin «ma‑dars‑trit?» ula «mah̬ aylliġ a‑dids‑tsawalt?»

²⁸ tnkr‑tmġart tfl agdur‑ns tftu s‑tmdint, ar‑ttini i‑mddn n‑ġin:

²⁹ «aškad‑d a‑tẓrm yan‑urgaz isawl‑iyi f‑kullu mad‑skrġ. ḥaqqan izd ġwad a‑igan lmasiḥ n‑rbbi.»

³⁰ ffuġn‑d mddn zġ‑tmdint ftun‑d s‑dar yasuɛ.

³¹ ur‑ta‑d‑ruḥn mddn‑an, sawln‑d imḥḍarn s‑yasuɛ inin‑as: «hak a‑tššt ay‑amslmd.»

³² imma ntta inna‑yasn: «illa dari ma‑yyi‑iššbaɛn, ur‑ti‑tssinm kunni.»

³³ sqsan imḥḍarn i‑ngratsn: «is‑illa mad‑as‑d‑yiwin ma‑ištta?»

³⁴ imma yasuɛ inna‑yasn: «ha‑yyi ar‑tšbaɛġ iġ‑a‑skarġ ma‑ira ġwalli‑yyi‑d‑yuznn, ssafuġ tawuri‑ns.

³⁵ is‑ur‑a‑ttinim ‹kkuẓ‑iyrn a‑sul‑iqaman i‑tmgra›? walaynni rad‑awn‑iniġ, allat alln‑nnun a‑tẓrm igran mlluln, lkmn f‑tmgra.

³⁶ ġilad ġwalli imgrn ar‑itamẓ tiġrad‑ns, ar‑issmunu ṣṣabt n‑tudrt idumn, baš a‑ifrḥ ġwalli ikrzn ula ġwalli imgrn i‑ngratsn.

³⁷ yʷġẓan‑wawal lli‑s‑a‑ttinin mddn ‹ikrz‑t yan, imgr‑t wayyaḍ.›

³⁸ ha‑yyi uznġ‑kʷn a‑tmggrm ġaylli‑f‑ur‑tutm tammara. wiyyaḍ utn tammara, imma kunni ar‑di‑ttawim ġaylli‑f‑tt‑utn.»

³⁹ iggut ma‑yumnn s‑yasuɛ ġ‑tmdint‑an n‑samira lliġ sfldn i‑tugga lli‑fllas‑tfka‑tmġart‑lli, tini‑asn «isawl‑iyi f‑kullu mad‑skrġ.»

⁴⁰ lliġ‑t‑id‑ruḥn ḍalbn‑t ad‑darsn‑igawr. iqama ġin dar ayt‑samira sin‑uwssan.

⁴¹ ar‑ttigatn s‑uggʷar ġwilli srs umnnin lliġ‑as‑sfldn ar‑isawal.

⁴² inin i‑tmġart‑an: «urd ġir f‑ssibt n‑wawal‑nnm a‑f‑numn ġilad walaynni nsfld‑as ula nkkʷni, nissan izd s‑ṣṣaḥt ġwad a‑igan anjjam n‑ddunit.»

lmasiḥ ijjujji yus n‑unmġur

⁴³ lliġ zrin sin‑uwssan iftu yasuɛ, yamẓ aġaras s‑tmazirt n‑jalil.

⁴⁴ ntta s‑ih̬f‑ns a‑ifkan tugga‑yad inna: «ur‑illi kra n‑nnabi, uqqrn‑t ayt‑tmazirt‑ns.»

⁴⁵ lliġ ilkm jalil frḥn srs ayt‑jalil, ašku ddan ula ntni s‑urušalim a‑n‑zzrin lɛid, ẓrn kullu maylli iskr ġin ġ‑uwssan‑an.

⁴⁶ iwrri yasuɛ s‑tmdint n‑qana ġ‑jalil ġ‑illiġ irur aman ad‑gn aman n‑waḍil iktin. illa ġin yan‑unmġur n‑tmazirt, yuḍn‑as yus ġ‑tmdint n‑kafrnaḥum.

⁴⁷ lliġ isfld is‑d‑yuška yasuɛ zġ‑yudaya s‑jalil, iddu s‑dars iḍalb‑t a‑d‑yašk a‑ijjujji yus ašku ar‑itmtat.

⁴⁸ isawl yasuɛ ġakudan yini: «iġ‑ur‑tẓrim lmɛjizat d‑lquwwat ur‑akkʷ‑a‑ttirim a‑tamnm.»

⁴⁹ yini‑as‑d‑unmġur: «ašk‑id a‑sidi ur‑ta‑immut iwi.»

⁵⁰ irar‑as yasuɛ: «zayd, ra‑iddr yuk.» iftu‑urgaz yamn mad‑as‑inna yasuɛ.

⁵¹ nttan sul ifta ġ‑uġaras mnaggarn‑t‑id ih̬ddamn‑ns inin‑as: «ha‑yuk iddr.»

⁵² isqsa‑tn: «man tasaɛt a‑ijji?» inin‑as: «titti zġ‑gis tawla iḍgam ġ‑tasaɛt izwarn ġ‑ṭuẓẓunt n‑wass.»

⁵³ issn izd tasaɛt‑an a‑ġ‑as‑inna yasuɛ «ra‑iddr yuk,» yamn srs ntta ula kullu ayt‑tgmmi‑ns.

⁵⁴ h̬tad a‑igan tis snat lmɛjizat iskr‑tt yasuɛ lliġ‑d‑yuška zġ‑yudaya s‑jalil.