yuḥanna 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

isawl lmasiḥ d‑niqudimus

¹ illa yan‑urgaz zġ‑lmdhb n‑ifarisin, iga ism‑ns niqudimus, ig yan zġ‑imġarn n‑ayt‑yudaya.

² yuška‑d s‑dar yasuɛ ġ‑iyḍ yini‑as‑d: «way‑amslmd, nssn izd rbbi a‑k‑id‑yuznn a‑tsslmadt, ašku ur‑iẓḍar yan a‑iskar lmɛjizat lli‑tskart iġ‑ur‑dids‑illi rbbi.»

³ isawl yasuɛ yini‑as: «lḥqq ayad, lḥqq a‑rad‑ak‑iniġ. yan ur‑iluln zġ‑ljdid ur‑ra‑yiẓḍar a‑iẓr tagldit n‑rbbi.»

⁴ yini‑as‑d niqudimus: «mamnk a‑ra‑yiẓḍar yan a‑d‑ilal d‑nttan imqqur? is‑ra‑iwrri s‑waḥlig n‑innas a‑d‑ilal tis snat‑twal?»

⁵ isawl yasuɛ yini‑as: «lḥqq ayd‑ak‑ttiniġ, yan ur‑iluln s‑waman d‑rruḥ ur‑iẓḍar a‑ikšm s‑tgldit n‑rbbi.

⁶ aynna iluln zġ‑ddat, win ddat a‑iga. aynna iluln zġ‑rruḥ, win rruḥ a‑iga.

⁷ «ad‑ur‑tɛjjbt ġ‑wawal‑ad‑ak‑nniġ ‹iqqan‑kʷn‑d a‑tlalm zġ‑ljdid.›

⁸ ar‑iṣwaḍ‑waḍu s‑inna ira, ar‑tsflidt i‑tijjijt‑ns, walaynni ur‑tssint mani‑d‑ikka ula manis ifta. ġmkad a‑iga rruḥ lqudus dar kullu wanna zġ‑gis iluln.»

⁹ yini‑as‑d niqudimus: «mamnk a‑iẓḍar a‑yili mayad?»

¹⁰ yini‑as yasuɛ: «kiyi tgit amslmd n‑ayt‑rbbi, sul ur‑tssint tiġawsiwin‑ad?

¹¹ lḥqq ayd‑ak‑ttiniġ, ar‑nsawal f‑ma‑nssn ar‑nakka tugga f‑ma‑nẓra, imma kunni ur‑trim a‑tamnm tugga‑nnġ.

¹² ar‑awn‑ttiniġ f‑tġawsiwin n‑ddunit‑ad, ur‑iyi‑tuminm. mamnk a‑ra‑yyi‑tamnm iġ‑awn‑nniġ f‑tġawsiwin n‑ignna?

¹³ «ur‑iġli yan s‑ignna abla yus n‑bnadm lli‑d‑igguzn zġ‑ignna.

¹⁴ ġmklli yull musa algmmaḍ n‑wanas f‑iggi n‑uggjdi ġ‑lh̬la, ġmkan a‑yyi‑d‑iqqan ad‑tyalalġ ula nkki lli‑igan yus n‑bnadm,

¹⁵ baš a‑tili tudrt idumn i‑kullu wanna sri yumnn.»

¹⁶ ašku ġunškad a‑s‑iḥnna rbbi f‑ddunit aylliġ‑d‑ifka ġwalli igan yus, a‑d‑ikkis i‑lhalak kullu wanna srs yumnn, išškšm‑tn s‑tudrt idumn.

¹⁷ ašku rbbi ur‑d‑yuzn yus s‑ddunit baš a‑iḥkam f‑ddunit, walaynni yuzn‑t‑id baš a‑tnjm ddunit f‑ufus‑ns.

¹⁸ wanna sri yumnn, ur‑ra‑fllas‑ittut lḥukm. imma wanna ur‑irin a‑yamn, lḥukm a‑fllas‑illan ašku ur‑yumin s‑wad igan yus n‑rbbi.

¹⁹ ġayad a‑f‑ittut lḥukm, ašku tkšm‑d tifawt s‑ddunit irin mddn tillas uggʷar n‑tifawt, myarn ad‑skarn lh̬ʷšant.

²⁰ kullu wanna iskarn ma‑yʷh̬šnn, ar‑itkrhu tifawt. ur‑a‑ittiri a‑d‑iffuġ s‑tifawt a‑ur‑d‑bayynn iskkirn‑ns.

²¹ imma wanna iskarn s‑lḥqq, ar‑d‑itffuġ s‑tifawt baš ad‑d‑bayynn iskkirn‑ns izd s‑wawal n‑rbbi a‑s‑a‑iskar.

isawl yuḥanna amsddam f‑lmasiḥ

²² tiġurdin n‑mayan iddu yasuɛ d‑imḥḍarn‑ns s‑tmazirt n‑yudaya, iqama ġin ar‑issddam mddn ġ‑waman.

²³ ula yuḥanna ġ‑uwssan‑an ar‑issddam mddn, yili ġ‑tsga n‑ɛinnun ašku ġin a‑ġ‑ggutn‑waman, ur‑bahra‑yaggug zġ‑salim. ar‑di‑ttaškin mddn s‑dar yuḥanna, ddmn ġ‑waman f‑ufus‑ns.

²⁴ ġakudan ur‑ta‑ityamaẓ yuḥanna ġ‑lḥbs.

²⁵ yan‑wass ar‑sawaln imḥḍarn n‑yuḥanna d‑yan‑urgaz iga gu‑yudaya, ar‑tmjaḥadn f‑usġus n‑ayt‑yudaya.

²⁶ aškin‑d s‑yuḥanna inin‑as: «way‑amslmd, ġwalli‑k‑imnaggarn ġ‑tsga yaḍni n‑urdun tfkt fllas tugga‑nnk, hati ar‑issddam ula ntta, ar‑dars‑ttidun mddn kullutn.»

²⁷ isawl yuḥanna yini‑asn: «ur‑iẓḍar yan a‑iṭṭaf kra iġ‑ur‑as‑t‑ifki rbbi.

²⁸ kunni tsfldm‑iyi lliġ nniġ ‹urd nkkin a‑igan lmasiḥ walaynni yuzn‑iyi‑d rbbi ad‑zwurġ i‑lmasiḥ.›

²⁹ taslit tin‑usli a‑tga, imma amddakkʷl n‑usli ibidd ġ‑tama n‑usli ar‑isflid i‑wawal‑ns ifrḥ srs. yuwfa gigi lfrḥ‑ad ġila.

³⁰ iqqan‑d a‑yaqlay ntta, ar‑tgguzġ nkki.»

tugga n‑walli‑d‑yuškan zġ‑ignna

³¹ ġwalli‑d‑yuškan zġ‑uflla, nttan a‑yugʷrn kullu ma‑illan. wanna igan zġ‑ddunit, gu‑ddunit a‑iga, ar‑isawal ġir f‑tġawsiwin n‑ddunit. imma ġwalli igan zġ‑ignna, yugʷr kullu ma‑illan.

³² ar‑yakka tugga f‑ma‑iẓra ula ma‑mi‑isfld, walaynni ur‑illi ma‑yumnn tugga‑ns.

³³ imma wanna yumnn tugga‑ns, hati imla izd rbbi a‑dar lḥqq.

³⁴ ġwalli‑d‑yuzn rbbi, ar‑bdda‑isawal s‑iwaliwn n‑rbbi, ašku iɛmmr‑t kullu s‑tḥkimt n‑rruḥ‑ns.

³⁵ rbbi, iɛzza dars yus, ig kullu ma‑illan ġ‑ddu‑ufus‑ns.

³⁶ wanna yumnn s‑yus n‑rbbi, ra‑iddr tudrt idumn. imma wanna ur‑isflidn s‑yus ur‑ra‑iṭṭaf tudrt walaynni ra‑fllas‑iqama lġaḍab n‑rbbi.