yuḥanna 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tamġra ġ‑qana

¹ zrin sin‑uwssan s‑tlla yat‑tmġra ġ‑tmdint n‑qana ġ‑tmazirt n‑jalil, tili ġin innas n‑yasuɛ.

² ityawɛraḍ ula yasuɛ d‑imḥḍarn‑ns s‑tmġra.

³ lliġ‑asn‑tmman‑waman n‑waḍil iktin, tini‑as innas i‑yasuɛ: «ur‑sul darsn aman n‑waḍil.»

⁴ yini‑as yasuɛ: «mad‑dari‑trit, a‑tamġart? han ur‑ta‑di‑tlkim tasaɛt‑inu.»

⁵ imma innas tzuyd tini i‑ih̬ddamn: «skrat aynna‑s‑awn‑inna.»

⁶ llant ġin sḍiṣṭ‑th̬abatin mqqurnin n‑uẓru, ar‑gisnti‑tggan aman lli‑s‑a‑tġusn ayt‑yudaya s‑isird‑nsn. kraygatt yat ra‑ttasi ma‑itggan miyya n‑litru.

⁷ isawl yasuɛ s‑ih̬ddamn yini‑asn: «ɛmmrat tih̬abatin s‑waman.» ɛmmrn‑tnt ar imi.

⁸ izayd yini‑asn: «asiyat ġilad, tawim i‑bu‑tmġra.» ddun awin‑as aman.

⁹ lliġ imḍi bu‑tmġra aman lli‑iwrrin gn aman n‑waḍil, ur‑issin mani‑d‑kkan. ġir ih̬ddamn lli‑tn‑d‑uggʷmnin a‑issnn. iġr i‑usli

¹⁰ yini‑as: «ar‑bdda‑di‑tawin mddn aman n‑waḍil iḥlan ġ‑isizwar n‑tmġra, ard sun inbgiwn yan kra fkn‑asn‑d wiyyaḍ yaḍni. imma kiyi tssuggʷrit‑n aman n‑waḍil iḥlan ar ġilad.»

¹¹ h̬tad a‑igan lmɛjizt tamzwarut, iskr‑tt yasuɛ ġ‑qana n‑jalil, issbayyn‑d lmjd‑ns, amnn srs imḥḍarn‑ns.

¹² iftu yasuɛ ġakudan s‑tmdint n‑kafrnaḥum, ntta d‑innas d‑aytmas d‑imḥḍarn‑ns. gawrn ġin kra n‑uwssan.

lmasiḥ ġ‑tgmmi n‑rbbi

¹³ yakmur‑d lɛid n‑usurf ġ‑dar ayt‑yudaya, iftu yasuɛ s‑tmdint n‑urušalim.

¹⁴ ikšm s‑tgmmi n‑rbbi yaf‑n mddn ar‑gis‑zznzan izgarn d‑uwlli d‑itbirn, iẓr wiyyaḍ skiwsn ġ‑dar lmyadi‑nsn ar‑tṣrrafn iqaridn.

¹⁵ yasi izakarn iftl‑tn, iṭṭay srsn mddn‑an kullutn zġ‑tgmmi n‑rbbi, ntni d‑uwlli d‑izgarn, igllb lmyadi n‑iṣrrarfin ffin iqaridn‑nsn f‑wakal.

¹⁶ yini i‑willi zznzanin itbirn: «ssufġat ġayad zġ‑ġid. a‑ur‑trarm tigmmi n‑baba a‑tg ssuq.»

¹⁷ ktin‑d imḥḍarn‑ns ma‑ityaran ġ‑warra n‑rbbi, «tayri f‑tgmmi‑nnk a‑ijddrn ul‑inu.»

¹⁸ nkrn imġarn n‑ayt‑yudaya inin‑as: «ml‑aġ kra l‑lmɛjizt ad‑aġ‑tg tamatart n‑is‑dark lḥqq a‑tskart ġayad.»

¹⁹ irar‑asn yasuɛ yini: «h̬lwat tigmmi‑ad n‑rbbi, bnuġ‑tt ġ‑kraḍ‑uwssan.»

²⁰ inin‑as‑d: «kkuẓ id‑mraw d‑sḍiṣ (46) n‑usggʷas ayd bnnun tigmmi‑ad. mamnk a‑trit kiyi a‑stti‑tbnut ġ‑kraḍ‑uwssan?»

²¹ imma yasuɛ, hati isawl f‑ddat‑ns a‑igan tigmmi n‑rbbi.

²² lliġ‑d‑inkr zġ‑lmut ktin‑d imḥḍarn‑ns maylli‑s‑asn‑inna, amnn arra n‑rbbi d‑wawal‑ad s‑inna yasuɛ.

²³ lliġ illa yasuɛ ġ‑urušalim ġ‑uwssan l‑lɛid n‑usurf, amnn srs mddn ggutnin lliġ ẓran lmɛjizat lli‑iskr.

²⁴ imma yasuɛ ur‑gisn‑yumin ntni, ašku issn kullu mddn mamnk ad‑gan.

²⁵ ur‑iḥtajja mad‑as‑yakkan tugga f‑bnadm, ašku issn ma‑illan ġ‑bnadm.