yuḥanna 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

awal n‑tudrt

¹ illa‑wawal ġ‑isizwar n‑kullu ma‑illan. rbbi a‑dar‑illa‑wawal‑an, ig‑wawal‑an rbbi.

² illa dar rbbi ġ‑isizwar,

³ srs a‑s‑ih̬lq kullu ma‑illan. ur‑illi kra ih̬lq‑t rbbi abla ityawh̬laq srs.

⁴ awal‑an a‑ġ‑tlla tudrt, tg‑tudrt‑an tifawt i‑mddn.

⁵ ar‑ttisfiw tifawt ġ‑tillas, imma tillas ur‑as‑sugirnt yat.

⁶ ikka‑ttin yan‑urgaz, yuzn‑t‑id rbbi, iga ism‑ns yuḥanna.

⁷ yuška‑d a‑ig inigi, ifk tugga f‑tifawt baš ad‑amnn kullu mddn f‑imi‑ns.

⁸ urd nttan a‑igan tifawt, walaynni yuška‑d a‑yakka tugga f‑tifawt.

⁹ ašku s‑ddunit a‑s‑ra‑d‑yašk ġwalli igan tifawt l‑lḥqq lli‑ittisfiwn f‑kullu mddn.

¹⁰ yuška‑d s‑ddunit, d‑srs a‑s‑ttyawh̬laq ddunit, walaynni ur‑t‑ukʷzn ayt‑ddunit.

¹¹ yuška‑d dar wins, walaynni ur‑t‑rin mddn‑ns.

¹² imma kullu winna‑t‑ranin amnn srs, ifka‑yasn lḥqq ad‑gn tarwa n‑rbbi.

¹³ ntni, urd s‑tlalit n‑waḥlig a‑s‑luln nġd s‑tayri n‑ddat nġd s‑tayri n‑urgaz, walaynni rbbi a‑tn‑igan d‑tarwa‑ns.

¹⁴ awal‑an iwrri iga bnadm, izdġ ġ‑gratnnġ, nẓr lmjd‑ns. iga lmjd n‑walli igan yan dar babas, tigat gis lbaraka d‑lḥqq.

¹⁵ yuḥanna ifka fllas tugga, yall awal‑ns yini: «ġwad a‑igan ġwalli‑s‑awn‑nniġ ‹ra‑d‑yašk tigira‑nu yan yugʷr‑iyi ašku illa ur‑ta‑lliġ.›»

¹⁶ nkkʷni kullwaġ, llant‑aġ lbarakat ggutnin zġ‑tuggt l‑lbaraka lli‑gis‑illan.

¹⁷ f‑ufus n‑musa a‑f‑d‑ityawfka ššrɛ, imma f‑ufus n‑yasuɛ lmasiḥ a‑f‑di‑tuška lbaraka d‑lḥqq.

¹⁸ rbbi, ur‑jju‑t‑iẓri yan, walaynni ġwalli igan yus yili‑bdda d‑babas, nttan ad‑aġ‑imlan mamnk a‑iga.

tabrraḥt n‑yuḥanna amsddam

¹⁹ ġmkad ad‑gant tugga n‑yuḥanna ġakud lliġ‑d‑srs‑uznn ayt‑yudaya kra n‑inmġurn d‑ih̬ddamn n‑tgmmi n‑rbbi zġ‑urušalim. sqsan yuḥanna inin‑as‑d: «ma‑tgit kiyi?»

²⁰ isawl iml‑asn lḥqq, ur‑as‑yunf s‑yat. yini‑asn: «urd nkki a‑igan lmasiḥ n‑rbbi.»

²¹ sqsan‑t‑daġ: «izd nnabi iliyya a‑tgit?» yini‑asn: «urd iliyya ad‑giġ.» sqsan‑t: «is‑tgit nnabi imqqurn lli‑ra‑d‑yašk?» yini‑asn: «uhu.»

²² ḍalbn‑as ilmma: «ini‑aġ ma‑tgit. ml‑aġ ma‑ra‑nini i‑willi‑aġ‑d‑uznnin. ma‑ttinit f‑ih̬f‑nnk?»

²³ isawl yuḥanna yini‑asn: «giġ ġwalli itbrraḥn ġ‑lh̬la ar‑ittini ‹ssnmat aġaras n‑siditnnġ›,» ġmklli‑s‑inna nnabi išaɛya.

²⁴ llan kra n‑mddn zġ‑lmdhb n‑ifarisin ġ‑gr‑willi‑d‑uznn ayt‑yudaya.

²⁵ sqsan yuḥanna: «mah̬ aylliġ a‑tssddamt mddn ġ‑waman lliġ ur‑tgit lmasiḥ nġd iliyya nġd nnabi lli‑imqqurn?»

²⁶ isawl‑d yuḥanna yini‑asn: «nkki ar‑kʷn‑ssddamġ ġ‑waman walaynni illa yan ġ‑gratun ur‑ti‑tukʷzm,

²⁷ ig ġwalli ra‑d‑yašk tigira‑nu. ur‑sthllaġ nkki ad‑rẓmġ ifalan n‑turẓiyin‑ns.»

²⁸ ijra kullu mayad ġ‑bitɛanya ġ‑tsga yaḍni n‑wasif n‑urdun. ġin a‑ġ‑a‑issddam yuḥanna mddn ġ‑waman.

alqqaġ n‑rbbi

²⁹ ndid azkka iẓr‑n yuḥanna yasuɛ ifta‑d s‑dars, yini fllas: «han alqqaġ n‑rbbi lli‑ra‑issitti ddnub n‑ddunit.

³⁰ ġwad a‑igan ġwalli‑f‑awn‑nniġ ‹rad‑yašk tigira‑nu yan yugʷr‑iyi ašku illa ur‑ta‑lliġ.›

³¹ ula nkki kkiġ‑ttin ur‑t‑ukʷzġ, walaynni f‑ssibt‑ns a‑f‑a‑ssddamġ mddn ġ‑waman baš a‑ityawssan dar ayt‑rbbi.»

³² izayd yuḥanna ifk tugga‑ns yini: «ẓriġ rruḥ n‑rbbi igguz‑d zġ‑ignwan zund yan‑utbir ittrs‑d fllas.

³³ ar ġakudan ur‑t‑ukʷzġ, walaynni rbbi lli‑yyi‑d‑yuznn ad‑ssddamġ mddn ġ‑waman, nttan ad‑iyi‑innan ‹ra‑tẓrt rruḥ igguz‑d ittrs‑d f‑yan‑urgaz. nttan a‑ra‑issddam mddn s‑rruḥ lqudus.›

³⁴ ha‑yyi ẓriġ‑t ġilad, fkġ‑awn tugga‑nu, ġwad a‑igan yus n‑rbbi.»

imḥḍarn l‑lmasiḥ imzwura

³⁵ ndid azkka illa ġin yuḥanna ibidd d‑sin zġ‑imḥḍarn‑ns.

³⁶ iẓr‑n yasuɛ ifta‑d. isawl yuḥanna yini: «han alqqaġ n‑rbbi.»

³⁷ lliġ sfldn sin imḥḍarn‑lli i‑ma‑inna, ddun ḍfurn yasuɛ.

³⁸ igrawl‑d yasuɛ iẓr‑tn ḍfarn‑t yini‑asn‑d: «ma‑tsiggilm?» inin‑as: «maniġ tzdġt, a‑rabbi?» (awal‑ad, tga lmɛna‑ns ‹ay‑amslmd›.)

³⁹ yini‑asn‑d: «aškad‑d a‑tẓrm.» munn dids ẓrn illiġ izdġ, gawrn dids ġassan ašku tlkm‑d tasaɛt tis kkuẓṭ n‑tdggʷat.

⁴⁰ andraws gʷmas n‑simɛan bṭrus, nttan a‑igan yan ġ‑sin imḥḍarn lli‑sfldnin i‑wawal n‑yuḥanna ḍfurn yasuɛ.

⁴¹ iddu ġakudan yaf‑n gʷmas simɛan yini‑as: «ha‑yaġ nmnaggar ġwalli igan lmasiḥ n‑rbbi.» (awal‑ad ‹lmasiḥ›, tga lmɛna‑ns ‹amẓlay›.)

⁴² yawi‑t‑id ilmma s‑dar yasuɛ. issmaqql gis yasuɛ, yini‑as: «kiyi tgit simɛan yus n‑yuna, walaynni rad‑ak‑nttini kafa.» ism‑ad, tga lmɛna‑ns ‹aẓru› zund lmɛna n‑bṭrus.

filibbus d‑natanayl

⁴³ ndid azkka iskr yasuɛ f‑a‑iddu s‑tmazirt n‑jalil. imnaggar filibbus yini‑as: «ašk‑id, mun didi.»

⁴⁴ iga filibbus gu‑bitṣayda lli‑igan tamdint n‑andraws d‑bṭrus.

⁴⁵ iddu filibbus yaf‑n natanayl yini‑as: «ha‑yaġ nmnaggar ġwalli‑f‑yura musa ġ‑ššrɛ ula lanbiya ġ‑warratn‑nsn. iga yasuɛ gu‑naṣira yus n‑yusf.»

⁴⁶ irar‑as‑d natanayl: «is‑iẓḍar a‑d‑yašk kra ifulkin zġ‑naṣira?» yini‑as filibbus: «ašk‑id a‑tẓrt.»

⁴⁷ yasuɛ iẓra‑n natanayl ifta‑d s‑dars, yini fllas: «ġwad a‑igan s‑ṣṣaḥt zġ‑ayt‑rbbi, iṣfu‑uwl‑ns.»

⁴⁸ yini‑as‑d natanayl: «ma‑s‑iyi‑tssnt?» irar‑as yasuɛ: «lliġ ur‑ta‑yak‑iġri filibbus, ẓriġ‑k‑in ġ‑ddu tazart.»

⁴⁹ isawl‑d natanayl yini‑as: «way‑amslmd, kiyi a‑igan yus n‑rbbi, tgt agllid n‑ayt‑rbbi.»

⁵⁰ irar‑as yasuɛ: «is‑sri‑tumnt lliġ‑ak‑nniġ ‹ẓriġ‑k‑in ġ‑ddu tazart›? ra‑sul‑tẓrt uggʷar n‑mayad.»

⁵¹ izayd yasuɛ yini‑as: «lḥqq ayad, lḥqq a‑rad‑awn‑iniġ. ra‑tẓrm ignwan rẓmn, tẓrm lmalayka n‑rbbi ar‑aqlayn ar‑di‑tgguzn f‑yus n‑bnadm.»