yaɛqub 5 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ sfldat ay‑id‑bu‑wayda. allat ġilad ar‑tssġuyyum f‑tguḍi lli‑rad‑awn‑yili.

² han ayda‑nnun imda, d‑ibrdan‑nnun tšša‑tn‑twukka.

³ han urġ‑nnun ula nnuqrt‑nnun tġwit‑tn tanigt. ġmkan a‑ra‑tšš tanigt‑an tifiyi‑nnun zund lɛafit, tfk fllawn tugga ġ‑wass l‑lḥsab. ašku kunni tssmunm kigan i‑ih̬f‑nnun ġ‑uwssan ggʷranin.

⁴ han tiġrad lli‑ur‑tfkim i‑willi mggrnin ġ‑igran‑nnun. ar‑ssmummʷin išuwwaln, lkmnt tġuyya‑nsn imzgan n‑sidi rbbi itjhhdn.

⁵ tzzrim ussan‑nnun ġ‑ddunit s‑kullu ma‑ttirim, ar‑tšttam ar‑ttfraḥm ar‑ttɛalafm ddat‑nnun i‑wass n‑tġrsi.

⁶ tssḍrm lbaḍl f‑ayt‑ufulki tnġm‑tn, ur‑n‑rurn f‑ih̬f‑nsn s‑yat.

ṣṣbr d‑ujnjm

⁷ imma kunni ay‑aytma, ṣbrat ard‑d‑yašk siditnnġ, zund afllaḥ lli‑itqln ard‑as‑di‑tġli ṣṣabt iɛzzan ġ‑igr‑ns, ar‑itṣbar ard iḍr‑unẓar amnzu ula amaẓẓuẓ.

⁸ ula kunni, illa fllawn a‑ttṣbarm ar‑tzzɛamm ulawn‑nnun, ašku yakmur‑d‑wass lli‑ġ‑ra‑d‑yašk siditnnġ.

⁹ way‑aytma, a‑ur‑ttngmugm i‑ngratun a‑ur‑fllawn‑ittut lḥukm. ha‑lqaḍi imqqurn ibidd‑d ġ‑imi.

¹⁰ swangmat ay‑aytma ġ‑lanbiya lli‑sawalnin s‑ism n‑siditnnġ ġayd izrin, ašku ṣbrn ntni ġ‑kullu‑tmmariw‑nsn.

¹¹ nga‑tn d‑imbarkin ašku ṣbrn sul zgan. tsfldm kunni f‑ayyub ġmklli iṣbr izga, tissanm mamnk a‑t‑ibark sidi rbbi tigira. ašku siditnnġ ar‑bahra‑itḥnna ar‑bdda‑iskar afulki.

¹² imma taġawsa ihiyyan ay‑aytma, tga ġmka: a‑ur‑ttgallam, la s‑ignna ula s‑wakal ula s‑kra n‑tgallit yaḍni. walaynni iġ‑iga‑wawal‑nnun «iyah» tinim «iyah.» iġ‑iga «uhu» tinim «uhu» baš a‑fllawn‑ur‑ittut lḥukm.

¹³ iġ‑illa kra n‑yan gigun yutn tammara, illa fllas a‑iḍalb i‑rbbi f‑ġayan. iġ‑illa kra n‑yan gigun ifrḥn, illa fllas a‑yalġ rbbi s‑umarg l‑lfrḥ.

¹⁴ iġ‑illa kra n‑yan gigun yuḍnn, illa fllas a‑yazn s‑imġarn n‑umnaggar baš a‑n‑dars‑aškin ḍalbn rbbi fllas ẓġurn‑t s‑zzit s‑ism n‑siditnnġ.

¹⁵ ra‑iskr siditnnġ ma‑zgis‑ḍalbn ġwilli umnnin, ijjujji amaḍun issdus‑t. iġ‑iskr kra n‑ddnub ra‑tn‑fllas‑issitti.

¹⁶ f‑mayad a‑f‑rad‑awn‑iniġ, qrrat s‑ddnub‑nnun i‑ngratun, ar‑ttḍalabm rbbi f‑ingratun baš a‑tjjim. hati taẓallit n‑yan irḍan rbbi ar‑di‑ttawi kigan.

¹⁷ ula nnabi iliyya iga bnadm zund nkkʷni, imma ntta iḍalb bahra i‑rbbi a‑ur‑yili‑unẓar, s‑ur‑d‑iḍr‑unẓar f‑wakal kraḍ isggʷasn d‑mnaṣṣ.

¹⁸ iḍalb‑t‑daġ s‑d‑fkan ignwan anẓar, awin‑d ikalln ṣṣabt‑nsn.

¹⁹ way‑aytma, iġ‑gigun‑illa kra n‑yan iffuġn zġ‑lḥqq irar‑t‑id wayyaḍ s‑uġaras,

²⁰ swangmat mayad: wanna‑d‑irurn yan ijlan zġ‑ma‑yʷh̬šnn, ra‑t‑issanf i‑lmut l‑lih̬rt, issaggug‑t zġ‑kigan d‑ddnub.