yaɛqub 4 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

lh̬ʷšant n‑ddunit ula lbaraka n‑rbbi

¹ mah̬ aylliġ a‑ttmmaġm ar‑ttẓim i‑ngratun? is‑urd f‑ssibt n‑ma‑gigun‑tmmaġn iswingimn n‑ma‑ittiri ih̬f‑nnun?

² ar‑ttirim kra ur‑tlkimm, ġakudan ar‑tnkkrm a‑tnqqam. ar‑ttẓuẓḍm ma‑mi‑ur‑tẓḍarm, ġakudan ar‑tmmaġm ar‑fllas‑tkkatm. han ur‑a‑teṭṭafm ma‑ttirim ašku ur‑a‑ti‑ttḍalabm zġ‑rbbi.

³ walaynni iġ‑a‑ttḍalabm kra zġ‑rbbi ur‑a‑yawn‑t‑yakka, ašku urd f‑ufulki a‑f‑a‑ti‑ttḍalabm walaynni ġir ma‑s‑a‑tssfraḥm ih̬f‑nnun.

⁴ han tffuġm aġaras bahra. is‑ur‑tssinm mayad? wanna dar tɛzza ddunit, irur tiġurdin‑ns s‑rbbi. yan dar iɛzza ma‑igan win ddunit, iga ih̬f‑ns d‑wad iẓin d‑rbbi.

⁵ is‑tġalm is‑ur‑yʷġẓan maylli ityaran ġ‑warra n‑rbbi inna: «ul lli‑ginnġ‑iga rbbi ar‑ittiri kigan»?

⁶ walaynni uggʷar a‑tga lbaraka lli‑aġ‑yakka, ġmklli ityaran: «rbbi ar‑itḍaḍḍa wanna issimġurn ih̬f‑ns, walaynni ar‑itbarak wanna iẓẓimẓayn ih̬f‑ns.»

⁷ mayan a‑f‑rad‑awn‑iniġ, fkat ih̬f‑nnun ġ‑ddu‑ufus n‑rbbi. ḍaḍḍat iblis s‑irwl zġ‑gigun.

⁸ akmurat‑n s‑rbbi, yakmur‑d srun. wa‑kunni lli‑iskarn ddnub, sirdat ifassn‑nnun. wa‑kunni lli‑ikkatn f‑sin iġarasn, ssġusat ulawn‑nnun

⁹ tigʷraẓ‑kʷn ṭiyyr‑awn ar‑tallam. kkisat taḍṣa, tskrm f‑imṭṭawn. ssittiyat lfrḥ, tskrm f‑tguḍi.

¹⁰ knwat ġ‑lgddam n‑siditun yall‑kʷn.

¹¹ way‑aytma, a‑ur‑trggmm i‑ngratun. ašku wanna irgmn ġ‑gʷmas, nġd inna fllas is‑yʷh̬šn, hati iga ih̬f‑ns d‑wad yugʷrn luṣiyat n‑rbbi, irar‑tnt zund iġ‑ur‑gint yat. iġ‑tgit ih̬f‑nnk f‑iggi n‑ššrɛ n‑rbbi, ur‑sul‑tgit wad srs iskarn walaynni wad fllas itḥkamn.

¹² han rbbi waḥdut a‑iẓḍarn a‑yakka luṣiyat, d‑nttan waḥdut a‑iẓḍarn a‑ikkat lḥukm ar‑ijjnjam ar‑ithlak. walaynni ma‑tgit kiyi aylliġ trit a‑tinit f‑wayyaḍ is‑yʷh̬šn?

¹³ sfldat, a‑kunni lli‑ittinin «ra‑nddu ġassad nġd azkka s‑tmdint yaḍni, ngawr‑n gis yan‑usggʷas ar‑nsaġ ar‑nzznza ar‑ntamẓ iqaridn.»

¹⁴ walaynni ur‑tssinm ma‑ra‑yili azkka. mad‑akkʷ‑tga tudrt‑nnun? hati tudrt‑nnun tga zund tamdlut imẓẓin lli‑d‑ibann yan kra s‑tt‑laḥ.

¹⁵ walaynni illa fllawn a‑ttinim «iġ‑ira siditnnġ, ra‑nddr nskr ġmka ula ġmka.»

¹⁶ imma kunni ar‑ttalġm ih̬f‑nnun ar‑tssfurrugm f‑ma‑ra‑tskrm. han ʷh̬šnn isfurrugn‑an.

¹⁷ imma yan issnn a‑iskr afulki ur‑t‑iskir, ddnub ad‑as‑iga ġayan.