yaɛqub 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ils n‑bnadm

¹ way‑aytma, a‑ur‑tirim a‑kullu‑tgm imslmdn, ašku tssnmm nkkʷni‑ad isslmadn, itabɛa‑yaġ lḥsab uggʷar n‑wiyyaḍ.

² s‑kigan a‑s‑a‑ntmzagal kullwaġ. iġ‑illa ma‑ur‑itmzagaln ġ‑ma‑ittini, ra‑ig nttan wad ikmmln yiẓḍar a‑itnbaḍ ġ‑ddat‑ns kullutt.

³ ula agmar, ar‑as‑ntgga aġamu ġ‑imi ma‑s‑a‑ntḥkam ġ‑ddat‑ns kullutt baš a‑fllas‑nttidu s‑inna nra.

⁴ ula anaw ġ‑umda, wah̬h̬a imqqur bahra itjhhd‑waḍu lli‑t‑idḥayn, ar‑t‑isslulli bab‑ns s‑yat‑tflut imẓẓin baš a‑ittidu s‑inna ira.

⁵ ġmkan a‑iga ils n‑bnadm. wah̬h̬a imẓẓi, ar‑issfurrug f‑tġawsiwin mqqurnin. mnšk a‑tlla tagant ar‑tti‑tjddr‑tsafut imẓẓin.

⁶ zund ġmkan a‑ijddr ils, ašku iɛmmr s‑lh̬ʷšant ġ‑ugʷns n‑ddat‑nnġ, ar‑issyʷh̬šan bnadm kullut. ar‑itznad i‑ddunit s‑lɛafit lli‑d‑iffuġn zġ‑jhnnama.

⁷ ẓrat luḥuš, iẓḍar bnadm a‑tn‑yamẓ. luḥuš n‑tagant d‑igḍaḍ d‑ifaġrn d‑islman, ar‑tn‑ntamẓ kullutn.

⁸ walaynni ur‑illi yan iẓḍarn a‑yamẓ ils‑ns. ar‑bdda‑ilddi s‑ma‑yʷh̬šnn, yagʷi a‑izga, iɛmmr s‑ssmm lli‑inqqan.

⁹ s‑ils a‑s‑a‑ntalġ sidi rbbi babatnnġ. s‑ils‑daġ a‑s‑a‑nrggm bnadm lli‑ityawskarn f‑ṣṣurt n‑rbbi.

¹⁰ han yan‑imi a‑d‑itkka la ššukr ula targgimt. way‑aytma, ur‑akkʷ‑išwi a‑gigun‑yili zund ġayan.

¹¹ is‑tlla talɛint di‑tkkan‑waman mimnin ula wid smmumnin?

¹² izd ay‑aytma, tlla tazart iskarn zzit, nġd ddalit iskarn ikuzarn? ur‑sar‑rad‑ftun‑waman mimnin zġ‑talɛint ismmumn.

taḥkimt lli‑d‑ikkan ignna

¹³ manwa gigun ad‑dar taḥkimt yissan ma‑illan? illa fllas a‑iml taḥkimt‑ns s‑ma‑iskar, ar‑itfulki d‑mddn ar‑iẓẓimẓay ih̬f‑ns s‑tḥkimt lli‑iṣḥan.

¹⁴ walaynni iġ‑tlla‑tnuwwašt ġ‑uwl‑nnun nġd ar‑ttirim a‑tagʷrm tzwurm wiyyaḍ, a‑ur‑talġm ih̬f‑nnun ula tsskarksm f‑lḥqq.

¹⁵ ašku wan taḥkimt‑an, urd ignna a‑di‑tkka, walaynni tuška‑d zġ‑ddunit. urd tin rruḥ lqudus a‑tga, walaynni tga tin iblis.

¹⁶ iġ‑a‑ttirin mddn ad‑agʷrn zwurn wiyyaḍ, ra‑tigat taẓit ula kullu ma‑yʷh̬šnn.

¹⁷ walaynni yan dar taḥkimt lli‑d‑ikkan ignna, ġmkad a‑ra‑ig. amzwaru iġus‑uwl‑ns, yiri sslamt, ar‑itrh̬u d‑mddn, ar‑srsn‑isflid, ar‑gisn‑itḥnnu, ar‑d‑itawi ṣṣabt n‑ufulki. ur‑a‑iskar s‑uwdmawn ula‑da‑iskar zund iġ‑iga kra ur‑igi.

¹⁸ hati tamgra n‑ufulki, ar‑tt‑mggrn ġwilli‑d‑iwinin amud n‑sslamt ar‑t‑in‑tluḥn s‑sslamt.