yaɛqub 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ġwilli dar iggut ula ġwilli dar idrus

¹ way‑aytma, a‑ur‑tskarm s‑uwdmawn ġilad ġ‑tumẓm aġaras n‑siditnnġ yasuɛ lmasiḥ bab l‑lmjd.

² ra‑kʷn‑sqsaġ, ma‑ra‑tskrm ġ‑umnaggar‑nnun iġ‑n‑ikšm yan dar talh̬atmt n‑uwrġ d‑tmlsit iʷġlan, ikšm‑n ula yan‑umẓluḍ s‑ibrdan‑ns bbinin?

³ is‑ra‑tnsallamm d‑bu‑tmlsit išwan tinim‑as «zayd a‑sidi a‑tskiwst ġ‑lgddam,» tinim i‑umẓluḍ «bidd ġ‑tġurdin» nġd «gawr‑n ġin»?

⁴ walaynni iġ‑a‑tskarm ġmkan is‑urd udmawn‑nnit ayn tskarm, ar‑ttḥkamm f‑ingratun s‑tnbaḍin ʷh̬šnnin?

⁵ sfldat ay‑aytma ɛzzanin. is‑ur‑tssinm mayad? rbbi isti ġwilli dar ma‑idrusn ġ‑ddunit ad‑darsn‑yigat liman, kšmn s‑lwrt n‑tgldit lli‑f‑inna ra‑t‑ifk i‑willi ranin rbbi.

⁶ imma kunni ar‑ttḥgarm imẓlaḍ. ra‑kʷn‑sqsaġ, manwi‑kʷn‑ssrfufunnin ar‑kʷn‑zukurn s‑lmḥkamat? is‑urd ġwilli dar iggut‑wayda?

⁷ is‑urd ntni a‑irggmn ism ifulkin n‑walli mi tgam wins?

⁸ hati afulki ayd tskarm iġ‑a‑tskarm s‑luṣit ihiyyan n‑tgldit n‑rbbi ġmklli ityaran «a‑ttirit adjar‑nnk zund ih̬f‑nnk.»

⁹ walaynni iġ‑a‑tskarm s‑uwdmawn han ddnub ayan, iḥkam fllawn ššrɛ n‑rbbi ašku tffuġm zġ‑gis.

¹⁰ ašku yan iskarn kullu s‑ššrɛ n‑rbbi, iġ‑zgis‑iffuġ ġir s‑yat‑tġawsa, hati iwrri iga zund yan‑zgis‑iffuġn kullut.

¹¹ ašku rbbi lli‑innan «a‑ur‑tznut» inna‑daġ «a‑ur‑tnġt.» iġ‑tunft i‑zzna walaynni tnġit, hati twrrit tgit wad iffuġn zġ‑ššrɛ.

¹² sawalat ar‑tskarm s‑mklli‑d‑iqqann mddn lli‑f‑ra‑iḥkam rbbi s‑luṣit lli‑aġ‑irẓmn zġ‑iskraf‑an.

¹³ ašku wanna ur‑itṣamaḥn, ra‑fllas‑iḥkam rbbi bla‑yas‑iṣamḥ. imma wanna itṣamaḥn, ur‑ra‑t‑ilkm lḥukm.

ġwalli yumnn d‑walli iskarn

¹⁴ way‑aytma, mal‑lfaytt a‑ra‑yili iġ‑inna kra n‑yan «ha‑yyi umnġ» walaynni ur‑a‑iskar ifulkitn? is‑ra‑t‑ijjnjm wan liman‑an?

¹⁵ mal‑lfaytt gigun illan iġ darun gʷmatun nġd ulltmatun ilkm f‑ma‑ilssa nġd ma‑ištta

¹⁶ tinim‑as: «zayd s‑sslamt, ad‑ak‑d‑yawi rbbi ma‑tlssat ula ma‑tšttat,» bla‑yas‑tfkam kunni maylli‑f‑tlkm ddat‑ns?

¹⁷ walaynni ġmkan a‑iga wanna yumnn ur‑a‑iskar afulki. hati immut liman‑ns.

¹⁸ walaynni ma‑rad‑iniġ iġ‑illa kra n‑yan inna‑yyi «liman a‑dark‑illan, imma nkki llan dari ifulkitn»? rad‑as‑rarġ «ml‑iyi liman‑nnk bla ifulkitn, mlġ‑ak liman‑inu s‑ifulkitn lli‑skarġ.

¹⁹ kiyi tumnt izd rbbi yan a‑iga. tʷġẓant. ula ljnun ʷh̬šnnin umnn s‑mayan, ar‑trgigiyn s‑tksaḍ.»

²⁰ way‑argaz ifssusn, is‑trit ad‑zaydġ mlġ‑ak izd liman bla ifulkitn ur‑igi yat?

²¹ ma‑s‑irḍa rbbi s‑babatnnġ ibrahim? irḍa srs f‑ssibt n‑ma‑iskr. yiwi yus isḥaq ad‑as‑iġrs f‑ukrkur ifk‑t i‑rbbi.

²² is‑ur‑tfhimt mayan? yumn ibrahim iskr, ikmml liman‑ns s‑iskkirn‑ns.

²³ ijra ġmklli ityaran ġ‑warra n‑rbbi lli‑innan: «ibrahim yumn rbbi. mayan a‑f‑t‑iga rbbi d‑wad‑f‑irḍa.» yini‑daġ f‑ibrahim is‑iga amddakkʷl n‑rbbi.

²⁴ is‑ur‑tẓrim ġilad? rbbi ar‑srnnġ‑itrḍu f‑ssibt n‑ma‑nskar urd f‑ssibt n‑ma‑numn ukan.

²⁵ ġmkan a‑tga ula tamggant raḥab, irḍa srs rbbi f‑ssibt n‑kra tskr. ašku tssrgs imazann, tɛawn‑tn ad‑ddun f‑yan‑uġaras yaḍni.

²⁶ han immut liman ġ‑ur‑llin ifulkitn, ġmklli ttmtat ddat nna‑ġ‑ur‑tlli rruḥ n‑tudrt.