yaɛqub 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ zġ‑yaɛqub ah̬ddam n‑rbbi d‑siditnnġ yasuɛ lmasiḥ, i‑ayt‑rbbi lli‑akutnin ġ‑ddunit kullutt. ad‑awn‑tili sslamt.

lbarakat n‑rbbi ġ‑uwssan n‑tnukmut

² frḥat bahra ay‑aytma ġakud nna‑ttyaramm s‑tnukmut nna‑illan,

³ ašku tssnm iġ‑tzrim ġ‑tnukmut sul‑tzgam ġ‑uġaras l‑lmasiḥ, ra‑kʷn‑issdus mayan baš a‑tiẓḍarm a‑ttṣbarm s‑uggʷar.

⁴ imma ġilad, zaydat tṣbrm ard tlkmm ttmi baš a‑timġurm tkmmlm bla‑kʷn‑ih̬ṣṣa yat.

⁵ walaynni iġ‑illa kra gigun ur‑iṭṭaf taḥkimt, illa fllas a‑iḍalb rbbi lli‑yakkan ma‑iggutn i‑kullu mddn bla‑da‑ti‑tigʷraẓ, rad‑as‑tt‑ifk.

⁶ walaynni iġ‑iḍalb, iqqan‑t‑id a‑yamn bla iškka. ašku yan iškkan iga zund taḍangt n‑umda, ar‑tt‑issmussu‑waḍu ar‑tt‑itawi s‑tsga‑ya d‑h̬ta.

⁷ wanna igan ġmkan, a‑ur‑iġal is‑ra‑yamẓ kra zġ‑siditnnġ,

⁸ ašku ar‑n‑itafa ih̬f‑ns ġ‑gr snat‑tnbaḍin, ur‑a‑itzga ġ‑kullu ma‑ra‑iskr.

⁹ way‑aytma, wanna gigun dar idrus lh̬ir, illa fllas a‑ifrḥ iġ‑t‑yull rbbi.

¹⁰ imma wanna gigun dar iggut, illa fllas a‑ifrḥ iġ‑t‑izzugz rbbi. ašku ra‑izri bu‑wayda zund ajddig n‑tuga,

¹¹ ar‑di‑taqlay tafukt s‑trġi‑ns iḥrran, tjdr tuga iḍr‑ujddig‑ns laḥ afulki‑ns. ġmkan a‑s‑rad‑laḥ bu‑wayda lliġ a‑sul‑itsala tawuri‑ns.

¹² ambarki a‑iga wanna iṣbrn izgan ġ‑tasaɛt n‑tnukmut. ašku lliġ ityaram sul‑izga, rad‑as‑yili ttaj n‑tudrt idumn lli‑f‑inna rbbi ra‑t‑ifk i‑willi ranin rbbi.

¹³ walaynni iġ‑ityaram kra n‑yan, ad‑ur‑yini «rbbi ayd‑iyi‑itarmn,» ašku rbbi ur‑a‑iskar ma‑yʷh̬šnn ula‑da‑ilddi yan a‑iskr lh̬ʷšant.

¹⁴ walaynni iġ‑ityaram kra n‑yan, han ššhwat‑ns a‑t‑in‑ildin ard‑ti‑tġwi‑tẓqqurt.

¹⁵ ġakudan iġ‑gis‑qamant ššhwat rad‑arunt ddnub. ula ddnub, iġ‑gis‑zuydn rad‑d‑awin lmut.

¹⁶ way‑aytma ɛzzanin, a‑ur‑tjlum ih̬f‑nnun.

¹⁷ kullu ma‑igan tawafka išwan ula kullu ma‑igan lbaraka ifulkin, zġ‑uflla a‑zġ‑d‑yuška, zġ‑rbbi lli‑iskrn tifawin n‑ignwan. imma nttan ur‑a‑itmutti ula‑da‑itbddal ula‑da‑itllas.

¹⁸ iskr ma‑iqṣad, ifk‑aġ tudrt l‑ljdid s‑wawal l‑lḥqq, baš a‑nwrri ng lġllt tamnzut n‑kullu ma‑ih̬lq.

awal n‑rbbi d‑liman iṣḥan

¹⁹ way‑aytma ɛzzanin, swangmat ġ‑mayad: illa f‑kud yan a‑yifsus a‑isfld, yiẓẓay a‑isawl, yiẓẓay a‑ur‑iqlaql.

²⁰ ašku yan itqlaqaln ur‑ra‑yiẓḍar a‑iskar afulki lli‑itrḍun rbbi.

²¹ kkisat zġ‑gigun iskkirn rkanin ula lh̬ʷšant lli‑iggutn ġ‑mddn. tadrat i‑ih̬f‑nnun ar‑ttqbalm awal lli‑gigun‑itẓẓu rbbi, ašku iẓḍar‑wawal‑an a‑kʷn‑ijjnjm.

²² illa fllawn a‑tgm wid skarnin s‑wawal n‑rbbi, urd wid sflidnin ukan. a‑ur‑tjllum ih̬f‑nnun,

²³ ašku yan isflidn i‑wawal n‑rbbi bla‑da‑srs‑iskar, iga zund yan‑n‑yuggʷan s‑lmri a‑iẓr udm‑ns.

²⁴ ġir yuggʷa‑n iẓr ih̬f‑ns yitti, s‑ittu man udm a‑iskr.

²⁵ imma wanna itmnadn ġ‑ulmmud ifulkin lli‑irẓmn i‑mddn zġ‑iskraf, ar‑tt‑gis‑itawi ar‑srs‑iskar bla‑da‑itettu maylli mi isfld, nttan a‑ra‑ibark rbbi ġ‑kullu ma‑iskar.

²⁶ iġ‑illa kra n‑yan iġaln izd amumn a‑iga walaynni ur‑a‑itnbaḍ ġ‑ils‑ns, hatin ijla d‑ih̬f‑ns. liman‑ns ur‑igi yat.

²⁷ imma yan dar liman ifulkin iṣḥan ġ‑iẓri n‑rbbi babatnnġ, ġmkad a‑ra‑ig: ar‑itɛawan igigiln d‑thjjalin ġ‑tnukmut‑nsn, ar‑itanf i‑irkan n‑ddunit.