tiṭus 3 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tinbaḍin n‑uġaras l‑lmasiḥ

¹ sskti‑asn‑d is‑fllasn‑illa ad‑sflidn s‑lḥukkam ula kullu wiyyaḍ tḥkamnin tamazirt, ar‑skarn s‑wawal‑nsn, ujadn i‑kra igan tawuri iṣlḥn.

² tinit‑asn a‑ur‑rgmn ġ‑yan ula ẓin d‑yan. illa fllasn ad‑tṣbarn ar‑trh̬un d‑kullu mddn.

³ ula nkkʷni nkka‑ttin nga inafaln imɛṣan imjlan, ntyawkrraf ġ‑ššhwat ula kullu ma‑s‑a‑ttblun mddn. nkka‑ttin ar‑nzzray ussan‑nnġ s‑tnuwwašt d‑iskkirn ʷh̬šnnin, ar‑aġ‑tkrhun mddn ar‑tn‑ntkrhu ula nkkʷni.

⁴ walaynni rbbi anjjam‑nnġ issbayyn‑d mnšk a‑ifulki iḥubbu bnadm.

⁵ s‑rrḥmt‑ns iggutn a‑s‑aġ‑ijjnjm, urd f‑ssibt n‑ifulkitn lli‑nskar. ijjnjm‑aġ isird‑aġ ifk‑aġ talalit n‑tudrt l‑ljdid s‑tḥkimt n‑rruḥ lqudus

⁶ lli‑s‑aġ‑iɛmmr f‑ufus n‑unjjam‑nnġ yasuɛ lmasiḥ.

⁷ ġmkad a‑s‑ginnġ‑iḥnna rbbi iskr sslamt ġ‑gratnnġ dids ifk‑aġ lwrt n‑tudrt idumn lli‑n‑nrja ġilad.

⁸ awal izgan ayad. riġ zġ‑gik a‑tzzgat tiġawsiwin‑ad ġ‑dar willi umnnin awal n‑rbbi, baš ad‑tlhun ih̬f‑nsn s‑iskkirn šwanin. ifulki mayad, ra‑infɛa kullu mddn.

⁹ walaynni anf i‑tjmmaɛt ih̬wan n‑willi tmjaḥadnin f‑ismawn n‑tasutin lli‑zrinin, ar‑tẓin ar‑tmmaġn f‑ššrɛ n‑musa. ġayan ur‑akkʷ‑a‑itnfaɛ s‑yat.

¹⁰ imma wanna yaṭṭun aytmatn, ini‑as a‑ifssa, tinit‑as‑t tis snat‑twal. iġ‑ur‑ifssa, anf‑as a‑ur‑sul‑didun‑imun.

¹¹ ašku issbayyn wan ġwad is‑iffuġ aġaras n‑rbbi s‑ddnub‑ns, izzugz lḥukm f‑ih̬f‑ns.

¹² ġakud nna‑yak‑n‑uznġ artimas nġd tih̬ikus, ašk‑in s‑dari s‑nikubulis, a‑ur‑tmaṭlt. ašku riġ a‑n‑zzriġ tagrst ġin.

¹³ g‑n tiqqi‑nnk a‑tɛawnt lmuḥami zinas nttan d‑abullus, baš ad‑kmmln f‑uġaras‑nsn, tfkt‑asn aynna‑tn‑ih̬ṣṣan.

¹⁴ illa f‑mddn‑nnġ ad‑myurn ad‑tlhun s‑twuri iṣlḥn baš ad‑biddn d‑wanna ilkmn f‑kra, a‑ur‑zzrin tudrt‑nsn bla lfaytt.

¹⁵ ar‑n‑fllak‑tsllamn kullu willi didi llanin. ar‑n‑ntsllam f‑aytmatnnġ ɛzzanin lli‑umnnin s‑lmasiḥ. ad‑awn‑tili lbaraka n‑rbbi kullukn.