tiṭus 2 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

almmud yʷġẓann

¹ imma kiyi, illa fllak a‑tsslmadt mddn ad‑skarn kullu s‑ma‑d‑imšaškan d‑ulmmud yʷġẓann.

² ini i‑irgazn mqqurnin ad‑zgan ġ‑ih̬f‑nsn, ar‑bdda‑tfulkin d‑mddn, ar‑tnbaḍn ġ‑kullu mad‑skarn. tinit‑asn ad‑dusn ġ‑uġaras l‑lmasiḥ ar‑tḥnnun ġ‑wiyyaḍ ar‑tzayadn ġmkad bla‑da‑trmayn.

³ ini ula i‑tmġarin mqqurnin ad‑skarnt ġmklli‑d‑iqqann h̬tilli tuqqarnin rbbi. tinit‑asnt a‑ur‑sawalnt ġ‑mddn ula‑da‑ttblunt s‑tissi iktin. illa fllasnt ad‑sslmadnt timġarin mẓẓinin f‑ma‑ifulkin

⁴ ar‑asnt‑malant mamnk a‑tga tayri lli‑s‑rad‑tɛawannt irgazn‑nsnt ula tarwa‑nsnt.

⁵ ar‑asnt‑malant mamnk a‑rad‑iẓḍarnt ad‑tnbaḍnt ġ‑kullu mad‑skarnt s‑uwl iġusn, ar‑th̬damnt ġ‑tgmmi ar‑tfulkint d‑mddn ar‑sflidnt s‑irgazn‑nsnt baš a‑ur‑d‑irar yan tirggam i‑wawal n‑rbbi.

⁶ ini i‑iɛyyaln ad‑tnbaḍn ġ‑ih̬f‑nsn.

⁷ ula kiyi illa fllak a‑bdda‑tskart afulki d‑mddn baš ad‑asn‑tmalat mamnk a‑tn‑d‑iqqan ad‑skarn ula ntni. sslmad‑tn s‑lḥqq d‑lmɛqul

⁸ s‑iwaliwn ʷġẓannin lli‑f‑ur‑iẓḍar yan a‑fllasn‑iẓi. iġ‑a‑tskart ġmkan ra‑itḥšam wanna iran a‑k‑iḍaḍḍ, ašku ur‑ra‑yaf ma‑fllannġ‑ittini yʷh̬šn.

⁹ ini i‑ih̬ddamn ad‑sflidn s‑id‑siditsn ar‑tn‑trḍun ġ‑kullu mad‑skarn. a‑ur‑fllasn‑ssiqarn ih̬fawn‑nsn

¹⁰ ula‑da‑tn‑takʷrn. illa fllasn a‑bdda‑skarn s‑nniyt‑nsn, baš ad‑ẓrn mddn mnšk a‑s‑ifulki‑ulmmud‑nnġ f‑rbbi lli‑aġ‑ijjnjmn.

¹¹ issbayyn‑d rbbi lḥnant‑ns ġilad a‑srs‑ijjnjm kullu mddn.

¹² ar‑aġ‑isslmad a‑ntanf i‑kullu ma‑t‑ur‑irḍin ula ššhwat n‑ddunit‑ad. ar‑aġ‑isslmad a‑ntnbaḍ ġ‑ih̬f‑nnġ ar‑nskar s‑lḥqq ula kullu ma‑t‑irḍan ġilad ġ‑sul‑nqama ġ‑ddunit.

¹³ ar‑ntql ar‑ntrju ass‑an ambarki lli‑ġ‑ra‑d‑iban lmjd n‑rbbi‑nnġ imqqurn yasuɛ lmasiḥ lli‑aġ‑ijjnjmn.

¹⁴ ifka ih̬f‑ns ad‑aġ‑ifru zġ‑kullu ma‑yʷh̬šnn, issġus‑aġ baš a‑ng mddn‑ns lli‑bahra‑ittirin ad‑skarn ma‑ifulkin.

¹⁵ sslmad tiġawsiwin‑ad i‑aytmatn, ar‑asn‑ttinit ad‑skarn ġmkad, ar‑tššḥššamt wanna iskarn ma‑yʷh̬šn s‑lamr lli‑ak‑ityawfkan. a‑ur‑tadjt yan a‑k‑iḥgr.