tiṭus 1 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

¹ zġ‑bulus ah̬ddam n‑rbbi d‑urqqas n‑yasuɛ lmasiḥ lli‑yyi‑iẓlin ad‑malaġ i‑imẓlayn n‑rbbi mamnk ad‑tamnn s‑wawal‑ns, issann kullu ma‑igan lḥqq n‑uġaras‑ns

² lli‑itawin s‑rrja iṣḥan n‑tudrt idumn. rbbi ur‑a‑isskirkis. ġakud lliġ ur‑ta‑ih̬lq yat a‑inna rad‑aġ‑tili tudrt‑ad.

³ issbayyn‑tt‑id ġ‑uzmz‑ad lli‑iqṣad s‑lh̬bar lli‑s‑iyi‑yuṣṣa rbbi anjjam‑nnġ a‑srs‑tbrraḥġ.

⁴ i‑tiṭus iwi iɛzzan ġ‑tagʷmat l‑liman‑nnġ. ad‑ak‑tili lbaraka d‑sslamt zġ‑rbbi babatnnġ d‑lmasiḥ yasuɛ anjjam‑nnġ.

aẓlay n‑imġarn

⁵ mayad a‑f‑k‑in‑flġ ġ‑igzir n‑krit, baš a‑tkmmlt ma‑iqaman ġ‑twuri, tẓlit kra n‑mddn ġ‑kraygatt tamdint ad‑gn imġarn n‑umnaggar ġmklli‑f‑k‑uṣṣaġ.

⁶ iqqan‑d amġar a‑ig wad ġ‑ur‑illi lɛib, iṭṭaf ġir yat‑tmġart. iqqan‑d tarwa‑ns ad‑gn imumnn bla‑da‑srsn‑taštkkan mddn is‑a‑skarn ma‑yʷh̬šnn ula‑da‑tffuġn zġ‑wawal n‑ayt‑darsn.

⁷ iqqan‑d angabal a‑ig wad ġ‑ur‑akkʷ‑illi kra l‑lɛib ašku tawuri n‑rbbi a‑ra‑igabl. a‑ur‑ig wad itḥgarn wiyyaḍ nġd wad itqlaqaln nġd wad bahra issan tissi iktin nġd wad itmmaġn nġd wad ittirin a‑issmun ma‑iggutn i‑ih̬f‑ns.

⁸ iqqan‑d a‑ig wad issmrḥban s‑willi tmuddunin, ig wad dar iɛzza kullu ma‑ifulkin, ar‑itnbaḍ ġ‑ugayyu‑ns ar‑bdda‑iskar s‑lḥqq, iġus‑uwl‑ns iġwi ġ‑ih̬f‑ns.

⁹ iqqan‑t‑id a‑yamẓ ġ‑iwaliwn zganin lli‑s‑a‑nsslmad. ġmkad a‑s‑ra‑yiẓḍar a‑izzɛam wiyyaḍ s‑ulmmud yʷġẓann, irar awal i‑wanna‑t‑iḍaḍḍn.

tugga f‑ayt‑krit

¹⁰ ašku ggutn mddn ur‑rin ad‑sflidn s‑wawal‑nnġ, bahra ġwilli ttirinin ad‑ẓẓalln i‑ddat, ar‑jllun wiyyaḍ s‑tjmmaɛt ih̬wan.

¹¹ iqqan‑k‑id a‑tn‑tssfssat, ašku ar‑ssgrawaln kra n‑ayt‑tgʷmma kullutn. ar‑sslmadn ma‑ur‑igin lḥqq baš ad‑tamẓn kra i‑ih̬f‑nsn.

¹² illa yan gu‑krit lli‑mi‑ttinin ‹nnabi›, ula ntta isawl fllasn inna: «ayt‑krit ar‑bdda‑sskirkisn. zund luḥuš ʷh̬šnnin ad‑gan. ġir iṭs d‑umššu a‑f‑a‑skarn.»

¹³ ʷġẓannt tugga‑yad. ġayan a‑f‑k‑ih̬ṣṣa a‑tn‑tššḥššmt s‑lmɛqul, baš ad‑zgan ġ‑uġaras l‑lmasiḥ,

¹⁴ a‑ur‑sul‑tti‑tawin ġ‑tḥajiyin n‑ayt‑yudaya ula luṣiyat n‑mddn lli‑ffuġnin zġ‑lḥqq.

¹⁵ hati kullu ma‑illan iġus i‑willi dar ul iġusn, walaynni ur‑iġus yat dar willi mi rkan‑uwlawn‑nsn ur‑rin ad‑amnn. ntni irka lɛaql‑nsn ula ul‑nsn.

¹⁶ ar‑ttinin is‑ssnn rbbi, walaynni iskkirn‑nsn a‑imalan is‑ur‑t‑ssinn. han iḥaša‑tn rbbi, ur‑a‑skarn s‑wawal‑ns ula ẓḍarn i‑ma‑ifulkin.