ruma 9 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

aẓlay n‑ayt‑rbbi

¹ lḥqq ayd‑awn‑ttiniġ s‑ism l‑lmasiḥ, ur‑a‑sskirkisġ. ssnġ mayad ġ‑uwl‑inu lli‑ġ‑a‑itḥkam rruḥ lqudus:

² ṭiyyr‑iyi bahra ar‑iyi‑bdda‑ttaġ‑tguḍi

³ f‑ayt‑tmazirt‑inu lli‑ganin aytma zġ‑tsga n‑ddat. mrad is‑ẓḍarġ a‑tn‑jjnjmġ nkki, rad‑dḥiġ ih̬f‑inu ar lhalak ngaraġ ula d‑lmasiḥ baš a‑tn‑jjnjmġ.

⁴ ntni a‑igan ayt‑rbbi, ig‑tn d‑tarwa‑ns, ifk‑asn lmjd‑ns d‑id‑lɛhd‑ns d‑ššrɛ‑ns. iml‑asn aġaras ma‑s‑a‑ti‑tɛbadn, yini‑asn f‑kullu ma‑rad‑asn‑iskr ifulki.

⁵ zġ‑gisn a‑zġ‑gan id‑babatnnġ imzwura ula lmasiḥ zġ‑tsga n‑ddat. nttan a‑yattuyn f‑kullu ma‑illan, ig rbbi lli‑isthllan a‑t‑ntalġ ġilad ula kullu mayd‑d‑iftan. amin.

⁶ walaynni ur‑rad‑iniġ is‑ḍrn bla lfaytt iwaliwn‑an lli‑ifka rbbi i‑ayt‑dars ġayd izrin. ašku mddn‑an n‑ayt‑rbbi ur‑gin kullutn win rbbi.

⁷ ula tarwa n‑ibrahim, ur‑gin kullutn ayt‑ibrahim. ašku inna rbbi: «zġ‑tarwa n‑yuk isḥaq a‑zġ‑ra‑tili tasut‑nnk.»

⁸ ġmkad a‑s‑imla manwi gisn a‑ra‑ig tarwa n‑rbbi: urd ġwilli lulnin ġmklli tlaln kullu mddn, walaynni ġwilli lulnin s‑wawal n‑rbbi.

⁹ ašku rbbi ifka awal‑ad izgan i‑ibrahim inna‑yas: «rad‑d‑wrriġ imal ġ‑uzmz‑ad, yili i‑sara yan‑warraw.»

¹⁰ walaynni illa kra yaḍni. tffuġ innatnnġ rifqa ar‑trbbu s‑ikniwn zġ‑urgaz‑ns isḥaq babatnnġ.

^11-12 lliġ ur‑ta‑d‑luln‑warraḍn‑an isawl rbbi s‑rifqa, ur‑ta‑skirn kra yʷh̬šnn ula kra išwan. yini‑as fllasn: «amzwaru ra‑ig ah̬ddam i‑wis sin.» ġmkad a‑tn‑ibḍa rbbi ašku iqṣad mayan, urd f‑ssibt n‑kra skrn ntni.

¹³ ġmklli ityaran inna rbbi: «riġ yaɛqub, imma ɛisu ur‑t‑riġ.»

¹⁴ ma‑ra‑nini f‑mayad? is‑a‑iskar rbbi s‑uwdmawn? urd ġmkan a‑ra‑nini.

¹⁵ ašku inna rbbi i‑musa: «rad‑rḥmġ wanna riġ a‑t‑rḥmġ, ḥnnuġ f‑wanna riġ a‑fllas‑ḥnnuġ.»

¹⁶ mayad ur‑n‑iqama ġ‑ma‑ira bnadm nġd ma‑iskar bnadm walaynni iqama‑n ġ‑rrḥmt n‑rbbi.

¹⁷ ityara‑daġ inna rbbi i‑firɛawn: «mayad a‑f‑k‑giġ d‑ugllid, baš a‑gik‑ssbayynġ taḥkimt‑inu itjhhdn, ad‑sfldn mddn ġ‑kullu ddunit f‑ism‑inu.»

¹⁸ ġmkan a‑s‑nssn is‑a‑itrḥam rbbi wanna ira a‑t‑irḥm, ar‑issiqar ih̬f i‑wanna mi ira a‑t‑issiqar.

lġaḍab n‑rbbi ula rrḥmt‑ns

¹⁹ walaynni ra‑d‑isawl kra n‑yan yini‑yyi‑d: «lliġ iga rbbi ġmkad, mah̬ aylliġ a‑yaġ‑sul‑itlamma? ur‑iẓḍar yan a‑iskr abla ġaylli fllas iqṣad rbbi.»

²⁰ imma kiyi a‑bnadm, ma‑tgit aylliġ trit a‑trart awal i‑rbbi? is‑ra‑tini‑tmkilt i‑ufh̬h̬ar «mah̬ aylliġ‑iyi‑tskrt ġmkad?»

²¹ afh̬h̬ar, illa dars lḥqq a‑iskr s‑idqqi mknna ira. iẓḍar a‑iskr snat‑tmkilin zġ‑yan‑uṭṭib, tili yat i‑tmġriwin tili tayyaḍ i‑kraygatt ass.

²² ġmkad a‑iskr rbbi. ira a‑issbayyn i‑mddn lġaḍab‑ns ula taḥkimt‑ns itjhhdn, walaynni ira sul a‑iṣbr d‑tmkilin lli‑f‑illa lġaḍab wah̬h̬a ur‑gint ġir i‑lhalak.

²³ iṣbr ašku ira a‑issbayyn timih̬ar l‑lmjd‑ns i‑willi irḥm lli‑f‑iskr ad‑kšmn ġ‑lmjd.

²⁴ a‑tn‑igan d‑nkkʷni lli‑mi‑iġra zġ‑gr ayt‑yudaya ula‑daġ zġ‑gr ayt‑tmizar yaḍni. ġmklli inna rbbi ġ‑warra n‑nnabi hušaɛ:

²⁵ «ġwilli ur‑ginin mddn‑inu, rad‑asn‑iniġ ‹mddn‑inu›. ġwilli ganin iġribn, rad‑asn‑iniġ ‹ayt‑dari›.

²⁶ ġ‑illiġ nniġ ‹ur‑tgim mddn‑inu,› ġin a‑ġ‑rad‑iniġ ‹tgam tarwa n‑rbbi lli‑illan.›»

²⁷ ula išaɛya ikka‑ttin yull awal‑ns yini f‑mddn n‑ayt‑rbbi: «wah̬h̬a ggutn ayt‑rbbi zund amlal n‑tama n‑umda, idrus ma‑ra‑gisn‑injm.

²⁸ ašku rbbi ur‑ra‑imaṭl. s‑jjhd a‑s‑ra‑yut lḥukm f‑kullu ddunit.»

²⁹ yini‑daġ išaɛya: «sidi rbbi itjhhdn, mrad is‑ur‑aġ‑ifl kra ġ‑tarwa‑nnġ, ikun nh̬wa zund tamdint n‑sadum ula tamdint n‑ɛamura.»

³⁰ ma‑ra‑nini f‑mayad? rbbi irḍa f‑ayt‑tmizar yaḍni. wah̬h̬a ur‑a‑tnawaln ma‑t‑irḍan, irḍa fllasn f‑ssibt n‑mad‑umnn.

³¹ imma ayt‑rbbi lli‑tnawalnin ad‑trḍun rbbi s‑iskkirn n‑ššrɛ, ur‑fllasn‑irḍi.

³² mah̬? ašku s‑iskkirn‑nsn a‑s‑a‑ttirin ad‑trḍun rbbi, urd s‑liman. ġmkad a‑s‑utn aẓru n‑tbayḍḍrt.

³³ ġmklli ityaran: «hati ra‑n‑zzugzġ ġ‑gr mddn‑inu yan‑uẓru imqqurn. rad‑asn‑ig tabayḍḍrt, ig ifir lli‑ra‑tn‑issknuki. imma wanna fllas ittkln ur‑sar‑ti‑tʷgraẓ.»