ruma 8 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tudrt l‑ljdid s‑tḥkimt n‑rruḥ lqudus

¹ imma ġilad ur‑sul‑tlli lɛqubit i‑wanna igan win lmasiḥ yasuɛ.

² ašku tinbaḍin n‑rruḥ lli‑d‑yiwin tudrt i‑willi ganin win lmasiḥ yasuɛ, ntnti a‑yyi‑ifsin zġ‑tnbaḍin n‑ddnub d‑lmut.

³ ur‑iẓḍar ššrɛ a‑ifsi i‑bnadm, ašku bnadm iḍɛf ur‑iẓḍar a‑iskar s‑ššrɛ. walaynni rbbi ad‑aġ‑ifsin, yazn‑d yus a‑iṭṭaf ddat n‑bnadm zund tin willi skarnin ddnub. yut ilmma rbbi lḥukm f‑ddat n‑yus baš a‑issitti ddnub f‑bnadm.

⁴ iskr rbbi mayan baš a‑issafu lḥqq n‑ššrɛ lli‑fllannġ‑illan nkkʷni lli‑iskarn ġilad s‑ma‑ira rruḥ lqudus urd ma‑tra ddat n‑bnadm.

⁵ ġwilli‑stt‑itawin ġ‑ddat ar‑tlhun ih̬f‑nsn s‑ma‑tra ddat. imma ġwilli‑stt‑itawin ġ‑rruḥ lqudus ar‑tlhun s‑ma‑ira rruḥ lqudus.

⁶ wanna itlhun ih̬f‑ns s‑ma‑tra ddat rad‑as‑tili lmut. wanna itlhun s‑ma‑ira rruḥ lqudus rad‑as‑tili tudrt d‑sslamt.

⁷ yan itlhun s‑ddat, hati ar‑itmmaġ d‑rbbi, ašku ur‑a‑iskar s‑tnbaḍin n‑rbbi, ur‑akkʷ‑iẓḍar a‑srsnt‑iskar.

⁸ ġwilli skarnin s‑ma‑tra ddat n‑bnadm ur‑ẓḍarn ad‑rḍun rbbi.

⁹ imma kunni, iġ‑gigun illa rruḥ n‑rbbi, ur‑ra‑tskarm s‑ma‑tra ddat, walaynni ra‑tskarm s‑ma‑ira rruḥ. wanna‑ġ‑ur‑illi rruḥ l‑lmasiḥ, ur‑akkʷ‑igi win lmasiḥ.

¹⁰ imma kunni, lliġ gigun illa lmasiḥ, hati tddrm s‑tudrt n‑rruḥ. ašku tlla sslamt ġ‑gratun d‑rbbi wah̬h̬a ra‑tmmt ddat‑nnun f‑ssibt n‑ddnub.

¹¹ lliġ gigun illa rruḥ n‑walli‑d‑issnkrn yasuɛ zġ‑lmut, ra‑issddr ddat‑nnun lli‑f‑tlla lmut. ašku ġwalli‑d‑issnkrn lmasiḥ zġ‑lmut ra‑kʷn‑issddr ula kunni s‑tḥkimt n‑rruḥ‑ns lli‑gigun‑illan.

¹² ġmkad ay‑aytma, illa fllannġ a‑nskar s‑ma‑ira rruḥ n‑rbbi urd ma‑tra ddat‑nnġ.

¹³ iġ‑a‑tskarm s‑ma‑tra ddat, rad‑awn‑tili lmut. walaynni iġ‑a‑tnqqam iskkirn n‑ddat s‑tḥkimt n‑rruḥ, rad‑awn‑tili tudrt.

¹⁴ kullu winna sflidnin s‑rruḥ n‑rbbi, gan tarwa n‑rbbi.

¹⁵ ašku rruḥ lli‑awn‑ifka rbbi ur‑kʷn‑irur a‑tgm ismgan twrrim‑daġ tiksaḍm, walaynni irur‑kʷn a‑tgm tarwa n‑rbbi aylliġ a‑srs‑naqra: «abba, wa‑baba.»

¹⁶ hati imšaška‑d rruḥ n‑rbbi d‑rruḥ‑nnġ ar‑aġ‑malan izd tarwa n‑rbbi a‑nga.

¹⁷ lliġ nga tarwa‑ns, nissan is‑ra‑nṭṭaf lwrt lli‑ra‑yili i‑mddn n‑rbbi, ra‑nkšm ġ‑lwrt l‑lmasiḥ. iġ‑dids‑nmun ġ‑urfufn, ra‑dids‑nili ġ‑lmjd.

rrja lli‑d‑ifka rbbi i‑willi mi‑d‑iġra

¹⁸ ssnġ nkki tarfufnt n‑uwssan‑ad ur‑tswi yat ġ‑lgddam l‑lmjd lli‑rad‑aġ‑ifk rbbi ġ‑mayd‑d‑yuškan.

¹⁹ ašku kullu ma‑ih̬lq rbbi ġ‑ddunit‑ad ar‑itql yiri bahra ass‑an ġ‑rad‑d‑bann tarwa n‑rbbi.

²⁰ ašku rbbi irur ddunit a‑ttẓuẓḍ ma‑mi‑ur‑tẓḍar. urd ddunit a‑iran a‑tg ġmkan walaynni rbbi ad‑as‑t‑iskrn. walaynni ifka‑yas sul rrja,

²¹ rad‑as‑ifsi zġ‑iskraf l‑lhalak baš a‑n‑tkšm ula nttat ġ‑lmjd n‑tarwa n‑rbbi.

²² nssn izd kullu ma‑illan ġ‑ddunit ar‑inddr s‑ungaẓ zund tamġart lli‑ra‑yaru.

²³ walaynni urd ġir ddunit a‑inddrn. ula nkkʷni lli‑dar lġllat timnza n‑rruḥ lqudus, ar‑nnddr ġ‑ugʷns‑nnġ ġilad ġ‑a‑ntql s‑wass lli‑ġ‑rad‑aġ‑ig rbbi d‑tarwa‑ns ifukku ddat‑nnġ zġ‑lhalak.

²⁴ ašku nkkʷni s‑rrja‑yad a‑s‑nnjm. mrad is‑nẓra maylli‑n‑ntrju ur‑ra‑darnnġ‑yili rrja walaynni iẓri, ašku ur‑iẓḍar yan a‑n‑itrju ġ‑ma‑iẓrra yili dars.

²⁵ walaynni lliġ a‑ntrju ġ‑maylli ur‑ta‑nẓri, hati ar‑srs‑ntql nzga ġ‑rrja ard‑aġ‑yili.

²⁶ ġmkad‑nnit ad‑aġ‑itɛawan rruḥ lqudus ġilad ġ‑sul‑nḍɛf. ur‑nssin ma‑s‑ra‑ntẓalla i‑rbbi ġmklli‑aġ‑d‑iqqann, walaynni rruḥ lqudus ar‑t‑fllannġ‑itḍalab s‑unfusn tjhhdnin lli‑ugʷrnin iwaliwn.

²⁷ imma rbbi lli‑iẓrran ma‑illan ġ‑uwlawn‑nnġ, issn ma‑iqṣad rruḥ. ašku rruḥ ar‑itḍalab f‑imẓlayn n‑rbbi ġmklli ittiri rbbi.

²⁸ imma ġwilli ittirin rbbi iġra‑yasn‑d ġmklli iqṣad, nssn is‑a‑yasn‑iskar afulki ġ‑kullu mad‑asn‑ijrrun.

²⁹ ašku ġwilli issn rbbi zġ‑isizwar, iẓli‑tn ad‑gn zund yus. ġmkad a‑s‑iwrri yus iga nttan amzwaru ġ‑aytmatn ggutnin.

³⁰ imma ġwilli iẓli, iġra‑yasn‑d. d‑willi mi‑d‑iġra, ifka‑yasn sslamt ġ‑gras didsn. d‑willi mi ifka sslamt, išškšm‑tn s‑lmjd‑ns.

lḥnant n‑rbbi

³¹ imma ġilad ma‑ra‑nini f‑kullu mayad? lliġ didnnġ ibidd rbbi ma‑rad‑aġ‑inru?

³² imma rbbi, lliġ ur‑n‑iḥḍi yus ġ‑dars walaynni idḥi‑t‑id f‑ssibt‑nnġ kullwaġ, is‑ur‑ra‑yiri ad‑aġ‑dids‑ifk kraygatt kra?

³³ ma‑iẓḍarn a‑yaštkka s‑imẓlayn n‑rbbi? han rbbi a‑fllannġ‑irḍan.

³⁴ ma‑iẓḍarn a‑yini nʷh̬šn? han lmasiḥ yasuɛ a‑fllannġ‑immutn, inkr‑d‑nnit zġ‑lmut yili f‑ufasi n‑rbbi, ar‑t‑fllannġ‑itḍalab.

³⁵ ma‑rad‑aġ‑issngara d‑lḥnant l‑lmasiḥ? izd tammara nġd tanukmut nġd tarfufnt nġd laẓ nġd lhif nġd ššrr nġd taẓẓit?

³⁶ ġmklli ityaran: «ass kullut ar‑ttirin ad‑aġ‑nġn f‑ssibt‑nnk. gan‑aġ d‑uwlli ġ‑tukʷi‑tġrsi.»

³⁷ walaynni kullu ġayan, nnra‑t bahra s‑ism n‑walli ginnġ iḥnnan.

³⁸ ašku ssnġ mayad bahra: ur‑illi kra iẓḍarn ad‑aġ‑issngara d‑lḥnant‑ns, urd lmut nġd tudrt nġd lmalayka nġd larwaḥ, urd ma‑illan nġd ma‑ra‑yili,

³⁹ urd ssulṭat nġd lquwwat n‑tattuyt nġd tin‑tdrut. kullu ma‑ih̬lq rbbi, ur‑gis‑illi kra iẓḍarn ad‑aġ‑issngara d‑lḥnant n‑rbbi lli‑s‑ginnġ‑iḥnna f‑uwdm l‑lmasiḥ yasuɛ siditnnġ.