ruma 7 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

ššrɛ ula lmut

¹ way‑aytma, rad‑bahra‑tfhmm ma‑rad‑awn‑iniġ ašku kunni tssnm ššrɛ. tissanm is‑ur‑a‑itḥkam ššrɛ abla f‑willi ddrnin.

² ġmkad a‑ra‑yili‑urgaz tamġart‑ns kullu ma‑ikka iddr, walaynni iġ‑immut‑urgaz tfsi‑tmġart zġ‑iskraf l‑lɛqd lli‑stt‑dids‑ikrfn.

³ iġ‑tdda nttat tzdġ d‑kra n‑urgaz yaḍni sul iddr‑urgaz‑ns, rad‑as‑ttinin ‹tamggant›. walaynni iġ‑immut‑urgaz‑ns, tfsi‑tmġart zġ‑lɛqd‑lli n‑ššrɛ. ur‑ra‑tg tamggant iġ‑tt‑itahl yan yaḍni.

⁴ ġmkad a‑tgam ula kunni ay‑aytma. tmmutm s‑lmut l‑lmasiḥ i‑ma‑igan win ššrɛ, iṭṭaf‑kʷn yan yaḍni, a‑t‑igan d‑walli‑d‑inkrn zġ‑lmut baš a‑nskar lġllt ifulkin i‑rbbi.

⁵ ġayd izrin nkka‑ttin ar‑ntlhu s‑ma‑ittiri bnadm i‑ih̬f‑ns, ar‑aġ‑itrara ššrɛ a‑nswingim s‑uggʷar ġ‑lh̬ʷšant lli‑ittiri‑uwl‑nnġ, aylliġ a‑nskar lġllt yʷh̬šnn lli‑d‑itawin lmut.

⁶ imma ġilad ntyawfsay zġ‑ššrɛ nmmt i‑ġaylli‑aġ‑ikrfn, baš a‑ng ih̬ddamn n‑rbbi urd s‑tnbaḍin tiqdimin n‑ššrɛ lli‑ityaran walaynni s‑tnbaḍin l‑ljdid n‑rruḥ lqudus.

⁷ imma ššrɛ, ma‑ra‑fllas‑nini? is‑yʷh̬šn? uhu, urd ġmkan a‑ra‑nini, ašku ššrɛ a‑yyi‑imlan ddnub. mrad is‑urd ššrɛ a‑innan «a‑ur‑ttirit ma‑igan win wiyyaḍ» ikun ur‑rad‑issanġ is‑bahra‑yʷh̬šn ad‑iriġ ma‑igan win wiyyaḍ.

⁸ walaynni lliġ sfldġ i‑luṣit‑an mġin‑d gigi ddnub, rarn‑iyi a‑ttiriġ kullu kra igan win wiyyaḍ. walaynni innaġ ur‑illi ššrɛ ur‑ẓḍarn ddnub ad‑d‑mġin.

⁹ ula nkki kkiġ‑ttin ddrġ lliġ ur‑ta‑ssinġ ššrɛ, walaynni ġakud lliġ sfldġ i‑luṣit bdun ddnub ar‑gigi‑tmġayn aylliġ‑iyi‑ssruḥn i‑lmut.

¹⁰ luṣit lli‑imlan i‑mddn aġaras n‑tudrt, nttat a‑yyi‑d‑yiwin lmut.

¹¹ ašku lliġ sfldġ i‑luṣit‑an mġin‑d gigi ddnub, jlun‑iyi nġn‑iyi.

imiġ lli‑illan ġ‑uwl n‑bnadm

¹² mayad a‑f‑awn‑ttiniġ: ššrɛ iga win rbbi, ula luṣit tga tin rbbi. lḥqq ad‑gan fulkin bahra.

¹³ walaynni izd maylli ifulkin a‑yyi‑d‑yiwin lmut? uhu urd ġmkan a‑iga, ašku ddnub a‑yyi‑d‑yiwin lmut. kšmn ddnub ġ‑maylli ifulkin baš ad‑issanġ ddnub mamnk ad‑gan. mayad a‑f‑ifka rbbi luṣit‑ns: baš a‑nẓr mnšk a‑bahra‑ʷh̬šnn ddnub.

¹⁴ nssn ššrɛ is‑iga win rbbi, imma nkki giġ bnadm iḍɛfn, gġ ismg i‑ddnub.

¹⁵ ur‑a‑tfhamġ mad‑skarġ. ur‑a‑skarġ afulki lli‑riġ, walaynni lh̬ʷšant lli‑kurhiġ kad‑skarġ.

¹⁶ akud nna‑skarġ ma‑ur‑riġ ar‑malaġ is‑ssnġ ššrɛ ifulki.

¹⁷ ar‑malaġ‑daġ is‑urd nkki a‑iskarn ġayan walaynni lquwwa n‑ddnub lli‑gigi‑illan, nttat a‑t‑iskarn.

¹⁸ ssnġ is‑ur‑illi kra ifulkin ġ‑ddat‑ad‑inu. wah̬h̬a da‑ttiriġ ad‑skarġ afulki ur‑a‑tiẓḍarġ.

¹⁹ ur‑a‑skarġ afulki lli‑riġ, walaynni lh̬ʷšant lli‑ur‑riġ, nttat ad‑skarġ.

²⁰ iġ‑a‑skarġ ġaylli ur‑riġ, urd nkki a‑t‑iskarn walaynni lquwwa n‑ddnub lli‑gigi‑illan, nttat a‑t‑iskarn.

²¹ hati ġmkad a‑bdda‑giġ: akud nna‑riġ ad‑skrġ afulki ar‑n‑tafaġ ih̬f‑inu ur‑ẓḍarġ ġir i‑lh̬ʷšant.

²² ġ‑uwl‑inu ar‑tfraḥġ s‑tnbaḍin n‑rbbi,

²³ walaynni ġ‑ugʷns‑inu ar‑n‑tafaġ kra n‑tnbaḍin yaḍni ar‑tmmaġnt d‑tnbaḍin l‑lɛaql‑inu. ar‑iyi‑kkrfnt‑tnbaḍin n‑ddnub lli‑llanin ġ‑ugʷns‑inu.

²⁴ taguḍi ad‑iyi‑illan. ma‑ra‑yyi‑ijjnjm zġ‑ddat‑ad lli‑yyi‑itawin s‑lmut?

²⁵ walaynni rad‑bahra‑talġġ rbbi, ašku f‑uwdm n‑yasuɛ lmasiḥ siditnnġ a‑f‑rad‑njmġ. walaynni ġmkad ad‑sul‑giġ nkki: ar‑ttiriġ tinbaḍin n‑rbbi s‑lɛaql‑inu, walaynni ddat‑inu ar‑sul‑tskar s‑tnbaḍin n‑ddnub.