ruma 6 - aåaras n-tudrt - injil l-lmasiæ - løhd l-ljdid lli-iskr rbbi å-gras d-bnadm

tudrt l‑ljdid

¹ ma‑ra‑nini f‑mayad? is‑a‑nzayd ġ‑ddnub baš a‑ttigat lḥnant n‑rbbi?

² uhu, urd ġmkan a‑ra‑nskar. ašku nkkʷni nmmut i‑ddnub. mamnk a‑ra‑niri a‑sul‑gisn‑nzayd?

³ is‑ur‑tssinm? lliġ nddm ġ‑waman baš a‑ng win lmasiḥ yasuɛ, nkšm s‑lmut l‑lmasiḥ s‑udum‑an.

⁴ ntyawmḍal dids s‑udum lli‑irwasn i‑lmut baš a‑nddr s‑tudrt l‑ljdid, ġmklli‑d‑inkr nttan zġ‑lmut s‑tḥkimt n‑rbbi babas.

⁵ ašku lliġ nwrri nga zund lmasiḥ ġ‑lmut‑ns, ra‑ng zund nttan ula ġ‑tudrt‑ns l‑ljdid.

⁶ nssn mayd‑aġ‑ijran. immut zġ‑ginnġ bnadm aqdim lli‑sttin‑nkka nga‑t. immut d‑lmasiḥ f‑uggjdi baš a‑titti lquwwa n‑ddnub zġ‑uwl‑nnġ a‑ur‑sul‑ng ismgan i‑ddnub.

⁷ ašku wanna immutn, hati ityawfsay zġ‑iskraf n‑ddnub.

⁸ lliġ nmmut d‑lmasiḥ, namn is‑ra‑dids‑nddr,

⁹ ašku nssn is‑ur‑ra‑immt lmasiḥ tis snat‑twal ġilad ġ‑d‑inkr zġ‑lmut. ur‑sar‑tẓḍar lmut a‑ti‑tnru.

¹⁰ ġakud lliġ immut lmasiḥ immt yat‑twal i‑kullu ma‑igan ddnub. imma ġilad ġ‑iddr, hati iddr i‑rbbi.

¹¹ ġmkad a‑kʷn‑d‑iqqan ula kunni a‑tgm ih̬f‑nnun d‑willi mmutnin i‑ddnub tddrm i‑rbbi f‑ssibt n‑ma‑tgam win lmasiḥ yasuɛ.

¹² a‑ur‑tadjm ddnub ad‑tḥkamn ġ‑ddat‑nnun lli‑ra‑immt, ula‑da‑kʷn‑traran a‑tskarm s‑lh̬ʷšant lli‑ittiri‑uwl n‑bnadm.

¹³ a‑ur‑takkam igzman n‑ddat‑nnun zund irukutn l‑lh̬ʷšant ad‑skarn ddnub. walaynni fkat ih̬fawn‑nnun i‑rbbi zund ġwilli nkrnin zġ‑lmut s‑tudrt l‑ljdid, tfkm igzman‑nnun i‑rbbi zund irukutn n‑ufulki.

¹⁴ ur‑ra‑kʷn‑nrun ddnub ašku ur‑tgim ġwilli‑f‑illa ššrɛ, walaynni tgam ġwilli‑f‑tlla lḥnant n‑rbbi.

tiġrad n‑ddnub ula tikki n‑rbbi

¹⁵ ma‑ra‑nini f‑mayad? is‑ra‑nzayd ar‑nskar ddnub f‑ssibt n‑ma‑nga ġwilli‑f‑tlla lḥnant n‑rbbi urd ššrɛ? uhu, urd ġmkan a‑ra‑nskar,

¹⁶ ašku tssnm mayad: iġ‑tfkam ih̬f‑nnun i‑kra n‑yan a‑tskarm ma‑ira, twrrim tgam ismgan i‑walli mi tskarm s‑wawal‑ns. iġ‑a‑tskarm ddnub rad‑awn‑tili lmut, walaynni iġ‑a‑tskarm ma‑ira rbbi rad‑awn‑yili‑ufulki lli‑s‑irḍa.

¹⁷ imma ġilad illa fllannġ a‑bahra‑ntalġ rbbi, ašku kunni lli‑sttin‑ikkan tgam ismgan n‑ddnub, hati twrrim ar‑tskarm s‑nniyt n‑uwl‑nnun s‑tnbaḍin n‑ulmmud lli‑mi‑tsfldm.

¹⁸ ifsi‑awn rbbi zġ‑iskraf n‑ddnub aylliġ twrrim tgam ismgan n‑rbbi ar‑tskarm s‑ma‑t‑irḍan.

¹⁹ hati ar‑didun‑sawalġ ġilad s‑iwaliwn rh̬anin ašku tḍɛfm, išqa fllawn a‑tfhmm. tkkam‑ttin tfkam ih̬fawn‑nnun ismgan i‑lɛib d‑lh̬ʷšant baš a‑ttzayadm ar‑tskarm kullu ma‑yʷh̬šnn. imma ġilad iqqan‑kʷn‑d a‑tfkm ih̬fawn‑nnun a‑tskarm afulki lli‑s‑irḍa rbbi ttyawẓlaym a‑tgm wins.

²⁰ lliġ ttin tkkam tgam ismgan i‑ddnub, ar‑sul‑tskarm ġmklli ttirim bla‑da‑ttlhum s‑ma‑irḍan rbbi.

²¹ walaynni ġayan tskarm lli‑f‑kʷn‑tʷgraẓ ġilad, mal‑lfaytt zgis tumẓm? iskkirn‑an ur‑a‑di‑tawin abla lmut.

²² walaynni rbbi ifsi‑awn zġ‑iskraf n‑ddnub. twrrim tgm ismgan n‑rbbi, ttyawẓlaym a‑tgm wins tili‑awn lfaytt n‑tudrt idumn.

²³ ašku tiġrad n‑ddnub lmut a‑stt‑igan, walaynni tikki n‑rbbi tga tudrt idumn f‑uwdm l‑lmasiḥ yasuɛ siditnnġ.